真人真事改篇﹕師生戀﹕《最接近的陌生距離》: 第四十六章之四

返到學校，我繼續做好班長嘅責任，預先到課堂準備。本來我打算可以偷啲時間同Miss獨處。點知返到課室時竟然冇人，我望一望錶，好詫異咁講：「呢個時間Miss應該返到嚟喎！」

話口未完，我啲同學陸逐返到課室，佢地都好驚訝平時準時開嘅Miss點解到而家都未返課室。

「匡哥，Miss Wong仲未返嚟嘅？」其中一位同學咁講。

「我點知呀。」我冷淡回應，老實講我都想知點解Miss仲未返：「我估佢病咗掛。」

「喂你地兩個搞咩呀？」副班長走埋嚟同我講。





「你講咩呀？」

「你同佢表面好正常，但實際就面阻阻咁。」副班長一面食花生嘅心態咁講。

「係囉係囉。特別匡哥你呢排上Miss Wong堂好造作囉！」

「咩呀？未又係上堂舉手答問題！」

「係呀。不過你做到好似扮冇嘢咁囉。」副班長。





「Miss Wong個反應都一樣添呀！」另一位同學附和：「唔講唔覺，一講你同Miss Wong好似⋯⋯情侶嗌交咁呀！」

我聽完就吃一驚！即係話我同Miss點小心都好，其實旁人總係感受到我同Miss間嘅關係？特別係而家嗌咗交，個反差就更強烈。副班長講講下就興起，其他同學過嚟湊下熱鬧。

好彩呢個時候黎Sir嚟咗課室，佢嗌咗聲：「起立！」

雖然佢幫我解咗圍，但令我憂心嘅係呢堂明明係班主任堂，點解又係黎Sir嚟代課架？！

「黎Sir ！Miss Wong呢？」我舉手叫道。副班長喺旁邊偷笑。





「佢有啲事，會遲啲返。我幫佢代課。」黎Sir：「阿匡，你比我熟4A班務，呢課麻煩你幫幫手啦！」

我照黎Sir吩咐幫手搞班務，但我心掛掛⋯⋯琴日早退，今日遲返，到底Miss咩事呀？Whatapps又唔理我⋯⋯有事都唔同我講，佢仲當唔當我係男朋友呀？

好快到小息，我連忙去咗教員室睇下Miss 返嚟未。點知一行出課室，望去校門時，就見到架電單車駛咗入嚟。車上而嘅係係李Sir，坐喺後面嘅唔洗問——係Miss。

我感覺到我成個人嘅體溫降到去冰點⋯⋯冇⋯⋯冇事嘅！我去搵Miss問清楚咩事。點知一去到教員嗰層時，Miss已經好匆忙咁準備小息後嘅課堂，我搵佢唔到。但就打聽到李Sir被副校長召見，我心諗一定關Miss事，所以特登去副校長室門前偷聽下咩事。

「⋯⋯李Sir，我必須提醒你，你擅自早退同遲到係好影響你過唔過到試用期⋯⋯」

「⋯⋯鍾副校，Miss Wong佢有事，佢處理唔到，我都係幫下手啫。通融下啦⋯⋯」

咩話？Miss屋企有事？

「⋯⋯Miss Wong係專業嘅老師。佢一定可以處理到自己問題。但係你，李Sir！你今日上午有PE堂架。你粒聲唔出就走咗，你叫其他同事點頂替到你呀？你咁樣係做咗個壞榜樣比同學睇架⋯⋯」





然後我聽到佢地爭吵咗一陣，李Sir面色唔多好咁行返出嚟。

Miss有事，做咩唔同我呢個正印男朋友講？難道⋯⋯李Sir已經成為咗Miss嘅正印男朋友？係⋯⋯係男朋友先會咁瞓身冒住被炒嘅風險去幫手！

我⋯⋯我⋯⋯我就嚟癲啦！唔得，我要去冷靜下！

= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師