真人真事改篇﹕師生戀﹕《最接近的陌生距離》: 第四十三章之二

杰少冇返學，唔知係好事定壞事。今日我仲擔心緊成日流流長可以點面對佢。好呀⋯⋯條仆街仔唔喺度，就唔洗煩。

阿偉仍然請緊病假，呢條友仔好少病咁多日，搞到我好鬼擔心佢。

冇咗阿偉同杰少之後，成個課室嘅氛圍都變晒。我地四兄弟好似唔同嘅化學原料咁，一擺埋一齊就一定有化學作用，上堂一定嘈到仆街。我留意到，連老師都覺得今日嘅課堂氣氛變得好奇怪。小息都好似因為我地四兄弟唔齊整，搞到冇咁熱鬧。

喺小賣部前嘅座位係我地四兄弟屬嘅位，已經係呢間學校不明文嘅規定。即使而家得返我同阿波兩個人坐，其他人都唔走埋嚟搭枱。

平時好多口水，成隻開心果嘅阿波今日都異常安靜起嚟，最多只係對我傻笑。





最後我忍唔住咁樣同阿波講：「杰少有冇搵你？」

阿波怔一怔，含住撮麵望住我，好傻咁點頭。

「你應該知我地⋯⋯」

「嗯嗯。」阿波點頭。

「仆街。」我嘆咗口氣：「佢好嬲我？」





阿波慢慢吸返啲麵入口嘴嚼，就話：「佢話⋯⋯呢世都唔想再見到你。」

「阿波。我有份搞到我地四兄弟而家散晒，你有冇嬲我？」

「如果我嬲埋你，我地四兄弟就真係散架啦。」阿波突然兩眼通紅，好想喊出嚟。

雖然我地成日坑害佢，恰佢，但正正因為阿波份人好真心、好敦厚老實、好純真，佢喺我地四個當中最有心嘅一個。

「咪流馬尿啦傻佬。」我向佢舉起枝可樂：「brother！」





阿波望枝奶，猶豫咗一齊，冇諗過我呢個舉動會一嘢刺激到阿波即刻喊出嚟。

「喂！你搞咩呀？突然大喊出嚟！」我被阿波嚇到不知所措。

「⋯⋯嗚⋯⋯我⋯⋯我唔知將來仲有冇機會⋯⋯我地四兄弟⋯⋯可以再坐埋一齊呀！」

唉⋯⋯阿波因為我同杰少反咗面而傷心。佢之所以咁重視呢份兄弟情，係因為當年小六佢被人集體欺凌時，我、阿偉同杰少救佢出嚟，同佢做好兄弟。

我同杰少反咗面，再睇到阿波而家呢個樣，我真係好內疚。我拍一拍佢隻手，話：「傻佬！咁多人就咪喊到咁啦！對唔住⋯

我同杰少嘅事搞到你咁。」

「唔⋯⋯唔關事⋯⋯」

「我都想同杰少可以做返朋友。但⋯⋯佢搞著盈盈，我真係原諒唔到佢。sorry, 我同佢起碼短時間內做唔返朋友。」





「唔⋯⋯唔關你同杰少事⋯⋯嗚⋯⋯」

「咁關阿偉事呀？佢知道咗我同杰少反面？佢嬲咗我地兩個？」

「⋯⋯嗚⋯⋯唔講得架⋯⋯嗚⋯⋯阿偉叫我唔可以講架⋯⋯嗚⋯⋯」

佢講到咁⋯⋯一定有古怪！

「妖！阿偉發生咩事呀？講啲唔講啲！」我緊張咁講。

阿波好少咁激動，佢忍受唔到我再問落去於是企起身想走：「你唔好再問啊！阿偉話唔講得就唔講得呀！唔好迫我呀！」

阿波愈講愈激動，好少咁樣發我脾氣，之後佢一枝箭跑咗去廁所。條死仔好少會咁樣喎。





「搞咩呀？！」我不解咁講。望住呢個我地四兄弟專屬座位，由四個變兩個，再變到得返我一個，我個心有一種形容唔到嘅難過！

= = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師