真人真事改篇﹕師生戀﹕《最接近的陌生距離》: 第二十六章之六

放學。

我又喺「臭格」，隔離會議室嘅老師又講緊我。

「⋯⋯謝子匡同學喺Miss Wong被偷拍件事上，雖然佢有郁手打人，但我認為佢本意係出於保護Miss Wong。加上呢件事上，佢已經被周Sir隔離停課超過一星期，我認為要罰咩都罰晒啦。一方面佢唔可以記過之外，亦要比佢即時復課！」

咁撚長氣，一定係黎Sir啦！一上到訓導主任位，講嘢都特別霸氣。

「⋯⋯不過佢琴日都鬧咗好大件事出嚟。佢打傷咗三個同學，人地家長想報警。我地點都要記佢過⋯⋯」





聽呢把聲一定係副校長啦。

「周Sir之前放任嗰三位同學。以致佢地可以咁目無校規咁欺凌謝子匡。據我所知，謝子匡係被佢地欺凌咗一星期。而當中除咗我同Miss Wong去幫助阿匡外，你地冇人夠膽向周Sir投訴。你地而家仲想指控呢個受害人，公唔公道呀？」

然後我聽到一陣嘈吵嘅議論。黎Sir繼續去幫我辯護，而副校長為首嘅就認為「唔理邊個錯先，總之打交就唔啱！」最後呢個會議係不歡而散地結束。

然後Miss 同黎Sir入嚟「臭格」探我。

「我聽到晒架啦。琴日嘅事⋯⋯兩個小過嘛！」





「Sorry, 我已經盡晒力去為你辯護。」黎Sir：「不過肥B佢地我會每人記佢地兩個大過，班老師都冇再講啲咩。」

「咁都好啊！佢地罪有應得架！我嘅小過⋯⋯濕碎啦！」

「記唔記得，我同你講過嘅將功補過嘅計劃？」黎Sir:「下星期一我地同女校嘅老師有交流會。你本身就放假嘅。咁社工吳姑娘借呢日搞義工訓練。所以⋯⋯機會嚟喇！飛雲！」

「唔係吓話？做義工？！」

「係呀。仲要係我有份負責架。」Miss一面得戚咁講：「你係咪唔嚟呀？」





女朋友叫到可以唔嚟咩？

「好⋯⋯」雖然我萬般不頭意。

「你當幫下你Miss啦！呢次活動我地要多啲人參加。因為其實係聯校義工活動，就係同隔離女校合作。呢啲位，校長好緊張參加人數架。我地一定要人多。」黎Sir停一停又講：「而且Miss Wong被周Sir臨死前咬咗一啖。周Sir向校長爆料，指Miss Wong 之前同中七同學搞曖昧關係，又話Miss鍾意去酒吧呢啲地方，私生活混亂。搞到Miss Wong要延長個試用期。」

我即刻火都嚟埋，話：「隻死狗公有冇咁賤呀！」

「如果你幫Miss搞得起個活動嘅，佢嚟緊續約就唔會有問題。」

「咁你仲嚟唔嚟呀？」Miss。

呢次我諗都唔諗，話：「嚟！點只我添呀！盈女王騎士團嚟齊晒都仲得添呀！」

Miss聽到盈女王騎士團就好尷尬咁擰晒頭，得我同黎Sir喺度偷笑。





= = = =

隨住隻狗公被打落十八 層地獄後，我終於感受到咩叫平靜！ 我嘅生活亦終於正常返啦！！

我同Miss嘅關係又提昇到另一個層次添！

叮噹——！

Miss屋企門口響起。

「等陣——！」屋企嘅Miss大叫，然後大門就打開咗。門後嘅Miss就話：「咁準時嘅？」

眼前嘅Miss係傻更更屋企Look, 不過衣著都幾吸我睛。又係加大碼嘅衫順當裙著，露出一對好白滑嘅長腿。





係，今日係星期日。Miss話我隔離咗成個星期要補下習，追返啲中文。我啊⋯⋯真係好鍾意中文，所以二話不說就上去Miss屋企⋯⋯嘿嘿嘿⋯⋯！！

我帶晒有關中文科嘅嘢。Miss雖然係屋企look, 但佢教我嘅態度同返學一樣，嚴格到不得了！我啲字核突少少都比佢擦過再做！

然後連續補咗三個鐘，我啲專注力就嚟用完。

「打開36頁，嚟緊考試嘅重點⋯⋯喂！」

Miss見到我掛住望佢對腳，就好惡咁拍咗我個頭一下，話：「你係咪咁唔留心呀？」再扭我耳仔一下。

「我專心咗三個鐘已經好叻仔啦！」

「係咩？」Miss懷疑咁講，然後佢古古惑惑咁諗咗啲嘢，笑住話：「唔夠專注力點溫書啊！」

然後佢突然坐枱，擺出我最鍾意姿勢，翹埋咗嘅長腿就喺我隻手隔離！





唔得⋯⋯我大腦又唔夠血！

「接住嚟我要訓練你嘅專注力！拎小測卷出嚟，我計時，你同我再做一次！」Miss：「做唔切嘅，今晚唔比你搞！」

吓？！「上次」就背書，今次就小測！？

仲要係我一路測，一路「騷擾」我？！

至於⋯⋯最終發生咗咩事，「搞」唔「搞」得成⋯⋯我諗你地都估到架可？

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師