真人真事改篇﹕師生戀﹕《最接近的陌生距離》: 第三十章之一

「又話溫書嘅？」

Miss呢句說話就好似一粒掟入湖中嘅石仔，喺我腦湖中泛起陣陣漣漪。

剎那間，我知道而家係一場心理攻防戰，只要我有一絲閃宿、一點遲疑，就會立即激嬲Miss。唉，頭先見到佢點陰阿波就知道，Miss分分鐘做心理學家比做老師更專業！三兩下問題我就一定露底。避無可避，惟有接招硬食。

「其實都溫咗一陣嘅。」咁事實係我真係有溫過嘛，我冇呃Miss喎。

「點解對面學校嘅波會喺度嘅？」Miss拎住個棒球追問我。





Miss雖然仲係咁隨和，但佢眼神如鷹銳利。我一講大話佢一定會知，而且仲會必死。所以我惟有咁講：「其實係蟲蟲掟過嚟嘅。我見佢咁都掟得到，好似幾好玩就⋯⋯掟返過去囉。」

「就係咁咋？」

「都有傾下計嘅。」

Miss輕輕咁嘆咗口氣，笑容都收返起。明顯佢唔係怪我冇好好溫書，而係唔鍾意我同蟲蟲嘅溝通方式。我細心咁諗，平時義工小組時Miss一定有留意我同蟲蟲嘅相處。佢唔會介意我同蟲蟲做一個hi and bye嘅朋友。 但係呢種以掟棒球嘅溝通方式⋯⋯可能喺女朋友嘅直覺、感性嘅觸覺當中就變得好有問題。

我可以點做呢？





事實上我同蟲蟲真係冇嘢架喎！我點會鍾意佢呢？但我知道咁樣講，Miss未必會接受。所以我只好以不變應萬變，睇下Miss會出咩招再作打算。

「呢度溫書真係好啲咩？做咩唔去圖書館呀？」

嚟啦！核心問題！

但⋯⋯老實講，「空中花園」溫書係入腦啲嘅！

「圖書館個張Sir都唔理學生嘅，午息嘈到死。而且班房又有同學喺度玩，所以我未嚟呢度溫囉。」





Miss好意味深長咁「哦」咗一聲，再配一個唔太信任嘅眼神。或者Miss自己都已經有答案，佢覺得我嚟呢度係為咗見蟲蟲⋯⋯唉，屌！呢鋪唔係我身有屎。而係好似跌落流沙咁，我控制唔到個局面。只要Miss覺得我想媾蟲蟲，我都係會仆街架！

我急住想解釋但Miss望一望手錶，就話：「時候唔早，返課室上堂先。」

呢下命令嘅語氣令我回憶起仲未同Miss一齊嘅日子，嗰一位好惡好嚴肅嘅黃梓盈老師。

喺行到樓梯時，我同Miss就分開行。佢行返去教員室拎嘢，我就首先行上去課室。

我煩惱緊點樣哄返Miss時，雙手不其然咗插入褲袋。然後我喺褲袋入面抄返蟲蟲比我嘅紙仔。就係頭先慌張之時，未嚟得切睇嘅紙仔。

「咁你鍾意咩色呀？」蟲蟲手靚字。

吓？好地地做咩問我鐘意咩色嘅？

= = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師