真人真事改篇﹕師生戀﹕《最接近的陌生距離》: 第二十六章之五

周Sir呢次真係永不超生。

Lunch，學校搞咗個全校特別週會。除咗全校同學外，仲有唔少家長。最大鑊知唔知係咩？教育局都派咗人嚟坐啊！

首先校長向在坐嘅人講發生咗咩事，然後簡單講咗佢同校董會嘅共識，之後就為琴日事件道歉。

然後主角出場。

「本人周啟泰，為昨日中午暴力對待學生一事致歉！」





佢一面不忿咁鞠躬。

「此外，關於近日喺同學之間流傳我同黃梓盈老師嘅關係，其實只係本人捏造出嚟嘅謠言。懇請同學唔好再流傳呢啲中傷Miss Wong嘅謠言。本人想藉呢個場合，公開地、正式地、誠懇地向黃梓盈老師道歉。」

講完後，佢向Miss鞠躬致歉。

「另外由於本人被揭發私生活唔檢點，嚴重違反教師操守及道德，藉教師權力不公平及以過份且不必要暴力對待學生。本人願意即時請辭，並永遠離開教育界。感謝學校十年以嚟嘅包容及栽培。」

「最後本人誠懇地向受害同學致歉！」





佢又戇鳩鳩咁鞠躬，而且佢眼神亦都望咗過嚟。咁我禮貌上都要點頭微笑回應嘅！

佢個樣難睇到想衝落台打我！真係⋯⋯睇到我好心涼啊！到底係邊個咁賤，整咗呢場公開處刑出嚟呢？呢啲醜事通常都係私了就算架喎！

我又心諗，呢個場合應該唔係校長所期望。而且可以即時叫得郁教育局落黎嘅，應該唔係班家長掛？

咦⋯⋯？頭先佢話「被揭發私生活唔檢點」，即係佢比人報串咗比教育局知？咁係邊個呢？

呢個時候心情好差嘅校長宣布人事變動。





「由於周Sir即時離職，訓導主任職位懸空。經全校老師商討後一致決定由今日起輔導主任黎銘賢老師兼任訓導主任一職⋯⋯」

剎那間，我閃過一啲想法⋯⋯

時鐘酒店外泊咗周Sir架車、黎sir經過、佢車尾箱有相機加枝鳥攝鏡⋯⋯嗰晚佢話「大人嘅事唔好理咁多」⋯⋯

.

「我都好想佢快啲消失！」嗰日黎Sir傻戇嘅樣有一絲認真同殺意。

.

我諗到啦！係黎Sir一直以嚟都收集周Sir爆房嘅證據，然後佢乘勢借今次件事報串比教育局知！！

嘩⋯⋯！如果我推斷係啱嘅話，咁黎Sir真係扮豬食老虎喎！平時個樣傻下傻下，但一出手就係直擊要害！仲要令到周Sir永遠喺教育界消失！





仆街，我對黎Sir嘅心計真係毛管戙添！

咦？會唔會呢場公開處刑都係黎Sir獻計嘅呢？ 黎Sir真心錫學生，佢唔會為上位去拉周Sir落嚟。佢咁做一方面還受害者嘅公道，另一方面安撫班憤怒嘅家長。

睇嚟好成功，成班家長條氣都順晒。

當然我嘅手尾都仲要執一執啦。

（啊——！順帶一提，喺多年以後睇報紙，周Sir因為入其他學校教課外活動時熊抱女學生，被人告非禮。最終入冊不特止，連假狗都冇得做添！可喜可賀，可喜可賀啊！）

= = = = 

ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師