真人真事改篇﹕師生戀﹕《最接近的陌生距離》: 第三十九章之一

「你記唔記得你lunch嗰時第一句問我啲咩？」

「⋯⋯」

「你問我做咩要鬧杰少，你怪我搞到杰少好嬲。」

「⋯⋯」

「你問我係咪冇得傾？係咪眼白白由得佢死？」





「⋯⋯」

「你不斷提佢嗰個係你兄弟。但你有冇諗過，我都係你女朋友呀？」

「⋯⋯」

「我亦都係你地班主任呀！你地有冇尊重過我架？杰少冇當過我係老師呀！佢覺得所有要求都好理所當然呀！阿嫂前阿嫂後！佢想情緒勒索我呀！」

「⋯⋯」





「自從佢知道咗我同你拍拖之後。佢啲態度就愈嚟愈差！愈來愈難教！我覺得自己好失敗呀！」

「⋯⋯」

「杰少屋企今個月剛剛拎綜援架！佢逃學返工真係為養家架咩？定係佢為咗女朋友呀？你有冇問過佢呀？」Miss喊到扯晒哈：「仲有！佢公然咁用粗口鬧我呀！我初初只係提佢再唔返學就會比人記小過咋！佢同你點講呀？係咪話我不可理喻呀？」

條仆街仔講啲唔講啲？！呢刻我已經嬲到想即爆鳩杰少！

「而你⋯⋯你唔係第一時間關心我有冇事！你只係關心緊你嘅兄弟呀！」





Miss伏喺飯枱度大喊！呢刻我心情又傷心又嬲。我比自己兄弟咁過咗一幢⋯⋯可惡！我信晒條仆街仔添！呢刻我冇嘢好講。

我以為我可以喺Miss同杰少之間拎個平衡，但原來我不知不覺間係企咗喺兄弟嗰邊。原因係嗰一刻我當咗佢係老師，認定Miss係有能力解決杰少嘅問題。但我忽略咗我始終都係佢男朋友！

可惡！偏偏呢個時候我先明白頭先Miss不斷吶喊我聽唔聽到佢講啲咩⋯⋯佢唔係想聽我會唔會幫杰少，佢好卑微咁要求我做返男朋友應該要做嘅事——盈盈今日最需要嘅係我！需要我嘅關心！

Miss喊完一輪，已經喊到冇晒力，抽住泣講：「我做咩都係錯。」

「⋯⋯」

「我想教好學生都被人鬧，被人投訴⋯⋯」

「⋯⋯」

「份考卷點出都係錯，我以為係上司針對我⋯⋯」





「⋯⋯」

「後來我發現，但原來真係我錯。」Miss托住個頭，佢成個人嘅能量已經用盡：「我唔知自己發生咩事呀！我成個人function唔到呀！」

「盈盈，對唔住。」我心好痛。唔止杰少嘅事，工作壓力已經令佢爆晒煲。

Miss抖咗幾下大氣，望住我同家姐苦笑咗幾聲，就企咗起身：「Sorry, 呢餐飯真係好好食。但我食唔到⋯⋯」

「盈盈⋯⋯」我已經知佢想點。

「我想返屋企。呢個星期打搞晒，唔好意思。」Miss鞠躬拎嘢準備走。

呢個時候我好想陪住佢，但家姐對我擰晒頭咁，示意我呢刻最好比啲空間Miss。我只好無奈咁睇住Miss好傷心咁離開。





返埋飯枱度，我覺得我個人同靈魂開始剝離緊。每次我同Miss個關係出事時，我就有呢種感覺。

「細佬⋯⋯細佬！」

家姐叫咗我唔知幾耐，當我回到神嗰下見家姐幫我抹緊眼淚。嗯⋯⋯我喊緊。

「唉⋯⋯」家姐坐喺我旁邊嘆氣：「第一次？」

「咩呀？」

「第一次嗌交？」

「嗯。」我點頭：「而家我唔知點算。」

「你頭先好hurt盈盈呀。」家姐好似冇晒符咁。





「我知呀⋯⋯家姐，我好驚呀⋯⋯」到我大喊出嚟：「我好驚會分手呀！」

今次嗌交，就好似做咗一場掃描咁。將我同Miss嘅問題掃晒出嚟。我同佢始終都有身份上嘅矛盾。彼此嘅位置唔同，對彼此嘅期望亦都唔同。

更可怕係，有啲矛盾無法用熱戀嘅激情淹過，最多係扮見唔到。咁更何況係過咗熱戀期之後？

我同盈盈個將來⋯⋯會係點呢？

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師