真人真事改篇﹕師生戀﹕《最接近的陌生距離》: 第二十六章之四
「請各位家長稍安無燥，我地學校今是會開會傾呢件事，好快就會比到個交代大家架啦！」
「仲要我地等？我今日唔敢比個仔返學呀！」
「你地學校點解會請埋呢啲人做老師架！」
「上網話嗰個周Sir唔止打過一個學生架喎！仲迫到人差啲自殺啊！」
「琴日條片入面佢當正自己係差人將個學生撳喺地添呀！」
「我個仔都比佢打呀！」
「我個仔都係呀！」
「炒人啦！」
「炒人！」 「炒人！」 「炒人！」
一群憤怒嘅家長聚集喺門前，聽對話，班家長係為周Sir而黎，睇到呢個畫面，我心都涼晒！周Sir都命不久矣。
呢個時候愈來愈多老師出嚟幫手調停。連學校社工都要出黎安撫班家長。
「冇可能會出現呢個情況架喎！」Miss表現得驚訝同憂心：「琴日校長已經安撫好晒家教會班家長，希望佢地唔好公開呢件事。但點解⋯⋯低B仔，我要去幫手控制個狀況！陣間見。」
「嗯！咁我哋上堂見啦！」
於是我同Miss就分頭行事。因為我唔太清楚自己仲洗唔洗隔離，所以先去訓導室報個到，再聽候黎Sir發落。當我上到去教員室外面，由於仲未打鐘，啲同學仲未返課室，而且仲未交手機。佢地見到校門場面咁墟冚，梗係去食花生啦。而教員室嘅走廊就係最好嘅看台！
「Brother !」
呢啲場面又點少得我地四條腸粉呀！
「Brother! 」
我地四兄弟好激動咁擁抱住。
「你幾時歸隊呀！」阿波。
「我都唔知呀。琴日我搞咗壇咁大件事出嚟。你睇下出面啲家長，呢鋪我可能都仆街！」
諗諗下，成件事都係經我同肥B打交引起。
「你琴日就威啦！創校以嚟冇人可以郁到周Sir。你就做到！」杰少。
「大佬，苦肉計嚟架！我自己都傷架！」
「係呀！睇過！」阿偉：「一齊濕多佢一鑊啦！」
「哇！我屌！」
我地四兄弟雖然同一間學校，但呢星期被周Sir隔離咗，個感覺就好似成個月都見唔到班兄弟！我地一見如故，就互相戲弄一番。
玩到咁上下，我地被老師叫停。然後我聽到校門外嘅吵雜聲更加響，我就話：「奇怪，通常琴日件事都會保密。就算揚都唔會揚得咁勁。」
「想知咩事呀嘛？」阿偉占占自喜講：「搵個地方斟下先啦！」
於是我地四個就走咗入男廁傾下究竟發生咩事？
「你地睇下！」阿偉向我地展出幾條片同幾張相。
「咦？琴日我被周Sir撳低嘅片喎！我地收晒手機，你係點拍到架？」
「喂，兩部手機係基本啦吓話！」
「雖然解像係差啲，但啲聲收得好清喎！」我：「你想講而家出面咁大件事，係因為呢啲片？」
阿偉拍一下阿波膊頭，佢就話：「叫聲波哥先啦！」
「波哥。」
「你記唔記得波媽係咩人嘛？」阿偉：「波哥解釋比匡仔知。」
「我阿媽係家教會成員之餘，亦都係校董會嘅家長代表。」阿波。
「學校一有呢啲事就諗點樣收埋嘅。我琴日就估計到校長一定要班家長掩住把口。」阿偉：「大家都知周Sir同辦學團關係好密切。所以條廢人一直無料扮四條，校長都郁唔到佢。就算琴日單嘢啲家長都知道晒，我怕都煮唔死隻狗公，到時阿匡一定萬劫不復！所以我搵波媽幫手，彈晒啲料比佢。」
「其實琴日我阿媽就冇嚟學校，佢唔知咩事。」阿波接著講：「而呢星期我都有同我阿媽講你嘅情況。不過佢話老師點都係啱，所以都幫唔到手。但佢睇完條片，再提到我都比周Sir無理咁罰體能。我阿媽就著晒火！佢問其他家教會嘅成員發現學校想遮遮掩掩。一怒之下就話晒比家長知！比晒啲片佢地睇！」
「跟住就火燒佢老 母連環船，燒爛埋佢老 母周Sir嘅春袋！上到校董會，即使你係辦學團體嘅皇親國戚都要收皮！」阿偉陰陰嘴奸笑：「學校最緊張收生。呢次家長著晒火，周Sir冇得唔落鑊！」
「根本呢次就係鬥獸棋！如果唔係阿匡你呢隻老鼠捐入周Sir嘅象屎忽，根本就用唔到家長嘅力量去玩死呢條垃圾！」杰少：「搞你都算。佢仲想郁埋女王大人！所以一定要整死佢！」
「所以你係我地全校學生嘅英雄！敬老鼠匡！」阿偉。
「敬老鼠匡！」
「敬老鼠匡！」
我真係又開心又感動。當我以為得我一個單打獨鬥時，原來我有班好兄弟喺後面幫緊我！
一時間我熱淚盈眶，比出個拳頭，叫咗聲：「Brother!」
「Brother! 」佢地三個比出拳頭，我地四兄弟拳頭碰拳頭。
杰少同阿波慢慢行出男廁，繼續去食花生。阿偉搭一搭我膊頭，輕聲問：「點呀，你朋友同條女而家咩狀況？」
呢個時候我好得戚咁笑，兩兄弟唔洗多講，我比出個ok手勢，另一隻手伸出食指喺個ok手勢上出出入入。
阿偉先瞪大隻眼，然後佢兩眼通紅，就流出熱淚：「大哥！大哥！！！」
佢好激動咁抱住我！我都比佢咁真誠嘅反應感動到，佢唔單只係我明燈，仲好似親大佬咁照住我。呢刻我決定咗！他日我同Miss如果可以走進教堂，阿偉一定要係我伴郎！
「喂！你洗唔洗激動到流晒血鼻呀？」我見到阿偉又無啦啦流血鼻，一面狼狽樣。
「天氣乾燥唧！」
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師