真人真事改篇﹕師生戀﹕《最接近的陌生距離》: 第四十六章之三
好唔容易捱到放學前一堂嘅班主任節。我期望一陣響放學鐘時，可以截住Miss同佢「破冰」。 但係Miss冇嚟到上堂，反而係黎Sir嚟代堂幫我地搞班務。
「黎Sir，Miss Wong呢？」
「佢有啲急事早走咗。」
咩話？有急事？係咩急事呀？搞到我心急起嚟，一放學即刻開手機打比佢、whatapps佢咩事。但我最終換嚟嘅係「你的電話未能接通」同埋「已讀不回」。
佢到底發生緊咩事？佢有咩唔可以比我知？無獨有偶嘅係李sir都早退咗。兩件事會有啲咩關聯呢⋯⋯？冇嘢嘅！唔好嚇自己先！但我始終被呢啲疑問影響左，成晚都溫唔到書，亦都瞓唔到覺。難道真係如家姐所講，李Sir會乘虛而入？
= = = =
冷靜期第二日。
生活習慣開始變返之前咁。所謂嘅之前，就係未同Miss拍拖嗰時嘅生活習慣。第一個外顯現象就係遲咗起身。之前因為我會同Miss拍住拖返學，所以習慣六點就自己醒咗。但今日起身時間係六點九。雖然唔會遲到，但足以令我感到吃驚。
難道⋯⋯呢一個就係Miss漸漸從我生命離開嘅先兆？
喺返學嘅路上我check緊whatapps，Miss依然都係已讀不回我。我只係好卑微咁要求佢彩返我，但佢都完全無視！我係咪做得太錯？我唔應該喝佢？我唔應該對佢發脾氣？呢段關係上，我係咪唔應該有情緒？
「哎呀—！」喺我鑽緊牛角尖時，腳掌忽然一陣劇痛，被人好用力咁踩咗一腳！令我連聲痛叫。喺我回神之時，發現自己喺斑馬線前，眼前嘅汽車風馳電掣走過。我當下心一驚，如果唔係呢個突然嘅劇痛，我應該衝出馬路被車車死咗！
「好心你睇路啦！」有把好惡嘅女仔聲鬧緊我：「過馬路都掛住篤電話！」
我定一定神，望到眼前嘅女仔，好吃驚咁講：「蟲蟲？」
「你⋯⋯喺度嘅？」
「我唔洗返學呀？」蟲蟲白咗我一眼就話：「叫咗你幾聲又唔應人！頭先睇住你紅燈都行緊出去呀！」言下之意我同佢喺呢個路口上撞到？
「sorry。」我見蟲蟲擔心到嬲咗，連忙道歉。
蟲蟲本來想鬧多我兩句，但係呢個時候已經轉咗綠燈，佢先慢慢收起不快，眼神帶住憂心咁講：「行啦。轉咗燈啦。」
「嗯。」
我點點頭就想過馬路，繼續將注意力放喺手機度。點都好，問下Miss發生咩事琴日要早退，想講比佢知我好擔——「啊！」我手機忽然被蟲蟲一手搶咗，仲一枝箭標咗去馬路嘅對面。
「喂喂！」突如其來嘅突襲,令我不知所措起嚟，即刻追上前：「拎返嚟呀痴線妹！」
「哈哈哈哈⋯⋯」蟲蟲見我追上嚟就邊笑邊跑走咗，擺明想整蠱我。
嘩⋯⋯估唔到佢係短跑高手嚟！即使佢一身校服裙加埋件校褸，佢起跑加速真係好鬼快！最後我索晒氣咁跑去分叉路嘅燈柱前。燈柱下嘅佢揚住我啲手機，笑嘻嘻咁嘲笑我。
「咪⋯⋯嗄⋯⋯嗄⋯⋯咪玩啦！比返⋯⋯部⋯⋯嗄嗄⋯⋯手機我呀！」我彎身喘氣，攤大手板咁講。
佢向我遞出手機，但當我想拎時，蟲蟲又惡作劇咁收起手機，對住我奸笑。
「喂！嗄⋯⋯嗄⋯⋯你玩夠未呀？嗄⋯⋯嗄⋯⋯」我開始有啲躁，加重語氣。
「邊個同你玩呀！過馬路唔准睇手機呀！」蟲蟲哼咗一聲，嗡起個鼻，就遞返部手機比我。
我接過手機之後，拿拿聲繼續頭先未完啲msg, 趕緊send比miss。點知行唔夠幾步，蟲蟲擋住我去路，一面不滿。
「又點呀！」我被佢打搞咁多次，好自然都躁咗。
蟲蟲嬲爆爆就話：「我唔拉住你一早比車車死咗啦！多謝都冇句！哼！」
「咁⋯⋯sorry呀。頭先唔該晒。」我send埋段msg出去就收返部手機。
蟲蟲刻意別開我目光，然後回頭望返我就話：「咁緊張部電話⋯⋯覆緊女朋友msg呀？」
「嗯。」我點頭，感覺到我好自然一面愁容咁對住佢。
「你同佢未好返咩？」
我望住蟲蟲，感覺連答佢嘅力都冇，只懂得搖頭。
蟲蟲好似體諒到我心情，眼神變得關切，但冇再講啲咩，只係連忙點頭。
「我返學先⋯⋯」我輕輕咁講，就好似冇靈魂咁喺佢身邊行過。
「喂，賤人匡。」蟲蟲嗌住我，我回望佢時，蟲蟲又一次羞澀咁別開我目光，有少少難於啟齒講：「⋯⋯你⋯⋯溫咗書未呀？」
「吓？」
「我就考試啦，但我中文好差喎，所以⋯⋯不如你幫我溫中文呀。」
「你又知我中文叻？」
「嘻⋯⋯Miss Wong應該教你教得好好啦！」
呢個時候佢間學校響起預備鐘聲。
蟲蟲望一望學校，就匆忙起嚟，連忙咁講：「我學校打鐘啦！嗱！我約實你架啦！放學呢條燈柱見！」然後眼尾都唔望我就走咗。
我喺佢後面叫道：「喂！喂！我冇應承你架！」 點知佢愈叫愈走。
「嘻—！」蟲蟲行到門口前，回頭對我做咗個可愛鬼面，揮一揮手就返咗入學校。
佢呢下反應，令我不禁咁微笑起嚟。呢一刻我先感受到，頭先蟲蟲係特登整蠱我，想我打起精神。的確，每次遇到蟲蟲，我陰暗嘅心情好似遇到陽光咁，即刻暖返啲。
但係⋯⋯
另一舊烏雲好快又嚟到。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師