真人真事改篇﹕師生戀﹕《最接近的陌生距離》: 第四十三章之一

星期一。

天氣轉涼，學校一早出咗通告要轉冬季校服。

我件冬季由中一著到而家，一早已經唔啱著。老豆老母為搵食一直都慳得就慳，校服買一件就算。以往「廢超」做班主任嘅時代更加唔執我校服問題。所以我今日都仲係著夏季校服返嚟，最多加多件冷衫。

行出門口返學，心情有啲失落。上星期仲同Miss同居時，我地每一日都好開心咁行呢條返學路，但今日得返我一個。點解我同Miss嘅關係可以一下子變得咁快嘅？

琴日我瞓死咗成日，最後都冇同Miss傾返件事。總覺得即使自己情緒好似已經平伏咗，但只係埋咗喺心嘅某一處。因為我個心仍隱隱作痛。





喺失落之時，我唔知自己行咗幾耐。最後我被一把聲叫停我——

.

「阿匡！」

.

分叉路口上嘅燈柱下，蟲蟲對我打招呼。





「喂！哈⋯⋯你真係有返學喎！」突然嘅興奮將我內心嘅鬱悶一掃而空。眼前嘅蟲蟲彷彿好似陽光咁，驅走我頭頂上嘅烏雲。

「我地約好咗架嘛。」蟲蟲對我微笑，兩手拎住個手提包。

蟲蟲今日化咗個淡妝，個樣望落好開心好精神。唔知點解，佢笑容之中有一份期待。蟲蟲今日正式換上冬季校服，佢同我一樣都著咗件深藍色冷衫，佢胸前結咗個醒目嘅紅色校呔。而條校裙轉咗英式格仔裙。睇佢條裙應該都估到佢今日實比人捉，因為未過膝，裙腳喺膝頭上一寸。佢著對黑色長襪休到去大髀位！裙短同長襪之間嘅大髀位，就係令天下男人為之心動嘅「絕對領域」呀！

唔止！蟲蟲對黑色長襪仲好有「咬肉感」添！令佢嘅「絕對領域」更吸引人！老實講⋯⋯我覺得校服Look嘅蟲蟲係比便服Look迷人！

「你琴晚瞓得好好喎。你今日個樣好精神！」我笑說。





蟲蟲臉上紅暈一現，就側側地頭話：「嗯⋯⋯琴晚⋯⋯都好早瞓。啊！係啦！」佢醒起一啲嘢，有少少慌忙咁抄下手提包，幾物後佢拎咗啲嘢出嚟，笑住同我講：「請你食呀。」

佢向我遞咗枝草莓味嘅珍寶珠。

蟲蟲成個感覺好似啲幾歲妹妹咁，好單純咁同人分享自己鍾意嘅嘢，怕羞得嚟又有啲可愛。

我接過枝珍寶珠後，就笑住講：「多謝。」

蟲蟲輕輕一笑，對我攤大手板，就話：「我條手鏈呢？」

「啊！係喎！」我連忙抄下書包。但因為盒嘢太細，我書包又亂，抄咗陣都搵唔到出嚟。然後我聽到女校開始打預備鐘，搞到我唔好意思咁講：「你等一等。」

「唔緊要啦。不如放學比我呀。」蟲蟲。

「好呀！你快啲返學校先，如果唔係遲到。咁我地放學就⋯⋯」我諗下可以約邊度等。





「就呢度呀！呢條燈柱！」蟲蟲笑得有啲期待。

「嗯！就咁話啦！」

「嗯！bye!放學見！」

呢一刻，我心裡面有一種甜意在擴散。但諗多一諗，我就覺得好唔對路！我竟然有啲期待放學見蟲蟲？

剎那間心情變得矛盾同複雜，既期待，但有一種不安感擴散。

我帶住呢份心情入去學校時，又有一把聲令我從混亂嘅思緒中醒覺過嚟。

「班長。」





我應聲一睇，係Miss。 佢今日當值負責捉同學校服。

一見到佢，頭先蟲蟲帶比我嘅快樂忽然消失。緊接而嚟係纏繞咗我幾日嘅複雜情緒，令我心情不禁一沈。

「Miss Wong 早晨。」我竟然拘謹到好似一般學生咁同佢打招呼。換係平時，我地會互相微笑，眉目傳情。

杰少件事就好似一口釘咁，釘咗落我同Miss嘅關係。而呢份關係正悄悄咁發炎。令我地而家竟然同一般師生一樣。

「你過一過嚟。」Miss帶我到另一邊，避開同學啲視線，佢先稍為用女朋友嘅語氣同我講：「星期六你喺海濱坐咗成晚，有冇冷親呀？」

「冇事。」

Miss點一點頭，打量我全身之後就講：「做咩仲未轉季嘅？」

「件冬季校服唔啱著。」我攤一攤手，表示冇晒辦法。





「你著錯校服就當校服儀容違規架啦。」Miss語重心長講：「你咁樣無端端記一次違規，唔抵呀。」

我笑一笑，就聳一聳肩：「咁你揸正做囉。」

我發咗一下晦氣，Miss呆咗一下，應該被我冷淡嘅態度嚇親，輕聲咁講：「低B仔呀⋯⋯」

「公私分明呀嘛。我唔想再比麻煩你。你記就記啦。件冬季校服我自己諗掂佢。我唔會煩到你。」

Miss難語咁擰埋一面，深呼吸一下，就話：「咁⋯⋯一陣Lunch，想同你傾啲嘢。」

「是旦啦。你鍾意幾時就幾時。反正我冇得揀。我唔想做多咗又比麻煩你。」

Miss表情變得好難受，雙眼都紅晒。佢抖咗幾啖大氣就冷靜返落嚟，講咗聲：「好。」就幫我做埋違規紀錄。





我一見到Miss，個心就好滾燙，好想大聲吶喊，但我又唔知自己想同佢講啲咩。只感到，當我一見到佢時，就好想將所有嘅不滿發洩晒出嚟。

但偏偏，喺我離開Miss視線嘅一刻⋯⋯

我先識反省，頭先咁同Miss講嘢係咪太過份？

= = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師