真人真事改篇﹕師生戀﹕《最接近的陌生距離》: 第四十七章之一

我心碎晒，體溫極速流失。即使今日唔係好凍，但我感受到四周嘅溫度好似嚴寒咁凍。
 
成個禮堂好黑，好凍。聽日考試，操場上再聽唔到打波嘅聲音，搞到四周嘅環境好寂靜。令即使身在禮堂嘅我都聽到停車場上嘅汽車聲。電單車嘅引擎聲唔知從禮堂邊一扇窗傳入嚟，我知道Miss已經坐李Sir車走咗。
 
禮堂嘅冰冷寂靜，使Miss嘅說話不斷喺我腦入面盤旋——「我唔想影響到你嘅成長。」
 
Miss想講我地嘅戀情會影響到我成長？佢終於覺得呢段情係錯嘅？即係話⋯⋯
 
佢暗示緊要同我分手？
 




佢想同我分手？！
 
 
 
.
 
「阿匡⋯⋯阿匡⋯⋯」
 
.
 




 
我手腳郁緊⋯⋯我行緊路？但我睇唔到嘢，眼前嘅畫面盡是黑暗。
 
我⋯⋯我喺邊呀？我去緊邊呀？
 
.
 
「阿匡⋯⋯喂！你聾咗呀？」
 
.




 
我係咪出緊幻聽？
 
有人叫緊我？
 
但我身體繼續不自主咁行緊。
 
直至⋯⋯⋯
 
 
.
 
「賤人匡！！」
 
.




 
我膊頭被人好大力咁拍咗一下時。我成個世界好似著返燈咁。見到有個女仔正正企咗喺我面前。
 
「係要我咁惡叫你先識認人嘅！」
 
我兩眼慢慢搵返焦點，終於睇清眼前嘅女仔係邊個，疑惑咁講：「蟲蟲？」
 
我連忙環視四周，驚訝發現已經唔係學校附近！我又
冇咗意識咁行咗好遠？
 
「你⋯⋯你喺度嘅？」我疑惑地問蟲蟲。
 
蟲蟲反我白眼，抱怨咁講：「啊！耍大牌啦嘛？今朝我地約好咗放學一齊溫書架大少！」
 
「啊⋯⋯係⋯⋯係喎！」




 
「你知唔知而家幾點呀？！」
 
「對⋯⋯對唔住⋯⋯」
 
「我喺燈柱度等咗你成個鐘啦！見你喺學校出嚟時就嗌住你啦！叫極都唔應！好似機械人咁行！搞到我好似個傻婆咁喺後面嗌住你呀！」
 
「sorry ⋯⋯我⋯⋯我呀⋯⋯」
 
「唉！算啦！你⋯⋯冇事呀嘛？」蟲蟲疑惑嘅眼神露出少有嘅關心神色。
 
「嗯⋯⋯冇⋯⋯冇事呀。」
 
蟲蟲一面唔相信，低一低頭好似諗緊嘢。幾秒後佢抬頭就話：「喂，我未食Lunch呀。」
 




「哦⋯⋯」
 
只見佢行嚟我身邊，拉住我手臂話：「行啦！我肚餓呀！過嚟陪我食嘢啦！」
 
我冇比反應佢，任由佢拉住我。我個世界冇咗，其實身邊發生咩事都唔再重要。
 
= = = =
 
 
我又斷咗片，又冇晒中間嘅記憶。當我有返啲感覺時，就聽到蟲蟲好開心咁話：「我唔客氣啦！嘻嘻——！」
 
蟲蟲雙手合十，佢對笑笑眼瞇成好可愛嘅孤度，佢面前亦已經擺好晒豐富嘅美食。最令我吃驚嘅係每款食物都散發緊紅色嘅危險訊號。
 
「你⋯⋯你⋯⋯你好食得辣架？！」我呢刻終於有返啲感覺，講嘢有返啲起伏：「同埋⋯⋯我地唔係去溫書咩？！」
 




口水雞、手拍青瓜、酸辣粉⋯⋯香係好香，但望住呢幾兜嘢，我隻「眼」已經好熱！
 
佢一手夾起件口水雞就食：「啊——幸福嘅味道呀。」蟲蟲食到合埋眼，但眼角已經狂標眼水⋯⋯嘩，睇嚟堅辣喎！
 
「嘩你⋯⋯食到流晒眼淚咁。你都好自虐下喎！」我睇到佢咁，搞到我面都青埋。
 
「嘩⋯⋯好辣呀好辣呀！」蟲蟲聽唔到我笑緊佢，嗌住救命咁飲咗啖奶茶：「喂，你仲唔食嘅？預埋你架啦！」
 
「吓？！我都冇話要食？！」我吃驚咁講，蟲蟲真係無時無刻都會陰我一鑊。見佢食一舊口水雞已經面紅耳赤，都咪話唔嚇死人！
 
「點呀？你驚呀？」蟲蟲揚住雙眉，嘲笑我咁講：「哈⋯⋯乸型！」
 
「辣咋嘛？驚你呀？！」
 
我被蟲蟲摸清楚個底，被佢激一激就馬上夾舊雞嚟食。
 
當我放入口前，望住浸滿紅油嘅雞件即刻猶豫一下，肛門猛地收縮——我粒「眼」好似有意識咁向我抗議。
 
「唉！都話你係乸型嚟架啦！」蟲蟲又食一舊雞，面容扭曲。
 
「我唔係乸型呀！痴線妹！」
 
「咁證明比我睇呀！」
 
「好呀！呢刻開始！邊個頂唔順飲咗水先嘅就算輸！」
 
「哈哈哈！好玩呀！要食埋啲指天椒架喎！」
 
「飲埋啲紅油呀笨！」
 
「就咁話啦！」
 
唉⋯⋯呢次真係自己攞嚟衰。激將法係我死穴，一篤中我就智力同理性急降。如是者，我同蟲蟲鬥食辣、喪食辣。
 
但鬥到冇耐，我同蟲蟲已經出晒口術引誘大家快啲投降，早啲分勝負、早啲完大家都舒服嘛！但點知蟲蟲呢個女仔比我想像中更倔強、更唔服輸。總係好想喺男仔面前贏到盡晒。
 
終於我同佢食完一碟口水雞後，眼神有啲恍惚之下彼此傻笑，再一齊衝埋餘下嘅生化武器。
 
雖然，真係好痛苦。但成個過程入面，我同蟲蟲串下大家時又會有講有笑，而且可能真係太辣、太刺激嘅係，唔只令到我地滿頭大汗、心跳加速、味覺神經好似被人千刀萬剮咁，更令我⋯⋯
 
好似辣到忘記咗啲嘢。