真人真事改篇﹕師生戀﹕《最接近的陌生距離》: 第三十章之二

下午，陰差陽錯竟然係中文堂。

我係最遲入課室嗰個，阿偉佢地一見到我食咗屎咁嘅樣就吃一驚。然後Miss成個撲克面咁返嚟課室，佢地就知出咗事。大概佢地覺得明明今日Lunch同Miss同佢地玩得咁開心，我應該開心到放學架嘛，點知一陣間就變到食咗幾舊屎咁嘅樣。Miss心情亦都唔多靚添！

由於我地四個一喺埋一齊就會破壞課堂秩序，Miss一早分別將我地調咗去班房嘅四個角落頭。東南西北，四大天王咁。而我就係守住個門口嗰一個。我知班兄弟好關心我，所以趁住Miss喺黑板寫嘢時，佢地傳緊啲紙仔埋嚟。

「你冇事呀嘛？個樣青晒嘅？」阿偉：「你兩個都唔多妥喎！」

阿偉不愧係智神，佢好有危機意識，非常小心咁絕對唔提Miss。





阿偉下面寫咗杰少同阿波嘅字。

「係咪穿咗煲呀？一定係死肥波啦！」杰少。

「我冇爆料呀！」阿波。

杰少同阿波估錯晒，為咗唔好令件事咗複雜，我同阿波、杰少打咗個Ok手勢。

不過⋯⋯





「班長。頭先我講到邊？」Miss一招回頭突擊，嚇到我呆晒！

冇啦，冇啦。之前Miss上堂時嘅隱性嘅溫柔同可愛都冇晒啦！佢真係變返未拍拖前咁嘅樣啦！佢叫返我做「班長」啦！

我支吾以對搞到Miss塊面愈來愈黑，然後佢見到我揸住張紙仔，就話：「你又傳紙仔？！」佢即刻示意我比張紙仔佢。

那有反抗的空間？我乖乖地交咗張紙比Miss，然後我瞄到阿偉擰晒頭咁，佢都知呢鋪奶硬嘢！

Miss睇完張紙後，我見佢忍一忍啲情緒，好平淡咗叫咗我地四個嘅名：「你地全部同我企起身。」Miss已經犀利到憑字跡都可以認到人。





經我多時嘅觀察，Miss嘅恐怖等級其實係有幾個level。開晒火力砌人嗰種其實係最低層次。冷靜又隱藏怒氣嘅反而係最恐怖！因為佢罰人嘅手段係經過佢理性思考，所以一定係罰得最金架！

「你地四個已經分開晒坐都仲可以傾到計？遲吓洗唔洗幫你地調埋班呀？」Miss翹埋雙手:「你地今日放學留堂！而家同我喺壁報板嗰度罰企！」

雖然Miss冇恐怖嘅怒吼，但在坐所有同學都嚇到唔出聲。因為呢次懲罰真係前所未有咁嚴重。因為以往傳紙仔點會留堂呀？最多屌兩句唧！

終於，我地被Miss罰咗成堂。喺最後嘅五分鐘，Miss咁樣對全班講：「就嚟考試啦。但係我地班仲未有準備考試嘅氣氛。所以由聽日開始，小息同午息都唔准去玩。特別係午息，考試之前嘅課室只可以用嚟溫習！有需要嘅，我會留堂補課！」

成班同學好想大叫「吓」一聲，但今日咁講實在係屎坑點燈，「找屎（死）」呀！而我⋯⋯sorry啊4A班嘅兄弟！係我害咗你地！Miss咁樣做，盲都知佢想倒截我去空中花園溫書嘅機會啦！即係簡接斷絕我同蟲蟲來往⋯⋯喂，頂！洗唔洗做到咁呀！搞到我真係出咗軌咁喎！我以為招連坐法殺埋阿偉佢地三個就算。點知原來係要全班陪葬啊！！

唉，女人真係唔可以得罪。

而且，當你女朋友係做緊你班主任時就更加唔可以得罪！

= = = =  =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師