真人真事改篇﹕師生戀﹕《最接近的陌生距離》: 第四十五章之一

西灣河，太安樓。

我呢啲九龍人好少過海，原來太安樓係好多嘢食！一去到太安樓，蟲蟲好似去咗主題樂園咁邊哼住歌，邊喺我面前一跳一走，好鬼活潑。

「鍾意食咩就自己揀啦！我請！」

「原來你都鍾意掃街架？我好耐冇掃過啦！」

蟲蟲聽到我鍾意掃街就雙眼發亮，就話：「係呀！平時掃下掃下就當一餐架啦！係呢⋯⋯你點解話好耐冇掃過嘅？」





我雙手插袋，內心有啲難過，搖搖頭講：「拍拖之後囉。一來我女朋友怕肥，佢唔鍾意掃街。二來⋯⋯我地真係好少出嚟拍拖。」

講講下，我回憶返同Miss出街拖手拍拖嘅日子真係好少，一隻手都數得晒。

蟲蟲可能見我有啲難過，就笑住話：「咁你今日食得開心啲啦！我帶你去食啲熱氣嘢先！」

於是佢帶咗我去食啲炸嘢。老闆娘見到蟲蟲就打晒招呼，就話：「照舊架啦？」

「係呀！」





「咦？」老闆娘望咗我一眼，就對蟲蟲講：「男朋友呀？」

「邊係呀！朋友嚟架！」蟲蟲笑住講。

「乖女，你咪亂識男仔呀。知唔知呀？」老闆娘好似媽咪咁叮囑佢，然後佢用一個唔多友善同懷疑嘅眼神望咗我一眼。

「知啦！」蟲蟲答得好親切。

過咗一陣，老闆娘將天下最熱氣嘅小食包起咗，蟲蟲點咗我去拎住袋嘢，係一袋好豐富嘅煎釀三寶。





「嗱！呢兩串送比你同你嘅男朋友嘅！拎住啦！睇熱呀！今次我特登炸脆啲架！」老闆娘送多兩串炸大腸比蟲蟲。

「哎呀，都話咗唔係男朋友呀！哈⋯⋯多謝老闆娘！」蟲蟲接過兩串炸大腸之後就對我講：「我地去買牛雜食呀！」

「嘩⋯⋯估你唔到喎！」我呢刻好驚訝。

「咩呀？」佢遞咗串大腸比我。

「你個樣望落咁港女，應該鍾意食好精緻嘅甜品架嘛。但原來你食啲嘢咁麻甩架？」

「吓？食嘢都有分麻唔麻甩，港唔港女架咩？你都痴線嘅。」蟲蟲對我冷笑一聲之後就帶我去牛雜檔。

我對蟲蟲又多咗認識。十六歲女仔來講，佢外表真係好靚，基本上係靚過晒佢啲朋友，係典型嘅可愛型女仔。但蟲蟲內裡原來係咁爽直，好男仔頭。呢種反差真係幾令我難忘。

我覺得而家嘅蟲蟲先係真正嘅佢。以前認識嘅蟲蟲都係表現出好波動嘅情緒，嬲時會好嬲、惡時會好惡、傷心時會好傷心，驚嘅時候甚至失晒控添。每一種情緒都好似冇中間程度咁，一嚟就爆到最勁。但而家嘅佢先係正正常常嘅佢。爽直、開朗、男仔頭，真係好討人喜歡。又難怪每去一檔小食，啲老闆都特別鍾意佢，唔止係熟客咁簡單，直頭當佢係女咁錫添。





終於——

「食唔食得晒呀？」我好擔心咁講。

終於我地買咗好多好多嘢食，好似將成個香港街頭小食嘅list一次過買晒咁。

「食得晒！要報答你嘛！梗係要豐富啲啦！」蟲蟲對我笑：「我地開餐啦！好肚餓呀！」

我同蟲蟲去咗公園度坐，匿喺滑梯架入面開餐。

= = = =

ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師