真人真事改篇﹕師生戀﹕《最接近的陌生距離》: 第三十九章之三

老實講我邊有心情溫書呀。我喺走廊徘徊，個腦不斷諗好多嘢。琴晚Miss一定渡過漫長煎熬，惟一陪到佢嘅人唔係我，係李Sir⋯⋯佢地⋯⋯李Sir又會唔會其實趁我同Miss嗌交呢個機會⋯⋯唔知呀唔知呀唔知呀！！

我唔敢再諗！

可惡！明明呢個星期我同Miss關係好親密、好到不得了。原來就好似坐過山車咁，當架車去到最高嗰下就衝落去！點解會咁架⋯⋯

點解⋯⋯點⋯⋯杰少！！

因為杰少呢件事！！





仆街仔！因為佢！我同Miss先會搞成咁咋！

我望住杰少喺球場上練波，我拳頭握得好緊！好緊！如果唔你呢條仆街仔搞事，我同Miss點會嗌交呀？

杰少呢個時候向我望嚟，佢仍然一面嬉皮笑臉，完全感受唔到佢不斷比緊麻煩Miss！佢冇一絲覺得唔好意思！ 一切都好理所當然！

呢個仆街仔都唔知係咪特登咁做，佢唔抵得Miss做我女朋友。佢係咁架啦，唔係第一次阻我媾女、阻我識女仔。

啊——！我記得返啦！以前中二，喺街場識到啲女，咁啱我同佢同一時間對同一個女仔有興趣。最後呢條仆街仔特登喺個女仔面前唱衰我，跟手同個女仔一齊咗三個月。當時我提自己，兄弟緊要過女，我原諒咗佢。但原來⋯⋯





原來我今日先知！我一直都冇原諒過佢！佢就係一個咁自私嘅人！到今日，佢一定有心想搞禍我同Miss！因為我追到Miss呢件事實在係比佢威太多太多！仆街仔！

呢個時候我先發現，李Sir原來唔喺球場上。我遠望學校大閘嗰時，先知道李Sir出咗去對面間台式飲品店買嘢飲，兩杯一樣嘅、Miss最鍾意嘅奶蓋系列。屌你，一人一杯咁Sweet ?

然後我睇住李Sir入教員室⋯⋯頂！入面會發生咩事呀？！

Miss同李Sir會做啲咩呀？

我心急如焚，我立即企上張枱度，由透氣窗偷望教員室嘅情況！





呢一刻，我心好難受。李Sir坐喺Miss旁邊，用喺Notebook幫Miss處理啲文件。期間我聽到佢地兩個有講有笑，好似聽到話——

「啊？而家有啲似我地大學時一齊衝paper。」李Sir

「係啊！嗰時雖然辛苦但係好開心。每次做paper都係你幫我執埋啲手尾。」Miss。

「就好似而家咁囉！抵請食飯啦呢次！」李Sir

「唔走你數啦！」Miss。

我慢慢喺枱上面坐返落嚟⋯⋯

我好似部電腦咁就嚟hang機。當我比杰少呢件事仲燒緊、我仲掛心琴晚同Miss嘈交呢件事、李Sir疑似趁機介入我同Miss嘅關係⋯⋯種種嘅事情好複雜！好似代表緊唔同嘅味道，我個腦處理唔到！而家呢一刻，仲要比我見到Miss同李Sir兩個咁合拍做嘢？

我所喜歡嘅人，點解一晚之後會變得咁遠？我挨住堵牆嘆氣。呢堵牆隔開咗我同Miss， 我感到好孤獨無助。





係，我始終都係Miss嘅學生。我幫唔到佢實務嘅工作，我解決唔到佢工作嘅煩惱。我最多煮飯比佢咋！！

我幫唔到佢，佢就搵第二個男人幫佢。

而我，佢男朋友，就比麻煩佢。

= = = =

我唔知自己hang咗 機幾耐，當我回神嗰時，先知道Miss喺教員室行咗出嚟。

「你返咗嚟嘅？」Miss一面倦容

「返嚟溫書嘛。」我喺座位離開，正想同佢講：「Miss，我琴晚⋯⋯」





「唔傾呢啲嘢住。我仲忙緊。你溫完書唔洗等我啦，我仲有大把嘢要做。」Miss講完就好匆忙咁走咗，去咗校務處度。

佢睇唔到我有幾擔心、失望、焦慮同憤怒。Miss呢一刻只有工作。

哈⋯⋯好諷刺啊。杰少件事你怪我冇即刻關心你，咁而家呢？！我嘅感受呢？邊個嚟關心我呀？

呢個時候，球場上有一聲哨子聲，我見到李Sir召集成班隊員噏下嘢，然後佢地就散晒。成間學校得返我、Miss、李Sir，仲有——

.

「點呀？匡哥，問到未呀？」

杰少條仆街仔！

= = = 





ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師