真人真事改篇﹕師生戀﹕《最接近的陌生距離》: 第三十章之四

「我真係好惡咩？」Miss笑得好大聲，就話：「哈哈⋯⋯你地四個驚到⋯⋯哈哈哈！！」

我唔知而家係咩局面，只能夠點頭。

「咁你而家知驚未呀？」Miss輕輕咁彈我額頭一下：「激嬲我啊嗱！」

唔係吓話？即係Miss扮嬲？整蠱我地？

只見Miss佢放鬆晒咁呼咗一聲，剎那間佢個女朋友屬性就歸返位，就笑住話：「一次過處理晒我擔心緊嘅問題！哈——！你快啲讚我叻啦！」





「⋯⋯Miss，我唔係好明。即係⋯⋯」

「第一！」Miss比出食指：「關於向阿偉佢地公開關係嘅事，雖然唔係信唔過佢地。不過始終都要對佢地下馬威！」Miss翹埋雙手，嬲嬲地講：「你Lunch件事搞到我好嬲呀！你地仲咁夠膽死喺我堂傳紙仔？！我講明揸正嚟做唔係講笑架嘛！一來我唔想因為我同你拍拖，令佢地真係當咗我係朋友。日子耐咗佢地一定會恃熟賣熟！我唔想因為咁影響到工作呀！二來我要再嚇多波波一次，等佢唔好咁『真心』呀！」

連阿偉都比Miss震懾到，睇嚟Miss呢一著好成功。

「第二！」Miss再彈我額頭一下：「你地成班個個都咁懶散，點考試呀！咁啱晒啦，你話冇地方溫書嘛！而家全班陪你喺課室溫習！簡接解決咗全班應試氣氛嘅問題！哼！你都冇得借啲意去見蟲蟲啊！」Miss笑得好洋洋得意。

「第三！」Miss兩隻手拍落我塊面，再將我個樣捽到成隻豬頭咁。佢話：「我唔咁樣做，你會驚咩？吓？！扮溫書去見蟲蟲呀嗱？吓？！講！你同佢而家係點架？你係咪想追人？吓？！你仲有幾多嘢係瞞住我架？」





一石三鳥，呢個女人真係又聰明，又唔簡單。

「隊⋯⋯隊⋯⋯唔志⋯⋯⋯嗚⋯⋯嗚⋯⋯我冇⋯⋯嘢瞞你呀⋯⋯嗚嗚⋯點會追佢呀⋯⋯」Miss係咁捽我塊面，搞到我講嘢都含糊起嚟：「嗚⋯⋯嗚⋯你仲嬲緊我？」

「哼！你仲好講？」Miss鼓起兩腮，話：「你講就講溫書，原來係溫女！我唔介意平時義工小組你同蟲蟲嘅相處！但我估唔到你同佢私下原來有咁多交流而我係唔知呀！」

Miss放開咗我，我塊面比佢捽到有啲痛。

「我同蟲蟲只係普通朋友咋。我都冇嘢瞞你。」





Miss好快咁接住講，好似把刀咁劈咗落嚟：「女人嘅直覺，你會明咩？！」Miss欲言又止咗停一停，再講：「其實⋯⋯我知我唔應該嬲你！但我控制唔到！我更嬲嘅係⋯⋯」

當我以為Miss會嬲我同蟲蟲嘅關係發展得太快時，又點估到佢會係咁樣講：「我更嬲嘅係自己竟然有少少介意！」

Miss講講下，情緒都波動起嚟，兩眼都通紅咗：「我自己都覺得好羞恥！我係老師呢架嘛！點會介意呢啲嘢呢？當我嬲你嘅時候，就覺得自己好似啲野蠻女友咁！我唔鍾意咁樣！我唔可以⋯⋯唔可以嬲你⋯⋯但係⋯⋯我同時又係你嘅⋯⋯」Miss忍耐住，佢遊走於老師同情人之間，就好似跌咗落水咁不斷掙扎。

我其實明佢講咩，今日嘅事令佢唔知要用咩身份去應對。用老師身份處理，頂多怪我冇規矩咁撩對面校嘅女仔。但女朋友身份就唔同，女朋友會妒忌。而呢份妒忌亦會影響佢身為老師嘅專業。我意會到呢度時，我內心愧意大作，連忙上前幫Miss抹眼淚，再抱住佢：「盈盈對唔住，你好專重老師呢個身份，係我令你難做。不如我退出義工小組啦，我以後亦都唔會再見蟲蟲。」

「唔得！」Miss好堅定咁講：「你仲要將功抵過架嘛！義工小組係唔可以退出！你嘅成長係最重要！」

Miss慢慢止住啲眼淚，又話：「低B仔，你要記住。我唔會阻止你識朋友。就算你同蟲蟲繼續來往都好，我都唔會阻止。我嘅要求好簡單，一定要令我覺得安心！唔好要我去估你地嘅關係！可唔可以認承我？」

「嗯！」我用力點頭。

「亦都唔可以講大話呃我！」





「低B仔唔會講大話！」

「仲有一件事。」Miss溫柔嘅雙手輕輕咁撫我面頰，一對淚眼楚楚可憐咁凝視住我，佢好認真咁講：「你一定要應承Miss, 唔可以喺感情上虧欠人！唔可以喺感情上傷害人！」

「嗯！我應承Miss, 我唔會喺感情上虧欠同傷害你！」

「唔係剩係我呀！」Miss:「任何人都唔可以傷害！包括——」

.

「——蟲蟲。」

.





Miss竟然連蟲蟲都想保護？搞到我一時反應唔嚟。

「答我呀！」Miss見我呆咗一陣就催促我。

「嗯！」我用力點頭，好堅定咁講：「低B仔絕對唔會喺感情上虧欠同傷害任何人！」

Miss嘻一聲破涕為笑，話：「乖仔。」然後Kiss咗我一啖。

呢一刻，我好似感受到Miss同一般嘅女朋友唔同。我冇諗過，喺呢件事情上，佢竟然冇再嬲我之餘，亦好似想教識我一啲嘢⋯⋯不過⋯⋯

Miss教嘅嘢，有時要過咗一陣先會明白。

有時要受下教訓先會深刻⋯⋯

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師