真人真事改篇﹕師生戀﹕《最接近的陌生距離》: 第三十九章之二

深夜，Whatapps。

「盈盈，你瞓咗未？」（01:25）

「我瞓唔著。我好掛住你。」（01:35）

「今晚嘅事對唔住。我呢個男朋友做得好差。」（02:00）

「盈盈⋯⋯」 (03:00)





= = = =

第二日，星期六。

基本上我掛心到瞓唔到。最後瞓著時間應該係清晨五點。當我醒返時係朝早八點，被電話嘅訊息聲嘈醒。

「我冇事。」（08:10）

Miss Whatapps我，唉⋯⋯都好嘅，仲肯覆我。我稍為放心咗少少。





嗶嗶——！Miss又嚟一段訊息。

「我今日返學校做嘢。陪唔到你，sorry。」（08:11）

我覆返Miss叫佢加油，但其實我係好想見佢。於是我換咗件校服就趕返學校。

= = = =

星期六嘅學校除咗有課外活動外，仲有籃球隊嘅練習。自從我被周Sir革走之後，我就冇心機再練波。李Sir都有邀請我加入返嘅，但我唔多鍾意李Sir，所以婉拒咗。





唉⋯⋯好地地做咩撞到籃球隊練波架？即係我會見到———

.

「匡哥匡哥匡哥！！」

會見到杰少！

.

條仆街仔一見我返嚟，就波都掉埋一邊衝埋嚟。我見到佢而家呢個樣，我心底嘅火又開始燒！佢真係唔覺得佢今次搞著我同Miss! 自私到一個點！

「點呀？係咪特登嚟同我講有好消息呢？」

理智神經被拉扯得好繃緊。諗起Miss受嘅委屈，好想即場開鳩佢拖！





杰少見到我冇出聲，就傻笑打完場：「我知！需要啲時間處理嘛！冇問題！冇問題！細佬慢慢等！」

我抖咗啖大氣，忍住燃燒中嘅怒火。我呢一刻仲念兄弟情我先唔即場爆佢一鑊咋！杰少應該知我唔多對路，所以搵個藉口走人，算佢識趣。

今日成間學校只係得籃球場練習，全校得籃球隊嗰十零人，而老師就係得Miss同李Sir。教員室冇其他老師，就表示冇是非、冇閒言閒語，所以我估計Miss都喺教員度做緊嘢。

我行到教員室前，正想入去之際，剛好李Sir喺入面出嚟，擋咗我去路。李Sir對我微笑，但今次有少少唔同。

「喂，同學。你唔入得教員室喎！」

李Sir唔係特別為難我，亦都唔係揸正校規唔比我入，似乎佢想同我開玩笑，報返上次我唔比佢入課室嘅仇。

「我嚟搵Miss Wong。」我今日食咗火藥咁，真係冇心情同佢開玩笑。





我想喺成旁邊攝入去，但李Sir又擋住。呢下我啲怒氣就到臨界，強迫自己冷靜咁講：「讓開啦！」

李Sir搖搖頭，一面愛莫能助樣，佢話：「Miss Wong 12點前要交到份考卷上去。而家佢衝緊。我唔想有人打搞佢。你有咩事可以搵我，我會幫佢處理。」

我聽到一刻，我吃驚到個腦即刻冇血到！佢講啲嘢根本就好似男朋友咁！我嚇到又驚又嬲。

可惡！你咩身份呀！

「幫幫手，唔好入去煩到盈盈啦！」

盈⋯⋯盈盈？！盈盈你叫架咩？！

「你講咩盈盈呀？」我忍不住，語氣變得好差。

李Sir微笑，嘲笑自己話：「哎呀！又口快快添！比佢知道咗實死！」但唔知佢呢下係嘲諷自己定係串緊我。





佢繼續話：「Miss Wong呢排唔開心呀。比佢快快脆脆搞掂份卷仲好啦。一係你喺教員室外面啲位溫住書等佢啦。」

我贊成唔好煩到Miss，所以我同佢合作，坐咗喺門口外面嘅位度。李Sir正想走時，我追問一句：「你又知Miss唔開心嘅？」

「見你係佢學生，我先講咋。考卷成日比人彈啦。仲有其他立雜嘢、活動統籌，聯校會議咁囉。唉，佢愈來愈function唔到，啲嘢愈做愈甩。都唔知佢咩事。」李Sir一面憂心。

「我意思係你點知？佢點同你傾？」

「就琴晚之嘛！」李Sir呢一句令我大吃一驚。但我唔可以表現得太激動，否則實會穿煲。

李Sir繼續講：「佢喺電話喊晒。唉⋯⋯」

「除咗工作，仲有冇講啲咩？」我內心嘅不安擴大緊。





「冇傾咁多。呻完工作嘢，佢就收線。不過睇佢今日隻眼又腫又有黑眼圈，佢九成通宵做嘢。」李Sir停一停，繼續講：「唔傾住。我都大把嘢做。你乖乖地溫書啦。」

= = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師