真人真事改篇﹕師生戀﹕《最接近的陌生距離》: 第四十七章之三

「吓？」我驚訝咁叫：「我地著緊校服喎！入得架咩？！」
 
五光十色嘅燈光，配埋強勁嘅音樂節拍，唔講唔知我以為我地去咗disco！ 估唔到蟲蟲話帶我去威，原來係嚟機鋪玩。呢間機舖係喺商場嘅頂樓，全層都係，入面咩game都有。其實呢間機鋪我成日都嚟，但著住校服嚟都係第一次。
 
蟲蟲見到我咁驚青咁就嘲笑咗一聲。然後就拎咗個電話出嚟，就話：「喂，我到咗啦。」
 
過咗一陣，有一個貌似機鋪職員，年約18歲嘅肥仔就喺機鋪入面行出嚟。
 
「蟲蟲！你咁好嚟探我嘅？」肥仔一面狗公格，明顯好冧蟲蟲。
 




面對肥仔嘅異常熱情，蟲蟲卻好冷漠咁講：「我要嘅嘢呢？」
 
然後個肥仔將兩件黑色風褸交比蟲蟲。佢接過風褸後就張其中一件褸掉比我，話：「著住佢啦！」
 
只見蟲蟲著起件風褸後，就好似著咗便服咁，呢一刻我明白咗佢嘅用意，於是我都著起件風褸。
 
「玩得開心啲呀！」個肥仔拎住一大袋散紙遞比蟲蟲。
 
蟲蟲好冷淡咁同個肥仔講咁句唔該鼓後，就對我熱情咁講：「唔好嘥時間啦！快啲入去玩啦！」
 




我被佢一連串嘅行為搞到唔識比反應，只懂目定口呆咁講：「嘩！你又嚟又食又拎呀？！我真係服咗你。」佢簡直同上次嗲七仔哥哥一樣，只不過今次呢個肥仔應該本身係識蟲蟲。睇條肥仔烚熟狗頭咁嘅樣，十成九都係兵。
 
雖然，我幾不齒收兵呢個行為。但我都受惠呢隻兵，我先有鋪免費機打。
 
「想玩咩先呀？」蟲蟲喺我面前一走一跳，好似去咗主題樂園咁，成個童真返晒嚟。只不過佢背景係機鋪，又頭D又打鼓機咁，成個畫面望落都幾有反差感。
 
當我以為蟲蟲想帶我玩啲低B益智遊戲時，估唔到佢將我帶到呢部機面前⋯⋯
 
「試下。」蟲蟲翹起手，含住粒珍寶珠，白色嘅糖棍令佢望落似煲緊煙。佢笑說：「睇下你勁啲定我勁啲！」
 




我面前嘅係一部打拳機，玩法簡單，入錢吊個沙包落嚟，再一嘢轟落去。
 
「就咁咋？」我對佢冷笑：「你係女仔，對你唔公平喎！」
 
蟲蟲冷冷一笑，就搖搖頭，一面睇我點威嘅樣。
 
衰妹睇小我？我拿拿聲入錢，鋪機即刻響起好似Rocky嘅音樂，我退後幾步，喺蟲蟲面前耍咗幾下招或，彈咗幾下步伐，喺要出拳之前，我打趣同蟲蟲講：「我地不如玩得刺激啲呀？」
 
「你想點玩呀？」蟲蟲不屑地白我一眼，但又難掩期待。
 
「我地玩三款街機，睇下邊個贏得最多。打拳機就睇下邊個分數多。下Round我要挑你打拳皇，睇下邊個贏。」
 
「咁最後一Round我地片車啦，頭D好唔好？」
 
「就咁話！」




 
「輸咗點先。」
 
「到時贏咗嗰個再決定！」
 
「哈哈！好呀！」蟲蟲拍晒手掌咁講。
 
我對佢囂張咁笑，一面志在必得。我未夠歲就跟阿偉入機鋪玩，打拳機、拳皇同頭D呢啲簡直係我強項。呢次比賽我贏梗都得。諗下一陣點樣整鬼佢仲好！
 
喺過去同人隻揪嘅經驗得知，出拳講究唔只係臂力，其實腰力都好重要。喺我個沙包前跳咗幾下boxing步姿後，心中盤算緊點樣先可以打出最高分數⋯⋯啊！個沙包點解愈望愈似一個人嘅？
 
係李Sir！
 
右腳一轉，力從地起，腰轉發力，就一個右勾拳轟出去——！
 




 
呯——！
 
 
「哇⋯⋯！」蟲蟲嘩聲。
 
部打拳機炸出強勁音樂，中間組跳字不停咁跳。最後—登登登登登——！
 
「哇！700分⋯⋯」蟲蟲好驚訝咁講。我好自豪咁擦一擦鼻，點知蟲蟲嘅語氣一變就講埋個尾音：「咋？」
 
我瞪一瞪眼，衰妹咁串？哼，我就睇下你點威！
 
沙包一上一落，第二局開始。
 
「揸住。」蟲蟲將佢食到一半嘅珍寶珠遞比我，然後佢企到好後擺好架色。




 
「你企咁後點出拳呀？」
 
「嘿！」
 
蟲蟲冷笑一聲後，佢眼神突然變得好「殺」！然後我好感到到一陣急風，一個快轉嘅身形，我眼尾剩係好似見到揚起咗嘅裙邊，就——
 
 
「嘭！」一聲巨響！
 
 
我定一定神，只見蟲蟲擺咗個好靚嘅姿勢，頭下腳上，佢應該出咗一招好厲害嘅轉身勾踢。蟲蟲英姿颯爽，展現出無比自信。忽然間，我覺得如果蟲蟲頭戴白色頭巾的話，佢簡直就係街霸入面嗰個春日野櫻呀！！
 
蟲蟲企直返個人，背住炸出強勁音樂嘅打拳機。佢眼神充滿自信地望我一眼，好似唔洗望就知自己拎咩分咁。終於——登登登登登——！
 




「9⋯⋯⋯9⋯⋯⋯」我嚇到目定口呆：「900分？！」
 
「下round!」蟲蟲神氣滿滿走嚟拎走枝珍寶珠，說話都變得簡潔起嚟。
 
我呆晒望住打拳機嘅分數，有啲後悔我輕視咗蟲蟲嘅打機實力。