真人真事改篇﹕師生戀﹕《最接近的陌生距離》: 第三十八章之四

「小過嗰度，我同佢講——」

「——我講咗話唔得呀！」Miss冇聽我講完就截住我：「就算我肯幫，其他老師都唔會放過佢架！你有冇聽我講架？！」

Miss終於忍唔住，開始飲泣。

「我知呀。我已經同佢講咗——」又比佢爆咗先，搞到我條氣唔多順。但點都要忍住。

「咁佢而家仲想點呀？！」





「算啦⋯⋯冇嘢。」三番四次咁樣比佢截住晒！真係講嚟都冇意思！

「佢仲想點呀？！」

「你都唔幫啦！仲問嚟做咩唧！」

Miss好錯愕我竟然呢一刻發佢脾氣。

「我同你一齊就嚟兩個月。你第一次為咗朋友鬧我！」Miss抹一抹眼淚，佢扒咗啖飯想分開下注意力。





「盈盈⋯⋯我唔係鬧你。我都比佢迫埋嚟，我唔識拒絕佢呀。」唉⋯⋯要體諒佢嘅。我試下氹咗佢先啦。

佢邊喊邊夾嘢食，仲對家姐強顏歡笑話：「嗯⋯⋯呢個⋯⋯好味。」直頭想block晒我，明顯唔想同我講任何嘢。可唔可以唔好咁呀！

「我有拒絕杰少架。我唔係幫晒佢架。」

「呢個都好食⋯⋯哈⋯⋯子瑜你不如教我整呀。」Miss繼續扮聽唔到。

「盈盈可唔可以聽下我講？」我感覺我自己都到咗臨界。





「子瑜呀，今朝搞到差啲火燭真係唔好意思。」Miss繼續扮食飯，我⋯⋯終於忍唔住——

「真係有你冇人講。」

Miss好似被冰封咁，成個人凍僵咗。

家姐做出「呢次仆街啦」嘅表情，示意我唔好再講落去。但衝動底嘅我點會撳得住自己呀。

「杰少講得好啱！真係得你講冇人講呀！」

家姐嚇到瞪大對眼，然後成間屋未試過咁靜咁老尷。但怒氣難消嘅我繼續噴落去！

「今日我差啲為呢件事同杰少打交呀！我好難做呀！」

「一係兄弟，一係女朋友。你自己揀！」





「我唔會咁做呀！我知你有難處！你覺得我冇體諒你架咩？我唔識處理晒你同杰少兩邊嘅事咋！」

「咁幫晒杰少就最簡單啦！唔洗當我係你女朋友啦？」

「我唔係呢個意思。你可唔可以聽下我講啫？！杰少迫緊我呀！會冇兄弟做架！」

「所以你就迫我啦？我好蝦啲啦？係唔係？其他老師蝦我都算！連你都咁樣？」

「唔係呀！你聽唔聽到我講緊咩架？我好難做呀！」

「我今日唔開心呀！你又聽唔聽到呀？！我唔係要聽你講呢啲呀！」

「我同你唔應該為杰少呢條仆街仔嗌交架！？你又聽唔聽到呀？」





「我今日喺學校被同事蝦——」

「妖！你收聲呀！！我唔會幫杰少呀！我唔會幫佢！唔會！唔會！唔會啊————！！你聽唔聽到呀——！！」

成個世界，靜晒。

「噫——！」Miss即刻低頭掩面飲泣。

家姐掩埋塊面，擺明冇眼睇。而我，冇錯鬧完係舒服晒，但見到Miss愈喊愈犀利，我就知我奶晒嘢。

Miss抬起頭，喊到眼鼻都腫晒，家姐見到佢咁立即埋去安慰佢。Miss忍咗一口大氣，就哽咽話：「其實⋯⋯嗯⋯⋯嗚⋯⋯其實你知唔知佢今朝點對我架？杰少完全唔當我係佢嘅老師呀⋯⋯嗚⋯⋯佢唔尊重我⋯⋯仲講明一定要我幫佢！好過份呀！」

我好嬲。

我好嬲杰少。





當我記起杰少嘅性格，我就更嬲更嬲！

「佢脾氣係點你好清楚架！所以佢今朝點對我，你都好清楚！」Miss一雙淚目望住我：「我係你女朋友啊！你真係唔知我受咗好大委屈咩？」

佢呢句令好似一棍打我個頭度，我立時清醒返。

「我已經⋯⋯噫⋯⋯嗚⋯⋯我已經唔提我工作受咗啲咩委屈。我一直都唔會介意你幫唔到我解決工作嘅問題。嗚⋯⋯你係我學生⋯⋯但係——」

.

「你亦都係我男朋友啊！」

.





「——杰少呢件事，你係為咗佢先！你冇第一時間關心我啊！！」

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師