真人真事改篇﹕師生戀﹕《最接近的陌生距離》: 第三十章之五

為咗令Miss安心起嚟，我好坦白咁將呢幾日同蟲蟲相處嘅經過話晒比Miss知。

我知⋯⋯我知⋯⋯咁做其實好有風險！隨時會衰多一鑊。不過，一來Miss好信任我，二來Miss真係一個好成熟嘅女性，對佢坦白一定係令件事最好。所以我將蟲蟲想約埋我食早餐嘅事都話埋比Miss知。我當然同Miss講唔會應承蟲蟲，所以就約實咗Miss星期六一齊返學。

同Miss喺課室溫馨咗一陣，見時間唔早就返歸了。

之後嗰幾日生活如常，繼續同Miss偷返學時間拍下拖。講個好消息比大家，Miss整嘅Lunch Box終於擺得入口啦！Miss終於學精咗，佢剩係煮咗個白飯，再淋現成嘅即食日式咖喱汁。如果咁都難食嘅⋯⋯我惟有認命啦。

至於蟲蟲約食早餐方面⋯⋯唉，因為我唔想令Miss唔開心，所以呢幾日我冇再去「空中花園」。咁約食早餐嗰件事就不了了之。其實我好憎自己咁冇交代，但冇法，喺Miss同蟲蟲兩個當中，我一定以Miss為先。希望蟲蟲唔好因為咁而嬲咗我。佢呢啲痴線妹做朋友係好過做敵人嘅。





但話雖如此⋯⋯唔知點解，我擔心嘅唔係蟲蟲會做咗我敵人。我擔心咁樣做真係會令蟲蟲唔開心。

= = = = =

星期六，義工服務日。

「Miss早晨！」我落到屋企樓下，Miss已經喺𨋢門口等緊我。呢個時候我仲𡁻緊件蛋糕，食到成嘴都係cream。

「咁乖仔有食早餐呀？」Miss用紙巾幫我抹嘴上面嘅Cream, 佢笑得有啲安慰，因為我終於聽佢話，食咗早餐先返學。





由於係星期六嘅關係，Miss衣著冇平時嚴肅，但因為要返學校做嘢，佢又唔可以著好性感嘅去街衫。今日嘅佢只係著咗牛記配件tee，但係人靚著咩都靚，Miss以簡單嘅配搭已經可以著出青春嘅韻味。

「咁我份早餐呢？」Miss打趣咁講，向我撒嬌。

我即時被佢問到口啞啞，只係識得傻傻咁笑。

Miss反一反我白眼，就橋住我手，話：「行啦！同我去七仔買早餐啦！」

「下次我整早餐比你呀！」





「你起得到身先算啦！」Miss輕輕搣咗我手臂一下。

喺行去七仔途中，Miss全程橋實我手。而佢嘅步伐好輕快，仲一步一跳咁，十足十啲十幾歲嘅少女。佢可愛嘅桃唇微微嘟起，仲哼起歌嚟添。

「你做咩好似好開心咁嘅？」

「同你一齊最開心囉！」Miss好似貓咁嗲人，額角輕輕咁擦我肩膀，再說：「今日義工活動其實唔使我帶，我只係想返學校出考試卷。所以我會輕鬆啲，可以隨時走。」Miss講講下，流露出一種期待：「我地好耐冇行街啦！不如今日放學我地去睇戲呀！」

「好啊！」我興奮到彈起，數下手指，對上一次行街拍拖已經係「大戰狗公周」之前！

「不過，經過周Sir件事之後，學校高層好關注我嘅私生活。所以⋯⋯我地出街拍拖真係要好小心。未必可以當街拖手。以後攬同錫都唔得。」講到呢度，剛好出咗大街，人流都多咗。Miss好快就放開我手臂。

「唔緊要啦！最緊要可以同你一齊！」

「嗯！」Miss點一點頭，又話：「我想再安全一啲，我地不如直接喺戲院等。」





「好啊！」

「咁到時我買飛先啦！」

講講吓，我地已經到咗七仔。 由於時間尚早，Miss買咗個包之後，就邊食邊喺七仔入面打書釘。佢睇緊嘅係一本時尚雜誌，介紹緊啲名牌手袋。我見到佢雙眼睇到發晒光咁，就好奇有咩咁好睇。

「你睇到眼定定咁嘅？」

「低B仔你睇下！」Miss向我展示內容，指住我覺得好普通嘅手袋，牌子係H字頭⋯⋯屌，唔識讀。好似讀Her唔知乜鳩。

「你想要呀？」

「係呀！」Miss抱住本雜誌，就當擁有咗個手袋咁，繼續講：「有個Hermes袋返工，開心好多架！」





「咁我買比你呀！應該唔係好貴唧？」

Miss聽完即刻笑咗出聲：「我都買唔起呀！你睇下幾錢？」

我一睇⋯⋯仆街⋯⋯六位數？我六舊水就有！

我呆咗咁望Miss。

傻架啲女人？六位數買個袋？

「唉⋯⋯又要交租，水電煤呢啲⋯⋯幾時可以買到呢？」Miss嘆咗口氣就將本雜誌擺低咗。

唔知點解我見到呢個畫面，我內心有一種奇怪嘅感覺。當刻我唔知呢個係咩感覺⋯⋯但估唔到喺不久之後我就知道呢一份到底係咩感覺。

Miss之後去咗飲品櫃嗰度揀飲品。而我就去打書釘，揀咗本Game書嚟刨。





正當我興奮緊嚟緊會有新Game時，一把女仔聲好似從天而降咁劈落嚟，打擾咗我讀書嘅雅興。

「賤人匡！」

我應聲回頭一望，瞪大眼叫咗聲：「痴線妹？！」

出現喺我眼前嘅人，竟然就係蟲蟲！

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學