真人真事改篇﹕師生戀﹕《最接近的陌生距離》: 第四十六章之二

第二日，生活如常。除咗⋯⋯

自己一個人返學、四兄弟得返我同阿波、杰少冇返學、阿偉繼續請病假、Miss做返Miss，一切都好正常⋯⋯睇落好正常。

今日早返去，開定班房門，打掃下課室。Miss嚟到課室，我咩都冇同佢講就準備走，唔阻佢改簿。最多只係點頭，笑一笑，然後⋯⋯

「班長。」

「係，Miss Wong。」





「一陣班主任節，麻煩你幫我收咗回條先。」

「冇問題。」

「順手幫我拎呢疊簿落我簿櫃。」

「知道。」

「唔該晒。」





「bye。」

如常聽Miss吩咐，我繼續做好班長嘅責任。班主任節，我幫手收下功課、派下嘢，留心聽Miss宣布考試事項。

英數同埋其他科繼續努力上堂，因為要考試。英文老師Miss Lau第一次真心讚我乖仔咗同埋英文進步咗好多⋯⋯雖然都係唔合格。

中文堂，繼續如常上堂。Miss要人答問題我第一個舉手答。課文又預先背好晒。繼續如常做Miss嘅好學生。嗯，Miss繼續用佢應有嘅態度對我。讚我進步、讚我乖。然後⋯⋯就冇然後⋯⋯

所謂嘅冷靜期，就係咁淡然，咁簡單。我同Miss變返最普通嘅師生關係。冇憎佢、冇難過⋯⋯就係咁淡然。





或者⋯⋯我內心某處正在作痛，而我自己係唔知?

= = = =

的確，我其實係放心唔落。一到小息、Lunch，我就忍唔住用各種唔同嘅理由去接觸Miss。問功課又好，問考試點溫都好，總之就想接觸Miss乘機去傾我地嘅感情問題。

可惜，事情豈能盡如人意。我同Miss玩咗一日捉迷藏。當我想去教員室問佢嘢時，我發現原來佢喺禮堂約咗朗誦隊練習。當去禮堂時，佢又走咗去校長室面聖。當我喺校長室想捕佢時，我⋯⋯我被個豬隊友捉走咗⋯⋯

「匡哥！你條橋真係洗得啊！」

我睇前嘅人正正係傻佬黎Sir。本來我想爆鑊佢，但呢一刻嘅佢實在有少少令我驚訝到反應唔嚟。

「我真係要多謝你呀！你叫我同李Sir熟啲，真係有用呀！多得李Sir，我同Miss Wong 多咗傾計。唔係傾公事喎！日常閒談都多咗呀！」黎Sir開心到好似小朋友咁狂搖我雙手。

令我驚訝嘅唔係佢同Miss熟咗。而係黎Sir個外表有少少唔同。





「你做咩眼金金咁望實我？」黎Sir好疑惑咁講。

「咦！」我終於發現到佢有咩唔同，吃驚咁講：「你副眼鏡呢？」

黎Sir今日冇戴副招牌毒撚眼鏡（好多油漬，係女見到都驚嗰款），加上梳咗個新髮型，成個樣好容光煥發！真係唔同晒！

「你發現到嗱？！」黎Sir好躍咁講：「李Sir教我用男士mask之類執下個樣呀。點呀⋯⋯係咪真係唔同晒呀？」

佢呢一刻露出自信嘅笑容，外表同以往真係180度大轉變！只不過佢衣着都仲係好老土，同個樣撞到嘭嘭聲，好似電腦Key個頭落去咁。雖然係咁，可以預視到佢脫咗毒個樣真係幾靚仔！

黎Sir笑得好開心，好感激對我講：「仲有呀！你話要個人幽默啲，真係得呀！Miss Wong佢⋯⋯哈⋯⋯佢而家會笑我啲爛gag架！」

我同Miss陷入感情危機，佢就開開心心撩我女朋友，我點會好老脾呀。我於是話：「冇用架。」





「吓？你話講笑話冇用？」

「所有嘢都冇用架。Miss Wong禮貌咁應下你之嘛！」我求其噏下幾句：「而且⋯⋯我上次吹水咋嘛！」

「唔係喎！我照足你說話做，真係有效果架喎！李Sir約咗我聽日同埋Miss Wong食Lunch呀！」

「咩話？！」一提李Sir我就好大反應：「佢又約Miss食飯呀？」

黎Sir用一個睇穿我嘅眼神同我講：「你好愁喎！你唔開心呀？」

「你咪理啦⋯⋯咁⋯⋯我點知李sir係咩人呀。我代表自己班想保護Miss好正常唧！」

黎Sir明白咁點一點頭，就話：「放心喎。信我啦，李Sir好人嚟架。」

「咁⋯⋯你記得同李Sir傾多啲計喎！」不過另一面睇，有黎Sir阻住晒都係一件好事嚟嘅。





黎Sir點一點頭，笑說：「點都好啦。即使你吹水都好，都幫咗我一個大忙呀！我私人⋯⋯醒多個優點比你啦！」

「嘩！可以咁架咩？」

「咁都要有比我記嘅理由嘅！日常嘢做好就得啦！brother! 」

佢擺個拳頭出嚟。

「brother。」

我輕輕碰佢拳頭，唔知點解，我有一種講唔出嘅預感。總覺得我咁樣放條針落去李Sir同Miss之間嘅做法好似唔多對路。Um……難道係因為Miss知道咗之後會更嬲我？

= = = =





ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師