真人真事改篇﹕師生戀﹕《最接近的陌生距離》: 第二十七章之一

「我全名叫余可童，唔准叫全名，叫我做『蟲蟲』。」

條暴力痴線妹講起自己個名時，個樣真係特別乞人憎。翹起雙手，樣又串，仲含住粒珍寶珠添。佢個眼神唔止對我唔友善，仲對我地所有男仔都唔友善，好似全部男仔都係佢殺父仇人咁！

當所有人都略略介紹晒自己之後，社工吳姑娘又有嘢講：「再一次歡迎各位同學！嚟緊我地兩間學校會有一系列服務社區嘅義工活動。首先想問一下大家，有幾多位同學係做過義工架？」

咪玩啦做義工，我而家剩係聽到烏鴉叫咋﹗

見到咁老尷嘅畫面，吳姑娘就打完場咁講﹕「咁啱晒啦！我地今日正正就係一個義工訓練活動！首先我地用熱烈嘅掌聲歡迎今日活動嘅星級教練！」





然後有個樣好鬼猥瑣，成個詹瑞文咁嘅中年大叔走咗入圈中間介紹自己，仲學埋詹瑞文咁扭身扭勢咁講：「Hello呀！各位同學，我係今日嘅星級教練，亦都係節嚟自隔離女校嘅社工。咁啲女同學一定識我架啦！巴打們！我叫做『巴⋯巴⋯巴⋯巴⋯巴治奧！』，噢呢噢呢噢呢噢呢⋯⋯」

呢個傻佬真係以為自己好好笑⋯⋯

「哇屌，好撚老尷呀。」阿偉都頂唔順呢個場合。

呢個時候，我感覺到一眾被我水咗過嚟嘅盈女王騎士團嘅騎士（即係4A全班）用一個好怨毒嘅眼神望住我。

「咪咁樣望我啦！話明幫女王大人撐場架嘛！」我對成班男仔講：「你班友成日嗌冇女！而家對面重女呀！仲唔講多謝？」





平心而論，如果唔係蟲蟲個格太串太惡，佢真係咁多女仔入面樣貌、身材都係最出眾。如果以分數嚟比較，對面啲女顏值大約六、七十分，而蟲蟲係有九十五分！

雖然蟲蟲個氣場好勁，搞到我地啲男仔淆晒。但從我對咸濕仔嘅認知，我感受到盈女王騎士團入面有幾位騎士已經眼金金咁望住蟲蟲⋯⋯呢個世界從來都唔缺M男嘅！

唉，呢啲社工活動年中真係玩唔少。我基本上都熟晒流程，唔洗嗰條叫巴治奧嘅傻社工講，我都知要分組玩。果然，全場分成四組，男校女校各有兩組。

「改組名喎！」杰少：「阿波你諗啦！」

「智者偉諗啦！」阿波。





「咁梗係交比打狗英雄，阿匡哥改啦！」阿偉。

「一早諗好咗啦！」我。

「叫咩名呀？」佢地三個。

「哼！」我離遠咗盯實嗰條暴力女：「我地就叫『滅蟲小隊』啦！」

「吓？！乜撚嘢！老撚土！」杰少。

「喂唔得喎！」阿波。

「唉，冇眼睇。」連阿偉都咁講。

「我唔理！總之今日我就好憎啲一條條嘅蟲！！」我。





阿偉隨我眼光望過去蟲蟲嗰邊後，再望一望我面上面嘅掌印，就話：「今日就係嗰個叫蟲蟲嘅女仔星咗你一巴？」

然後杰少同阿波走埋嚟，好似而家先發現到我啲掌印咁。

「頭先返嚟嗰陣，條痴線妹唔知發咩神經摑咗我一巴呀！」我咬牙切齒咁講：「佢陣間就仆街！呢啖氣我吞唔落！」

「唉！好心你咪咁小氣啦！你望下Miss幾開心!」阿偉。

然後我望咗過去另一隊男子組，Miss收緊啲小組名牌時，就被個組名搞到哭笑不得。

「乜嘢『盈盈一水間』呀？」Miss。

佢地好開心咁笑緊。Miss近排好鍾意我地班拎佢個「盈」字開下啲佢教過嘅中文嘅開笑。





「車！而家仲洗用呢招去哄⋯⋯Miss開心架咩？」提到Miss時我壓低把聲講。

「唔係哄唔哄嘅問題。而係你個『朋友』咁高調用另一個女仔名嚟做小組名嘅問題。」阿偉冷冷一笑，好似預計到唔好嘅事情發生。

阿偉話口未完，Miss已經黎度收我地小組名。

「滅『蟲』小隊？」Miss皺咁下眉頭：「咩意思呀？邊個改架？」

「匡哥囉！」杰少：「諗住簡單啲直接叫『盈女王騎士團』架嘛！」

「九成九因為對面嗰個叫『蟲蟲』嘅女仔啦！」阿波慌我唔死咁補多一刀：「匡哥一定係睇中人地生得可愛啦！想引人注意呀！」

班仆街仔又玩team kill！

「唔係啊！Miss， 我塊面嘅掌印⋯⋯！？」我連忙解釋，但係Miss佢個反應——





「😊」

仆街！係死亡微笑！呢次碌柒！我嚇到唔敢同佢解釋！！

然後Miss保持住個死亡微笑就走開咗。

「提咗你架啦！阿朋友！」阿偉搭咗我膊頭一下。

呢鋪真係出師未捷身先死呀！

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師