真人真事改篇﹕師生戀﹕《最接近的陌生距離》: 第三十二章之一

呢次仆街啦﹗﹗ 陳婆婆撼落地下，成頭都係血！老人家跌一跌絕對唔講得笑！雖然之前跟社工行山，有學過一兩招急救，仆親擦傷呢啲我Ok處理到呀！但要我處理嚴重傷勢，我真係淆晒底呀！我惟一可以做到嘅係冷靜咗自己先！

而家成地血，濃濃嘅鮮血喺地上嘅污水上緩緩雲開。陳婆婆成個人面朝向地，郁都唔郁下，唔係暈咗呀嘛？喺我唔知點算時，蟲蟲唔理環境有幾混亂同污糟，就行上去睇下婆婆點！

蟲蟲伸手探下婆婆頸動脈後就話：「仲有脈搏！」然後佢輕輕拍一拍陳婆婆，叫道：「婆婆！婆婆！」

「唔⋯⋯？」陳婆婆身體微微郁動。我同蟲蟲見到後都放心咗少少，起碼佢唔係暈咗先。

「係咪乖孫呀？」陳婆婆虛弱咁講。





「婆婆，我係蟲蟲呀！」

「蟲蟲呀？⋯⋯哎吔⋯⋯我個頭好痛呀⋯⋯」陳婆婆在自然咁想自己起返身。

「阿匡！」蟲蟲示意我快啲過嚟幫手。

我唔使佢叫已經行埋過去扶起婆婆。呢個時候蟲蟲就話：「帶婆婆出廳坐低。我去搵敷料止血！」講完，佢已抽咗半卷廁紙要我幫手撳住個傷口，然後慢慢扶婆婆行返出廳。佢傷勢唔輕，撳住傷口嘅廁紙已經完全滲晒血，搞到我一手都係！

「婆婆，慢慢坐低。」我扶住佢坐喺張椅度，扶正佢個身，又話：「有冇邊度唔舒服？抖氣順唔順呀？」我努力回憶起急救堂學過嘅嘢。





呢個時候蟲蟲身水身汗埋嚟，佢喺衣櫃度拎咗啲乾淨嘅衫，好無奈同我講：「婆婆屋企冇first aid, 得呢啲咋。」

然後蟲蟲示意我拎開手，佢將件衫疊埋咗變成個厚墊輕輕撳落婆婆個傷口度：「要止咗血先。阿匡幫手報警！」

「係！」我叫道，估唔到怕黑又怕狗嘅蟲蟲呢一刻竟然唔怕血，手勢仲好純熟嘅處理婆婆傷口。

我行埋一邊拎部電話準備報警時，個電話震咗一下，彈咗段警告⋯⋯屌！得返5%電！

唔理啦！報咗警先！好彩吳姑娘有教路，打三條九唔好慌，要即刻講要救護車服務，咁樣會慳返好多時間。報完警之後，我即刻打比黎Sir報告呢件事。





「嗱！你唔洗驚。婆婆情況點，清唔清醒⋯⋯」

屌，佢緊張過我囉！我都未講個情況出嚟，黎Sir已經假定咗我淆晒底，一輪嘴要教我點做。

然後⋯⋯⋯嗶！！部電話用埋最後一格電！！頂呀！我連婆婆地址都未講！點班多啲救兵嚟呀？！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師