真人真事改篇﹕師生戀﹕《最接近的陌生距離》: 第三十四章之四

「啊——！」黎Sir雙手按頭，作痛苦狀大叫。位置係訓導室。

「咪咁大聲啦！唔隔音架傻佬！」我頂佢唔順，堂堂一個老師竟然喺學生面前軟弱成咁。

黎Sir本來約我傾「將功補過」計劃嘅事，星期六我唔只參加活動，仲救人一命。件事傳到去校長度，校長好開心。加上成個活動我好落力，所以校長建議老師記我一個大功！咁我可以直接抵銷一個大過啦！

唉！不過黎Sir一見到我就冇講正經嘢，就狂呻！

「你見唔見到呀？Miss Wong同李Sir一齊Lunch! 係一齊Lunch呀！ 李Sir剛剛第一日返工就約到Miss Wong 食Lunch ！ 我⋯⋯我⋯⋯啊！我識咗Miss Wong兩個幾月，佢show 都唔show我呀！冇啦冇啦！」佢雙手抓頭，啲頭髮就嚟好似假髮咁成塊頭皮扯出嚟。





「好心啦！你堂堂訓輔主任喎！睇開啲啦！」我雖然咁講，但我心情同佢一樣。老實講，我仲慘啦！睇住自己女朋友同第二個男仔食飯呀！

「匡少⋯⋯我可以點做呀？」黎Sir真係當咗我係朋友咁。

我心諗，李Sir冇可能對Miss冇意思！對我威脅都好大！雖然黎Sir都係我情敵，但我地而家有共同敵人。所以我一定要同黎Sir結盟，不過⋯⋯唉，結咩盟呀！睇見黎Sir成隻喪家狗咁，佢點同李Sir鏈？而且黎Sir唔係周Sir嘛，唔可以教黎Sir用權力搞到李Sir喺工作上唔順利嘛！

不過⋯⋯又唔可以比李Sir成日咁輕易同Miss一齊喎。可以點呢？

⋯⋯啊！有計！





「你算把啦黎Sir！ 咁嘅款學人溝女！人地李Sir連男仔都冧得掂呀！」

「係⋯⋯！」

「係你個頭！你個態度係咁呢，就打死一世飛機呀！」

「咁我可以點呀？同李sir一樣做運動明星？我唔得架喎！」

「我同你講呀！媾女大忌係將自己copy成同情敵一樣！你冇晒自己嘅特質，條女點會對你有印象呀？」





「咁又係⋯⋯」

「但唔洗愁嘅！第一，你要有自信先。麻煩，執下外表。衣著談吐呢啲！仲有食嘢唔好講嘢周圍噴！睇多啲黃子華，訓練自己幽默感呀！」

「係⋯⋯」

「第二，『諗你有嘅嘢，唔好諗冇嘅嘢？」估唔到偉神金句都有用喎！

「即係點呀？」

「慢慢諗啦！嗱！第三，好緊要架！留心啲聽。」

黎Sir哄個耳仔埋嚟，我好認真咁講：「同李Sir做好朋友！」

「得咩？」





「得呀！因為⋯⋯」

然後我提出我嘅分析比黎Sir聽。據我觀察李Sir係典型世界仔，要R fd唔難。而佢初入我地貴校咩都唔識，如果有訓輔主任做明燈，李Sir一定會痴住黎Sir。

「咁你地熟咗。下次李Sir同Miss Wong 食Lunch, 咁未預埋你囉！」

「係喎！」黎Sir恍然大悟咁叫：「係好方法喎！」

「咁抵送多個優點比我啦！」

「多謝匡少！」黎Sir講完，就對我擺咗個拳頭出嚟，叫咗聲：「Brother!」

我冷笑咗下，叫：「Brother !」





拳碰拳！

Miss絕對會好介意我做埋啲幼稚野搞李Sir， 我同李Sir唔同一個高度，硬撼必死。所以我需要一個同李Sir同一高度嘅傀儡，我就做木偶師背後操縱住。呢個傀儡就係黎Sir！

黎Sir絕對唔會係Miss鍾意嘅類型。所以我好放心將佢擺喺Miss身邊。更重要係，我要過一兩招比黎Sir，等佢慢慢成為李Sir威脅！我就係要李Sir綁手綁腳，要媾Miss都唔會咁簡單！當李Sir覺得黎Sir係威脅時，佢就唔可以專心媾Miss。

總之就——

.

.

Let Them Fight！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師