真人真事改篇﹕師生戀﹕《最接近的陌生距離》: 第二十六章之七

鬧鐘響起，我睡眠惺忪咁望住個天花板。我轉一轉身，想好好抱住我最愛嘅人時，發現我身邊係空無一人。

「Miss呢？」

係，琴晚由補習溫書，最終⋯⋯嗯，你知咩事。因為喺Miss屋企關係，今次「搞」得比上次放。所以我地「玩」咗好耐，最後我索性留喺Miss屋企過夜。

床頭上有張便條，係Miss寫比我。

「低B仔：





我要返去學校先呀。我整咗三文治比你做早餐，記得食完先返學呀！唔準遲到！我留低多條匙比你，走之前一定要鎖門啊！

老婆」

望住呢張便條，我內心嘅幸福澎湃到好想大叫出黎！有早女朋友整早餐食不得止，仲得到佢屋企鎖匙⋯⋯即係話我隨時都可以上嚟？

好幸福！太幸福啦！！感覺好似同居咁呀！

食完早餐後，我都準備出門。今日個義工活動要十點前到學校。由於Miss屋企比較遠，我要坐程港鐵先到學校。





唉⋯⋯琴晚同Miss「玩」到好夜，加上用咗好多體力。所以一上車，我就好眼瞓要補下眠。

⋯⋯呼⋯⋯呼⋯⋯

⋯⋯呼⋯⋯

⋯呼⋯⋯

「哎⋯⋯！」我肋旁痛咗一下，搞到我醒一醒。





我矇矇朧朧咁四圍望，眼前只係一般嘅乘客。到底係邊個整到我？

⋯⋯呼⋯⋯好眼瞓⋯⋯要補下眠先⋯⋯

⋯⋯呼⋯⋯個頭好似冇Lock到咗，隨列車振動搖晃⋯⋯

搖晃⋯⋯⋯

搖晃⋯⋯⋯⋯啊⋯⋯搵到一個好好挨嘅位⋯⋯

「哎呀——！」

呢次我肋破嘅痛實在太痛太突然！令我個人都醒晒！

我隨痛處望去我隔離。我發現係一個散發出不懷好意氣場嘅女仔！





我應該係頭先釣魚時，唔小心挨咗落佢度，咁點計係我唔啱，我連忙咁講：「Sorry!」

但我心諗洗啱洗咁大力頂我呀！

當我閉起眼時，我耳邊就聽到佢好細聲咁講⋯⋯

「死變態佬想搏懵！」

我⋯⋯你個死八婆啊！我即刻瞇開少少眼，睇下你咩料！

佢⋯⋯著校服？係個女生？哎⋯⋯睇唔到咩樣添。

「你呢啲人扮瞓搏懵我見唔少啦！」





條女好似扮都唔洗扮，特登比我聽到！

死妹釘咁串？呢啖氣我吞唔落啊！但四圍係乘客，即場開拖一定冇我著數！所以我靜觀其變先。

啊——！好死唔死，我同佢都係同一個站落車！我睇住本來擠逼嘅車箱慢慢冇人，我發現身邊嘅女仔死都唔落車。好啊，今次點都要玩你，死八婆！

最後架車啲人走晒，我先慢慢起身。當我企起身後，突登好惡咁望佢一眼，先用眼神嚟一個下馬威先！

點知條女冇比我嘛窒之餘，仲要啤返我轉頭！呢個時候我睇清咗佢個樣。佢梳平陰，札起馬尾，髮尾係攣攣地仲染咗少少啡色添。

佢望落同我一樣年紀，眼大大，嘴細細，皮膚都幾白，仲含住粒珍寶珠添。如果唔係佢嘅惡樣，佢應該係一個幾可愛嘅女仔。

佢著嘅係白色校裙，著住黑色婆仔鞋。我注意到佢著咗一件PE外套，呢個時候我發現原來呢個妹釘就係我隔離女校嘅學生！！

條死妹釘起咗身，我同佢好似打MMA咁互啤。雖然我高佢一個頭，但佢完全唔驚我咁。講真⋯⋯我有少少被佢震懾。然後佢喺第二個車門出，我就行另一邊。 但偏偏行上去地面嘅出口就得一個，我同佢又狹路相逢！





我特別企喺個出口，擋住條路再狠狠咁啤多佢一眼！點知佢突然箭步上前，就一巴星咗埋嚟！

啪———！

「喂！你痴線架八婆！」我感受到面上面有五條發紅緊嘅指印：「做咩無端端打人啊！」

我嬲到即刻上前要同佢理論。

「你試下埋嚟呀！我嗌非禮架！」惡女好平靜咁講，佢將嘴入面嘅珍寶珠咬碎晒。

佢出手星得我一把，我估佢唔係講笑，搞到我有啲忌憚佢！

佢慢慢迫埋嚟，我不自覺咁讓步，佢經過我身邊時忍唔住對我冷笑咗一聲：「嘿！」





= = = =

醫療室。

「嘻⋯⋯嘻⋯⋯」Miss忍緊笑。

「笑咩呀。」

「你一定衰樣樣所以被人兜巴星啦。哈哈⋯⋯敷下佢先啦。」Miss將個冰袋遞比我，話：「好好咁敷添呀！一陣開始活動時，個掌印都未散，你就魚皮啦！」

「唉，被人打已經慘啦。仲要比你笑。」我抱怨咁講。然後我問Miss：「你開完會未呀？」

「開完會架啦。一陣要同吳姑娘夾下點帶活動。」Miss：「其實打你嗰個係咩人呢架！」

「哼！隔離女校囉！」

「哈哈⋯⋯」

「又笑咩呀？」

「你話會唔會世界細到一陣間活動又見返佢呀嗱？」Miss語帶嘲笑咁講。

「係就好呀！我一定星返佢一巴添呀！」我條氣都未下到。

Miss望一望錶，話：「我差唔多時間，我要去禮堂準備一下。你唔好咁遲呀。」

Miss首先離開醫療室。我抖多陣都慢慢行去禮堂。呢個時候我見到我校嘅男仔都陸續嚟緊。而有啲隔離女校嘅女仔都到咁。

「點會咁邪呀！」我望住班女校妹，冇一個係頭先打我嘅惡女。然後就行去禮堂。

呢個時候禮堂啲人差唔多嚟齊。當然唔少得腸粉四兄弟啦！

「各位同學午安。」社工吳姑娘拎咪講：「今日係一個好特別嘅日子，係我地兩間學校舉行聯校義工訓練嘅日子！不如大家圍個圈，我哋做少少熱身活動先啦！」

喺圍圈時，阿偉見到我塊面上嘅掌印，就好奇咁講：「琴晚玩得好開心咁喎！」

「傻啦！頭先返嚟被人摑咗巴！」

「邊個咗夠膽打我地嘅英雄老鼠匡呀？」

當我想同阿偉講返件事時，社工吳姑娘開始主持活動。

「我知道你地都唔認識大家。不如咁啦，我地介紹咗自己先呀。就⋯⋯呢位女同學先呀！」

吳姑娘指一指喺佢對面嘅女仔。我望過去，心底已經平伏嘅憤怒慢慢重新被燃起。

「同學，你叫咩名呀？」

扎住馬尾嘅女仔，翹埋雙手，反咗一下白眼，好唔耐煩咁講——

.

「蟲蟲。」

.

「你叫蟲蟲吓話？」我望實佢：「睇下我一陣點樣一隻手指捽死你！」

蟲蟲慢慢望過黎，佢個樣好平淡，但就好用力咁將嘴入面嘅珍寶珠咬碎！

我感覺到，佢將會係一個好難纏嘅敵人。

= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師