真人真事改篇﹕師生戀﹕《最接近的陌生距離》: 第三十章之六
我見蟲蟲個樣唔多友善，應該係嬲我一直都冇覆佢一齊食早餐嘅事！但我更擔心嘅係，佢會知道我同Miss約埋一齊返學！畢竟⋯⋯呢間七仔位置比較近我屋企，Miss嘅出現實在太唔自然啦！！呢種不安令我好自然咁瞄咗去飲品櫃嗰度——
Miss見到蟲蟲，成個人呆咗。佢一定同我擔心緊同一件事！
蟲蟲亦都好醒目咁捕捉到我個眼神！佢竟然下意識咁望咗去飲品櫃嗰度！蟲蟲同Miss因為咁而再一次打咗個照面！
Bullet Time又嚟啦！我好似感受到成個世界都進入咗Miss嘅思考空間！喺呢個電光火石之間，Miss一定要做啱反應先唔會穿煲！
Bullet Time結束。
Miss對住蟲蟲微笑點頭，唔講多餘嘅嘢，唔做多餘表情。呢一著應該令蟲蟲唔會有太大懷疑，蟲蟲亦都禮貌地向Miss禮貌點頭。
然後我見到Miss若無其事咁行去收銀比錢，眼尾都唔望我一眼，扮冇撞到我，盡量保持距離。
當我以為危險已過時，門口又有一個熟悉嘅人影出現！
「Hi! Miss Wong!」
係黎Sir！？
Miss都被佢殺咗個措手不及，連忙叫道：「咦？黎Sir? 你唔係揸車返工架咩？」
「架車拎咗去整呀。今日我坐巴士嚟。順手嚟七仔買早餐。」黎Sir仍然好腼腆，但同Miss講嘢時就好似冇之前咁緊張：「又咁啱嘅？可以喺返工前撞到你。」
我為咗唔好令黎Sir發現到我，我拿拿聲轉個身扮打書釘，用個背脊對住黎Sir。其間我聽到Miss嘗試透過同黎Sir閒談，令成個氛圍唔好咁老尷。然後我聽到收銀聲，應該係黎Sir買咗佢想要嘅嘢。
之後我聽到Miss話：「黎Sir, 我有啲電腦嘢想問⋯⋯」
黎Sir好雀躍咗回應，然後佢地嘅聲音漸漸遠去。唉⋯⋯Miss為咗唔好令我地穿煲，竟然犧牲咗佢自己。
不過又點會咁順利呀！
啪——！我原本揸住嘅書被蟲蟲夾硬冚埋咗，然後佢攝咗入嚟，嬲爆爆咁講：「呢幾日我等緊你覆我架。」
「唔覆你⋯⋯即係⋯⋯唔去囉。」我自己都覺得無賴。
我見到蟲蟲一面又嬲又失望，好似有一樣好重要嘅嘢本來失去咗，然後有機會搵得返。但最後嘅結果都係唔見咗嗰樣最重要嘅嘢。
「個個都係咁！」蟲蟲話中有話：「唔當我係一回事！」雖然佢壓低把聲，但被情緒影響下，其實把聲都幾響，之後蟲蟲粒聲唔出就走咗。
呢個時候我先知，佢係得自己一個。唔知點解，佢嘅背影有一種孤獨悲涼嘅感覺。令我有啲於心不忍。
於是我好快買咗包十支裝嘅珍寶珠追上前。呢個時候，Miss同黎Sir已經唔見影。喺我眼前嘅就只有蟲蟲纖細又孤單嘅背影。
「喂，痴線妹。」我從後面追上嚟。
蟲蟲瞄咗我一眼後，就哼一聲，再加快腳步想擺脫我。
「喂，聽我講先啦！」
「我唔係叫『喂』呀！我叫『蟲蟲』呀！」蟲蟲轉個頭嚟，鬧咗我一句：「得唔得都一句嘛！我真係咁唔值得人地尊重咩？！」
「Sorry 呀！ 蟲蟲！」我遞咗成包珍寶珠比佢：「我冇好好交代清楚，係我衰。」
不過蟲蟲見到包珍寶珠後又不為所動，冷哼一聲後就轉頭走。但行唔夠幾步——
——沙沙沙——！個天落起雨嚟。
蟲蟲即刻好狼狽咁用雙手擋住啲雨。但好快一個陰影罩住咗佢。佢抬一抬頭，表情有啲錯愕，應該心諗頭頂嘅遮喺邊到嚟。
佢回頭一望，我就笑說：「天氣咁涼再淋濕嘅話就麻煩架喇。我遮埋你啦。」
蟲蟲遲疑咗一秒，佢本來嬲緊嘅表情有微微嘅變化。之後佢咩都冇講繼續行。但今次冇頭先咁急，等我可以遮到佢。
趁呢個時候我遞咗包珍寶珠，再求多佢一次原諒。
「對唔住呀。之後嗰幾日我唔去得花園搵你。因為考試就到，Miss話咗小息同午息要留喺班房溫書。我又冇你電話，所以未覆唔到你囉。」
我講完之後個心硬係有啲唔舒服，好似將個責任怪咗落Miss度。
蟲蟲聽完之後都係冇任何表情同反應，但今次佢接受包珍寶珠，仲開咗嚟食。見到咁我就放心晒，佢應該原諒咗我。
過咗一陣，佢抱怨咁講：「你係咪唔識遮人架？」
「做咩呀？」
「你睇下我膊頭！」
我望去佢右肩，因為遮唔到嘅關係搞到淋濕晒。
「一定成日被女朋友鬧唔識擔遮！」蟲蟲輕聲咁鬧。
我又心諗⋯⋯我又真係未試過遮Miss喎！
咦？咁我嘅第一次雨中漫步嘅對象，未即係蟲蟲？！
「咁我把遮細嘛！一係你企埋啲啦！」
「你遮過啲啦！」佢一手捉住我擔遮嘅手腕，將把遮擔過佢嗰邊少少。
「你都企埋嚟啦！費事一陣比雨整濕又賴我！」同一時間我搭住佢膊頭，將蟲蟲拉近我身邊少少。
如是者，佢捉住我手，我又搭住佢。兩個人縮埋喺同一把雨傘之下踏上返學嘅路途。
咦⋯⋯個面畫好似⋯⋯好似唔係幾對路咁喎？
我同蟲蟲一啲嘢都冇講。可能彼此都覺得奇怪。但奇就奇在⋯⋯我同佢都冇即時抗佢。令到有一種古怪氣氛喺我同佢之間擴散。於我而言，喺呢個返去學校嘅途中，我腦中閃過嘅係蟲蟲相識嘅經過。赫然發現，我已經忘記咗初初嘅佢係有幾令我討厭。最深刻嘅，居然係佢正正常常同我相處嘅經過。
甚至乎閃過一啲，令我心底覺得開心嘅畫面——蟲蟲搗蛋可愛嘅一面。
我⋯⋯唉⋯⋯我到底發生咩事？
呢個時候，蟲蟲伸咗隻手出遮，明明仲有細雨都話：「停咗雨啦，唔使再遮我啦！」
然後頭也不回咁衝咗出去，跑到另一班女仔嗰度。嗰班女仔就係apple、冬冬同樂樂。
「哇！你塊面搞咩呀？」apple佢地語帶嘲笑咁講。
「咪嘈啦！行啦！」
蟲蟲橋實佢兩位朋友就急急腳走。走嘅時候不忘回頭望我一眼。
呢個時候我見到蟲蟲塊面原來紅到好似蘋果咁。
= = = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師