真人真事改篇﹕師生戀﹕《最接近的陌生距離》: 第三十章之三

放學嘅課室，得返我、Miss同埋阿偉佢地三個。我同阿偉佢地坐開晒，各自做緊功課。而我嘅位置正正坐喺老師位對面，所以我可以左右咁瞄一瞄佢地睇下佢地狀況點。

阿偉好從容。

杰少應該一早做晒嘢，開始畫緊公仔。

阿波就埋頭苦幹緊。

四周環境好安靜，得返呼吸聲同書寫嘅聲音。不得不講Miss真係了解心理嘅專家，喺課室呢個對自己有利環境下，佢利用老師嘅威嚴，只需要默不作聲，就利用到寂靜帶嚟嘅壓迫感震懾所有人。





良久，Miss終於講出第一句說話：「做晒未？做完就交比我改。啱晒先走得。」Miss一路改簿一路講，眼都冇望過我地一眼。

然後阿偉同杰少就出咗去交嘢。過咗一陣，Miss好滿意咁同佢地講可以放學。阿偉同杰少冇特別歡呼，好似怕做錯一件事都會比Miss罰咁。 阿偉走之前喺門口做咗個手勢，叫我同阿波一齊喺操場等。

之後Miss應該改晒啲簿，佢離開自己位巡視我同阿波做成點。當佢埋嚟時，嗰種壓迫感真係前所未有⋯⋯天啊！呢個人仲係咪我女朋友呢架！

Miss拎起我啲簿睇，就冷冷咁講：「啲字仲係打風咁！係咪想再做過？！」

佢放低我本簿後，就行去阿波度，好惡咁講：「你企起身。你係咪仲發緊夢！點解一條都做唔到？」





Miss語氣平和，但每一句都好似枝矛咁插到阿波成隻箭豬咁。阿波嚇到講嘢都細聲咗。然後Miss索性坐佢隔離，逐條慢慢同佢做⋯⋯益咗你啦死肥波！

又過咗一個鐘，太陽已經落咗山。操場嘅嘈吵聲都靜咗好多。而阿波終於搞掂咗今日嘅功課。阿波精神恍惚同腳步浮浮咁離開，再見都冇同我講聲。

最後得返我同Miss兩個喺課室。

換係平時，我一定趁機同佢親熱一下。不過佢嗰份嚴師嘅威嚴好似座山咁壓埋嚟！我真係唔敢亂郁！加上蟲蟲件事，我就更加要小心。從佢開地圖炮咁辣晒全班人得知，佢真係好嬲。

咯⋯⋯咯⋯⋯咯⋯⋯高踭鞋嘅聲音喺課室裡面異常地響亮。好似死神嘅腳步聲，好慢又沉重，喺我身後傳緊上嚟。我將個頭放得好低，繼續溫書。呢個時候Miss已經行到我身邊，佢拎起我剛剛重做嘅功課，仔細咁檢查一番。





「咦？你重新再做嘅？」Miss。

「嗯，係呀。啲字核突嘛。未⋯⋯再做過囉。」為咗令Miss息怒，我惟有再做過啲功課。

佢冇出聲，只見佢邊睇邊行，然後行到我個位前面。我輕輕抬頭，見到佢攤開我份作業，遮住咗佢個樣。有說，身體語言之中表情係佔最重要。而家我睇唔到Miss嘅樣，我實在唔知佢到底係點。呢份冷漠同嚴肅加上衰咗鑊嘢喺佢手上⋯⋯加加埋埋真係搞到我愈來愈不安！

然後⋯⋯

「嘻⋯⋯」

吓？我有冇聽錯？

「嘻⋯⋯嘻⋯⋯」

Miss個人開始震緊⋯⋯佢笑緊？





「嘻⋯⋯嘻⋯⋯哈哈哈——！」

佢放低本作業，我見到佢笑到眼淚水都標埋！

吓？！即係點呀？

係咪係嬲到頂唔順而一反常態呀？

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師