真人真事改篇﹕師生戀﹕《最接近的陌生距離》: 第二十七章之三

我清理成身蛋漿後，就換咗件衫。呢個時候，巴治奧借清潔禮堂嘅名義，要我地負住執返乾淨，順手講下咩叫「義工」。條傻佬又幾慳水慳力，咁樣都可以比佢攝到位做義工訓練！

然後比賽繼續。喺玩咗躲避球、各類小型Team Building 嘅遊戲後，天色已經好晏，已經係黃昏時分，天邊有最後一條火紅色嘅晚霞，即將入夜。

「今日活動話咁快就到咁最後一個遊戲！首先我地睇下分數先！」

我同蟲蟲嗰組叮噹馬頭⋯⋯睇下邊個包尾！

「嚟緊嘅遊戲係相當之刺激。首先我想講下呢一帶山頭嘅城市傳聞先⋯⋯」





吓？！有架咩？

咪又係間間學校係墳場、亂葬崗同埋日軍刑場嗰啲！我地男仔就真係聽到免晒疫啦！但班女仔就聽到依嘩鬼叫⋯⋯啊哈，原來怕鬼架喎！咁多女仔當中，係得蟲蟲仍然一張撲克臉咁，喜怒哀樂不形於色。

「呢個遊戲會兩組對戰。要各自鬥快喺學校搵到你要搵嘅寶物！然後成組組員一陣返嚟禮堂先叫完成任務！而其餘兩組就會扮鬼捉人。被捉到嘅同學就會淘汰。成組組員被人淘汰晒就會取消資格，喺呢個遊戲就會冇分！」

咁聽落又幾刺激喎！當巴治奧講完之後遊戲開始！又係我同蟲蟲嘅小組對決。蟲蟲嗰組分別有一個叫Apple嘅肥妹，扎孖辮嘅冬冬，同埋高妹樂樂。點解我咁記得佢地？就係阿波同杰少分別想媾Apple同冬冬，而且食相非常難睇，睇到我同阿偉擰晒頭。

我地喺操場中央嘅起跑線上面等候大會指示。呢個時候天色已經黑晒，我感覺到班女仔真係比巴治奧嚇親，吱吱噚咁講好驚好驚。





我靈光一閃，嘴角奸笑，我就考驗吓我同阿偉嘅默契可以去到邊先。

「阿偉，上次係咪話七樓有啲嘢？」

「係呀！」佢答得咁快，我知道我地兩兄弟已經搭啱咗線啦！佢話：「周Sir幾年前迫到個學生自殺。就喺七樓去舊翼去新翼嗰條橋⋯⋯」

我感受到女仔啲目光慢慢咁望過嚟，係恐懼嘅目光！

「個師兄趁啲老師走晒。當時鐘數應該同而家一樣。佢就行咗上去天台，再行去條橋頂度，搵咗條繩綁住自己條頸，之後⋯⋯」





「之後點呀？！」我懶係緊張咁講。班女仔除咗蟲蟲之外眼定定咗望住我。

「嘭——！！」阿偉突然大叫，嚇到啲女仔尖叫。阿偉：「跳咗落嚟！因為佢條頸纏住條繩，一跳落嚟嗰下，個頭就⋯⋯」

「啪——！」我接力助攻，望住班女仔講：「成個頭甩咗，跌返落七樓條橋度！」

「比返個頭我啊！」杰少加入戰團。

「啊———！」班女仔嚇到尖叫！只係得蟲蟲好鎮定咁繼續食佢嘅珍寶珠！

我望住班女仔講：「個師兄晚晚喺條橋度想搵返自己個頭呀！」

「夠啦！唔好講啦！」扎孖辮嘅冬冬嚇到差啲喊。

「仲有一單架！」杰少將把聲變到好陰森：「聽講以前周Sir搞大咗一個Miss個肚又唔認數。搞到個Miss喺某一層吊頸自殺死咗呀！」





周Sir呢啲仆街作惡太多，雖然佢敗走咗，但呢啲吹水流言屈落佢度都仲係最適合！

我睇個氣氛比我搞到差唔多，班女仔都比我地嚇到淆晒。呢局穩贏！

不過⋯⋯總係有豬隊友存在。

「Apple。」阿波突然情深款款咗望去女仔嗰邊，同其中一條肥妹仔講：「唔洗驚架，有我喺度！」

我地班男仔嬲到靜晒！

「逗佢隻雀！」我。

「死肥仔又係你！」「重色輕友！有異性冇人性！」「合群啲啦死肥仔！」





「喂⋯⋯喂⋯⋯唔好逗雀呀！睇住⋯⋯睇住⋯⋯」

我地對阿波一輪上下其手，搞到隔離啲女仔都忍唔住笑。死肥仔，我地咁難得營造出黎嘅氣氛就咁樣破壞晒！

我見到蟲蟲好不屑咁對我地冷笑。哼！我就睇你威得幾耐！

然後巴治奧宣佈開始比賽。我地兩組人各自分頭行動，最快搵齊任務指定嘅寶物。

因為有主場嘅優勢，巴治奧吹嘅水我一啲都唔驚。好快就搵咗幾個寶物，我好小心咁放咗入去衫袋度。我睇一睇個地圖，我發現有一個寶物喺七樓新翼嘅美術室入面。而且件寶物係特別高分要同隔離組爭。所以我決定盡快去咗美術室先。

但係當我喺三四嘅樓梯之間跑緊嘅時候，我就好似聽到有把女仔聲喺六樓傳嚟！

「有冇人呀——！」

係一把凄慘嘅女仔聲？聽落似係受咗傷咁喎！





「哎——好痛！有冇人呀！」

因為巴治奧條傻佬想有恐怖氣氛，所以就熄一半學校嘅燈，老實講其實幾易差錯腳跌倒。我都要小心咁行，更何況係女校班妹。所以我隨住聲音急步咁上去睇下咩事。

當我行到五六樓嘅梯間時，就見到一個女仔嘅身影坐咗喺度。我上前望真啲時，我心都涼晒。

「咁啱呀？你仆街呀？哈哈⋯⋯你睇下你⋯⋯哈哈⋯⋯」

可以令我一秒變成個賤精嘅人，就一定係個暴力痴線妹蟲蟲啦。

= = = = 

ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師