真人真事改篇﹕師生戀﹕《最接近的陌生距離》: 第四十七章之六
當我地入去第六間試身室時，我唔理咁多，即刻下意識地抱實蟲蟲。有咩事比人打都好，都係打咗我先！
此時外面有人叫喊：「大佬！我見到佢地入咗去呀！」
仆街！真係比佢地發現咗！我同蟲蟲好驚咁對望，蟲蟲都知呢次同走入倔頭路冇分別，佢嘅神情漸漸變的慌張起嚟。
「呢度有七間試身室，對狗男女入咗邊一間呀？」
「唔知呀！」
「屌你個廢柴！做少少嘢都唔得！！逐間刮！」
殺到埋嚟添！我聽到佢地不停叫囂，由遠至近咁埋嚟，似乎佢地逐間試身室搵緊。
嘭——！
「喂！你地做咩呀！」係把男人聲，應該係試緊身嘅顧客。
「冇你嘅事！走！」
嘭——！又一間試身室被佢地撞開咗。
依希記得我同蟲蟲匿咗喺第六間試身室。言下之意，大約幾秒之後就輪到我地！
嘭——！
「非禮呀！」第三間！
「走啦八婆！」
仲有兩間到我地！
我感受到四處氛圍急變緊，危機嘅網羅已經收到好榨好榨！喺下一秒就會將我同蟲蟲一網打盡！
嘭——！第四間！
蟲蟲聽到呢班人嚟真嘅時候，佢先知大禍臨頭！佢收起剛才嘅嬉皮笑臉，面色變青，再一頭栽落我胸前，好驚咁抱住我！
嘭——！第五間！
下一間就到我地啦！
可以點算？冇得走架喎！我一打三又要保護蟲蟲，冇可能架！
卟通——卟通——我驚到連自己嘅心跳都聽得到！
然後三個腳步聲已經去到我門外，三人正正竊竊私語，睇嚟下一秒，我同蟲蟲死期將近！
我咩都唔諗，只係緊緊閉上雙眼！
⋯
⋯⋯
⋯⋯⋯⋯
「就係佢地啦！」一把唔屬於班MK嘅聲音：「頭先呢位女士試緊衫，呢班人踢開度門呀！」
「仆街黃咗！」其中一個MK叫道！
「咪走呀！報警拉你班死臭飛！」呢把聲應該係保安嚟。
只感覺危機隨住奔跑聲漸漸遠去，睇嚟已經安全。
唔知，我仲好擔心啲MK即使走甩咗，佢地仲可以喺商場某一處捕緊我地。所以我同蟲蟲都唔敢行出去⋯⋯
應該話，我地彼此都唔敢放開大家，仲緊緊抱住。蟲蟲應該知道自己今次玩大咗，佢喺我壞中驚到震晒。
「⋯⋯嗄⋯⋯嗄⋯⋯」我緊張到喘緊氣。
「⋯⋯你⋯⋯抖氣聲咁大嘅？」喺我胸前嘅蟲蟲用把氣聲同我講嘢，佢一早收起頭先嘅恌皮，總覺得佢有一種情緒蘊釀緊。唔係驚慌，唔係緊張，而係⋯⋯？！
「⋯⋯比佢地搵到唔講得笑架嘛。」
「你好驚咩？你又唔係第一次同人打交。」
「當街打交被人拉就大鑊架啦。我本身操行差，如果惹咗官非實比學校踢走。咁樣我就會辜負咗Miss⋯⋯」
我欲言又止，只因我⋯⋯又記起過去嘅努力。過去為咗嗰一個人嘅努力⋯⋯
嗰一個人⋯⋯
我個心又痛⋯⋯
「你做咩講講下又唔講嘅？」
「呃⋯⋯咁樣我一直以嚟嘅努力就會白廢。」原來我已經唔能夠再提起嗰一個人，我只好改一改個說法。
蟲蟲深深呼吸一下，佢忽然抱得更實。
「好羨慕呀⋯⋯」
蟲蟲忽然喺我懷中喃喃咁講咗一句說話令我感到莫名奇妙。
「我真係好羨慕⋯⋯」
「嗯？」
「我⋯⋯我好羨慕你女朋友⋯⋯可以有一個咁好嘅男朋友。佢一定好幸福⋯⋯」
「蟲蟲⋯⋯你⋯⋯你講緊咩呀？」點解佢要咁講嘅？我又冇提到我感情嘅事。只感到呢刻嘅氣氛再冇頭先嘅驚險刺激，而係有一種失落飄盪喺空氣中。總覺得佢有啲說話想同我講。
呢份失落、呢份憂傷、呢份不捨⋯⋯我統統都感受到。呢一切一切都係嚟自蟲蟲。
「⋯⋯有人愛護自己、有人保護自己、有人願意為自己努力、有人願意為自己去改變⋯⋯到底係咩感覺嚟架？」蟲蟲開始哽咽。佢情緒會唔會變得太快？由剛才咁刺激咁高漲，一下子變到咁憂鬱，簡直好似坐過山車咁。究竟係邊一個時刻觸動到佢嘅情緒？
「⋯⋯由細到大，我都比人當波踢。冇人愛我⋯⋯冇人覺得我係重要⋯⋯」
蟲蟲呼吸聲開始急促，兩肩震緊，然後細微嘅哭聲慢慢喺空中飄盪。
「Sorry⋯⋯我⋯⋯」蟲蟲忽然飲泣，搞到我唔知做，亦都唔知點解佢會喊。或者我同佢離開呢度會好啲？呢度環境有啲焗，刺激到佢？就好似上次Art room咁？
但係當我想放開蟲蟲時，蟲蟲竟然到抱得緊啲，佢哽咽咁講：「⋯⋯比我聽多一陣呀⋯⋯嗚⋯⋯」
「嗯？」
「你嘅心跳⋯⋯我好想聽多一陣⋯⋯」蟲蟲情緒開始激動：「以前比人鎖喺黑房⋯⋯我好黑⋯⋯好驚⋯⋯好靜⋯⋯靜到我只係聽到自己嘅心跳聲⋯⋯」
「⋯⋯我個心跳好亂⋯⋯好驚⋯⋯好孤單⋯⋯但你嘅心跳令我好⋯⋯好⋯⋯嗚⋯⋯」
蟲蟲嘅眼淚沾濕咗我胸前嘅衣服。當我聽到佢喊時，我內心就軟化，我成個人嘅情緒好似被佢牽動咗情緒。就好似⋯⋯觀塘海濱公園嗰晚。
蟲蟲再一次觸動到我嘅憐憫。我雙手原本抱住佢肩，此時我好似被一種魔力所引導，兩手不自覺地將輕撫佢頭髮，將佢面龐緊緊地貼落我胸前。
「你嘅心跳令我好安心⋯⋯你一直都冇離開過我⋯⋯。但係⋯⋯我⋯⋯我⋯⋯只有呢一刻先可以聽到⋯⋯嗚⋯⋯今晚之後⋯⋯嗚⋯⋯」
「⋯⋯」
「我每日都好驚架⋯⋯成日都覺得會有人打我⋯⋯鬧我⋯⋯我真係好驚。同你喺埋一齊，我真係好開心架。我覺得即使有人想傷害我都好，你都會保護我⋯⋯不過⋯⋯你始終都唔係我嘅⋯⋯嗚⋯⋯」
「⋯⋯」
「⋯⋯嗚⋯⋯對唔住，我好自私。我知你今日唔開心⋯⋯我安慰你只係藉口⋯⋯其實我想你陪我耐啲⋯⋯」
「⋯⋯」
「對唔住⋯⋯對唔住⋯⋯我唔應該咁樣利用你⋯⋯我好自私⋯⋯。求下你，比我聽多一陣⋯⋯嗚⋯⋯⋯嗚⋯⋯比我聽多一陣⋯⋯」
「⋯⋯」
「⋯⋯比多一分鐘我⋯⋯我聽多一分鐘就夠喇⋯⋯。」
蟲蟲情緒崩潰咗咁，我感覺到嘅係一種希望，但更多啲係恐懼同擔憂。佢好似喺我身上面搵到份希望，卻又害怕呢份希望會幻滅。
此時，我柔輕地喺佢耳邊講一句——
「其實你想聽幾耐都得架。」
蟲蟲哭聲停咗，愕然地抬頭望住我。一雙淚眼睜得好大。
「唔好講對唔住啦。同你一齊我都好開心架。其實你對我都好重要。我⋯⋯好需要你呀！蟲蟲！」
蟲蟲聽罷後面龐開始發燙，面上閃過一絲感動後，表情開始複雜，憂傷嘅神色慚慚消失，慢慢換上一種幸福感。只見佢塗上淡簿唇彩嘅嘴巴微微抖動，似乎蘊釀住難以說出嘅千言萬語。
其實我都一樣。
四目交投之時，我內心就好亂。我唔再係憐憫蟲蟲咁簡單⋯⋯我想⋯⋯我⋯⋯
我講唔出口！或者我應該用行動去話比蟲蟲知我嘅想法——
此時，我同蟲蟲都彷彿心有靈犀——蟲蟲閉起雙眼，佢都想用行動去代替說話——
我亦慢慢將雙眼閉起，我倆嘅面龐正慚慚接近，想以深深嘅一吻去代替一切嘅說話。
佢嘅温度、鼻息同香氣漸漸撲到我鼻前。就連蟲蟲嘴唇上嘅唇彩散發嘅香味我都好似感受到。
喺下一秒，我倆嘅嘴唇即將深深相印在一起⋯⋯
喺呢一吻後，我同蟲蟲再唔係單純嘅朋友、兄弟——不過——
.
「咁佢點算呀？」
.
蟲蟲做咩咁問？浪漫嘅氣氛好似夾硬咁被佢煞停咗。
我未意會到咩事，未來得及張開眼時，蟲蟲哽咽地說——
.
「咁Miss Wong 點算呀？」
.
我心下一驚，即刻張開眼，就見到蟲蟲喊得比之前更勁。佢剛才幸福表情一掃而空，彷彿諗通咗一啲事情、認清一種事實！
「你⋯⋯你其實一早知道咗，我女朋友就係——？！」
.
「同Miss⋯⋯Miss Wong⋯⋯分開！你真係捨得咩？
嗚！」
蟲蟲淚如泉湧，佢呢刻好想放開我，卻矛盾地唔願放手。呢份矛盾令佢喊得愈嚟愈厲害⋯⋯