真人真事改篇﹕師生戀﹕《最接近的陌生距離》: 第三十四章之三

「吓？」我失望到叫咗出聲：「講好咗今日放學睇戲喎！」

教員室門口。臨近Lunch，我以幫Miss拎簿為由，去拎Miss整比我嘅愛心Lunch Box。

「喂呀！唔好咁大聲啦！」Miss抱怨咁講，然後佢望下四周圍冇人後就做返女朋友對我又撒嬌又say sor咁講：「我份考試卷上司唔過呀。佢嫌我出得易呀！今日一定要出埋先走得。」

「咁冇計啦。」我好失望又無奈咁攤一攤手。鬼叫女朋友係我班主任咩。

「喂呀⋯⋯扁晒嘴嘅？」Miss見我咁愁，忍唔住問。





「冇！邊有。」我心諗邊夠膽講有呀。

Miss鼓一鼓起個腮，然後佢望下走廊頭，又望下走廊尾。佢就甜笑下，話：「低B仔！」

「嗯？」

我反應唔嚟！佢已經「嘖！」一聲Kiss咗埋嚟！

「喂！Miss!學校喎！」今次竟然係我講呢句說話！





「嘻⋯⋯嘻⋯⋯咁你開心返未呀？」

「嗯！」我都sweet咁笑。

「咁快啲上返去食飯啦！」Miss將Lunch box遞比我：「我做埋啲手尾先上嚟。班長你要幫我管秩序喎！」

「係係！知道！」

「嘻⋯⋯乖仔！」





「咁⋯⋯課室見。」

「課室⋯⋯啊等等！」

「嗯？」

「低B仔你爸爸媽媽仲未返嚟香港？家姐呢？」

「老豆老母有排都未返呀。家姐呢排一係住hall，一係喺男朋友度。」

「嘻嘻⋯⋯我呢⋯⋯」Miss忽然甜笑：「今晚好想老公煮飯飯比我食呀。」

我一聽就開心到爆，爽快答：「嗯！好呀！」

但喺我返去課室途中，諗多兩諗⋯⋯頂！放學仲要買餸！





= = = =

「哈⋯⋯哈⋯⋯」我忍唔住笑。當我見到Miss而家呢個樣時，我就更加忍唔到笑。

話說，剛剛食完飯，仲未打午息鐘，Miss就搞下班務要我地交下個月飯單。佢諗都冇諗過，當全班仲慢慢抄返張飯單時，我竟然係第一個出嚟交！

「今次好準時喎！班！長！」Miss特登將班長兩個字叫得好大聲，以表示不滿。

我早交飯單即係表示我受夠佢啲恐怖Lunch Box。到底佢呢刻要用女朋友身份嬲我，定係用班主任身份讚我呢？我就係最鍾意睇佢呢下矛盾嘅表情！我下意識咁望去阿偉度，連阿偉都不禁驚嘆我咁公然地花式自殺！

Miss微微一笑，一面「我一陣就教訓你」嘅樣。佢收晒飯單後，就對我講：「班長，幫手收返晒全班飯盒。」

我攤攤手，都預咗佢會咁玩。我都識趣唔踩咁盡嘅。收晒啲飯盒後，Miss行去黑板前一面嚴肅，有嘢要宣佈：「上學期已經過咗一半。喺午息前，我想調一調班嘅工作崗位⋯⋯」





阿偉、杰少、阿波就御任咗科長同膳食等工作。呢個時間我不解咁舉手：「Miss Wong ? 咁班長呢？唔洗換人？」

Miss好奸咁嘻咗一聲，就對全班講：「大家覺得阿匡做班長做得好唔好呀？」

「好！」全班從未咁齊心過！

「恭喜你呀！班長！你成功連任啦！」Miss報復成功！滿足地笑！

喺我氣得咬牙切齒時，門外有人敲一敲門，叫咗聲：「Miss Wong! 行得未呀？」

我未反應過嚟，成班就起哄！

「啊——！男神呀！」「偶像呀！」「阿Sir幾時鬥波呀！」

唔洗問都知！係李Sir! 我好驚訝佢喺短短半日都唔夠，就吸引到成班同學！





睇佢個勢係嚟接Miss去食飯啦！可惡！當我冇到咁！我即刻離開位，擋住度門唔比佢入嚟！我唔客氣對住李Sir講：「唔係我地班唔入得嚟架喎！」

「哦？係架？」李Sir真心吃驚一下：「老師都唔得？」

「老師都唔得！」

「不過⋯⋯我都係你地PE阿Sir喎！」

「而家係PE堂咩！出返去！」我直接趕李Sir走！

點知喺我背後，Miss就叫道：「謝子匡！整蠱完李Sir未？」

我望返Miss，一面難以置信！你竟然為咗呢個男人而鬧我？！





鈴——！午息鐘響起。Miss同成班同學講再見後就走到門前，瞪咗我一眼，明顯佢鬧我咪咁幼稚。然後轉個頭就同李Sir講：「Sorry呀。阿匡比較難搞一啲。」

「唔緊要啊！咁先係年青人呀！⋯⋯我地去邊食呀？」

「哈⋯⋯帶你去食好嘢！」

我就目送佢地離開，見到佢地嘅背影，內心好囉囉攣。

「哎喲——！」阿偉走埋嚟，特登撚把死人聲，摸緊我髮頂。

「大件事囉——！」然後係杰少，又摸緊我頭髮。

「綠油油一片囉——！」阿波走嚟恥笑。

「你班仆街仔！」我作勢逗佢地雀，佢地即刻鳥獸散！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師