真人真事改篇﹕師生戀﹕《最接近的陌生距離》: 第二十七章之二
傻社工巴治奧解釋緊嘅遊戲規則時，我不忘咁望去Miss嗰邊⋯⋯唉，繼續死亡微笑緊。我同Miss排除萬難先一齊到，我估應該冇咩事⋯掛？
呢下分神搞到我聽唔到個傻社工講咗啲咩，剩係聽到佢咁講：「今日嘅活動係計分嘅！全場包尾嗰組呢就要接受大懲罰！」
「我掛住望Miss, 頭先個傻佬講咩？」我。
「簡單講，四組派人battle, 最低分嗰組就大懲罰。」阿偉。
「咁咋嘛！」我望去蟲蟲嗰邊，見佢同身邊嘅人格格不入咁。我又話：「呢鑊你實走唔甩！」
第一場挑戰，就係每回合每組派出一位代表對戰。雙方人會喺主持手上抽出一張啤牌，然揭開睇下邊個點數大。點數大嘅就拎起枱上面嘅雞蛋掟對方，點數細嘅就拎頭盔擋。點數大嘅有基本分數一分，雞蛋打中人就可以再得一分，擋得住就唔計分。哇⋯⋯邊個諗埋啲咁嘅遊戲呀？正合我意啊！一陣間我就搞到個蟲蟲成塊面都係蛋白質！！
呢場比賽真係又緊張又刺激。好快就到我呢組同蟲蟲嗰組決鬥。首先係阿波、杰少出戰兩round! 如果平分，就打第三round決勝局，率先贏到20分就贏！
最後阿波輸一局，阿偉贏一局，要打Final Round ！
蟲蟲一面不屑咁行到枱前。嘿！終於輪到我！
我行到枱前，喺正佢對面。枱上面有一籃雞蛋同一個頭盔。仆佢個街，成張枱都係蛋漿，搞到又腥又臭！
蟲蟲枝珍寶珠已經一早食晒，但佢依然咬住枝棍，令佢嘅串樣再加多幾分反叛嘅感覺！佢翹埋雙手，不時周圍望，一啲都唔投入呢場比賽。佢成個身體語言就係話你知，佢係被迫參與今日嘅活動。
「世界真係細，咁都撞到你。」
蟲蟲望都唔望我一眼。
「呢一巴掌，我一定要你還得乾乾淨淨！」我指住塊面上面仲發紅發熱嘅掌印。
蟲蟲眼角瞄我一眼，然後挨近少少，嘴角含笑咁講：「你信唔信耶穌架？」
乜料呀？
「耶穌話，人地摑咗你右邊面。你要比埋左邊面佢摑架！」蟲蟲笑嘻嘻咁講之後，又拉返開個身，雙手插入PE外套袋入面。
社工巴治奧拎住疊啤牌過嚟。我同蟲蟲各拎咗一張卡，反轉放咗喺枱上面。呢一刻就好似賭神最尾要揭底牌咁緊張！
巴治奧嗌咗三聲之後，我同蟲蟲一齊揭牌！
「葵扇Dee！」發達！呢次你仲唔HiHi?
興奮嘅我喺個籃度拎起隻雞蛋時，我左邊面啪咗—聲！然後炸出一片黃色蛋漿，最後先係灼熱劇痛！
我定一定神後，見到蟲蟲已經好優雅咁用紙巾抹手，佢身後嘅組員亦一片歡呼！我再望佢張底牌竟係「階磚3」！
「阿Sir！我葵扇Dee喎！」我指住我張牌講。
「哎呀！睇過⋯⋯唔係鋤大Dee呀。唔好玩啦，老細！」巴治奧以一個嘲笑嘅意味同我講。
「咩話？」
我望返去阿偉嗰邊，佢地個個擰晒頭。我再望去Miss度，「死亡微笑」已經變成由心而嚟嘅恥笑⋯⋯呢鑊真羞家！
蟲蟲又挨近張枱，以勝利者嘅姿態講：「都話咗打埋你左邊面架啦！」
「收聲啦八婆！」我又喺巴治奧度拎咗張牌：「我一定會還返晒比你！」
「睇下點。嘿⋯⋯」蟲蟲冷笑咗抽咗張牌。
一二三！開！
我葵扇A! 點講係我贏啦！喺我要拎起隻蛋時，右邊面又啪一聲！全場靜晒！
「哎吔——！」我摸住塊面痛叫！佢無啦啦摑咗我一巴，於是我好惡咁講：「你又嚟！」
「噢⋯⋯sorry呀！」蟲蟲個樣扮晒嘢咁，擺明頭先佢係特登！佢又同巴治奧講：「sorry 阿sir, 我緊張得濟！」仲要扮可愛吐舌咁冧巴治奧！
我好不忿咁望住蟲蟲，佢雙手插袋一面嘲笑，似乎佢好樂意見到我而且咁狼狽，佢根本唔在乎輸贏！
我冇可能咁樣當眾輸比呢粒妹釘架！我同蟲蟲又抽一張牌，佢滿滿自信咁望住我。
「要記得耶穌講過啲咩喎。」
一二三，開！
我3佢5！呢次我醒，我已經即刻拎起頭盔準備擋⋯⋯⋯啪！！我成面都係蛋漿！
明明我已經夠晒反應，點解佢都仲係打中我嘅？我抹開面上嘅黃色蛋漿，迷糊嘅雙眼就見到蟲蟲笑到肚都攣！
「哈⋯⋯哈⋯⋯」蟲蟲：「我開始覺得好好玩啦！」
呢個時候，我先留意到我同蟲蟲係有身高差，佢要啪中我個頭係要時間，所以我一定係夠時間載好頭盔！即係過，蟲蟲之所以咁快狠準一來佢夠靈活，二來佢係直接用雞蛋掟我！
「快啲呀！」蟲蟲好得戚咁講：「我想睇下你可以有幾柒？嘻⋯⋯嘻⋯⋯」
「痴線妹！」
我同佢抽牌。
一二三！開！
「吔屎啦八婆！」我學佢咁直接用雞蛋掟佢！
蟲蟲竟然避到，佢望一望被我掟中嘅女仔後，又回頭同我講：「你眼界差咗啲喎！」
雖然掟唔中，但巴治奧都照計分比我。 呢個時候，我感受到蟲蟲嘅表情冇之前咁串，佢眼神都認真起嚟，明顯慢慢投入呢場戰鬥。呢一刻，我背後好似響起咗BGM咁，一陣陣紅紅烈火包圍住我同蟲蟲，決戰一觸即發！
我同佢互相攻守！佢贏我一分時，我追返一分。跟住佢再贏多我兩分！我同佢嘅戰鬥氣氛慢慢咁影響身邊同學，佢地就好似睇波咁緊張！
兩間學校嘅同學各自為自己嘅支持者打氣！
終於黎到決勝局，我同蟲蟲各有十九分！
但係⋯⋯得我一個人食撚晒啲雞蛋呀！
「搞到成身都係蛋白質⋯⋯嘖嘖，死變態佬。」蟲蟲，去到呢一刻仲係未中過蛋。
巴治奧行埋嚟就話：「嘩！真係好精彩啊！決勝局啦喎！兩位準備好未？」佢伸出一疊啤牌。
我同蟲蟲互相對望，有一種唔係你死就係我亡嘅感覺。然後各自抽出一張，反轉放喺枱。
「一！」巴治奧倒數。
「二！」我感覺到佢隻手已經準備拎雞蛋。
「三！」我唔輸蝕同樣伸手去個籃度拎雞蛋！
開！
竟然⋯⋯兩張都係Joker！
巴治奧好錯諤 似乎佢唔記得拎走兩張Joker !然後佢好尷尬咁講：「打和！Super!」
「咩話——！我頂！」我好激氣咁講，即係冇得覆桌？咁就完啦？
蟲蟲望到我而家又狼狽又嬲又出唔到聲嘅樣之後笑得好開心。然後佢就好似凱旋回歸咁返去自己嘅小組度。
「蟲蟲好嘢！」
「果然係我地大家姐呀！」
「啱架啦！啲麻甩仔唔教訓唔得！」
相反，當我返埋去時，雖然只係平手，但我而家呢個樣真係同一隻喪家狗無異。
「俾下面啦！話晒我砌低咗狗公周喎！」我好努力咁喺佢地度搵返少少respect!
最後阿偉搖晒頭咁埋黎話：「蟲蟲係你剋星喎！」
「邊係？！嗱，而家我就去痾篤尿邪一邪佢！返嚟佢就仆街！」
「咪同佢搏拳啦。我地成班男仔，乜面都比你掉晒啦。」阿偉。
然後我見到成個盈女王騎士團嘅一眾騎士用好怨毒嘅眼神望住我。
喺成班女面前輸到底褲都冇，搞到我無地自容。搞到我小休都唔敢同佢地去廁所，廢事比佢地借啲意濕我一鑊。
趁成個禮堂冇咩人時，Miss亦都走埋嚟。
「低B仔。」Miss忍住笑：「今朝就係蟲蟲摑你呀？」
「你仲笑？我而家比佢搞到成身都係呀！」講完我扮要衝埋去攬住佢！嚇到Miss退後咗幾步。
「你有冇帶多件衫換呀？」Miss.
「你話呢？」我好細聲咁講：「琴日我嚟你度預咗只係溫書咋嘛！邊估到你⋯⋯要我『小測』喎！我都冇返屋企點拎多件衫呀。」
「小測」當然係指「做愛做的事」啦。Miss聽到先係甜笑，就扮嬲話：「咁好呀！咁以後就唔洗『小測』！」
「唔⋯⋯唔好！唉，盈盈，sorry ！」
「作死你呀？喺學校咁叫我！嘻⋯⋯講笑咋！」Miss:「我之前買多咗件衫比你，我一直放咗喺教員室。而家去我個位拎啦。」
於是我跟Miss去咗佢位拎新衫。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學