真人真事改篇﹕師生戀﹕《最接近的陌生距離》: 第二十六章之三
喺𨋢入面，Miss喺手袋拎咗樣嘢出黎，再遞比我：「低B仔，請你食呀！」
佢送咗我一舊喺街買嘅飯團，佢自己都有一舊。
「哈⋯⋯我都係第一次返學前食早餐咋！」
「估到你啦。日日都咁趕，邊有時間食嘢呀。以後唔得咁架，知唔知？」Miss:「今日開始你唔可以餓住個肚返學架！」
「好啊！我實聽你話架！咁你要日日買早餐比我架喎！」
「哼！」
𨋢停低咗，我同佢踏上返學之路。可能因為時尚早，我都仲未見到其他同學返學。但我同Miss都唔敢冒險喺呢個時候手拖手，不過Miss又唔想咁快結束個拍拖時光，於是一行出公園時，我見到佢者暫時放低咗老師身份，用一個好輕快嘅步伐喺我面前一步一跳，仲哼起歌嚟。
「啦啦啦⋯⋯嘻嘻！」佢原地轉咗圈之後，就對我咬咗一下飯團，嘴巴痴咗粒飯，對住我傻笑。
今日天氣好好，陽光之下嘅佢永遠最靚。加上今日嘅文青Look真係令我好心動，同⋯⋯好幸福——我女朋友真係好靚啊！
「你做咩眼金金咁望住我呀？」Miss踏前，眼仔眨眨咁問我：「係咪因為我今日好靚呀？」
「係因為你嘴角痴咁粒飯呀。」我被佢可愛嘅表情搞到有啲難為情。
「哎唷？係呀？」Miss好造作咁扮晒而家先意會到嘴角粒飯。我見佢拎起咗之後，忽然對住我笑：「你嘴角都痴咗粒飯呀！哈哈哈⋯⋯」
Miss好跩跩咁將佢粒飯痴落我嘴角度！
「喂——！」
「哈哈⋯⋯！！」
Miss同我開咗玩笑。我冇諗過佢竟然成個細路女咁同我玩捉依因，我都唔知點解我又陪佢一齊癲。公園得啲阿婆阿伯，所以我同Miss都玩得有少少放。成個公園都係我地嘅嬉笑聲。
呢一刻，我感受到無比嘅幸福。放開師生戀呢個枷鎖後，我同Miss嘅愛情其實就應該要係咁。
就係咁簡單、平凡、幸福。
「嗱！你同我企定定呀。」我追到佢喘晒氣，我同佢就企咗喺千秋隔離。我拎起嘴角粒飯，笑住講：「俾返你！」
「低B仔！」Miss見我行埋黎即刻好驚咁叫停我。然後我見到佢個眼神轉去望向我左後方：「係周Sir啊！！」
「吓——？！」我好驚咁隨Miss嘅目光望咗過去。
嘖———！我臉頰一陣溫熱，感受到Miss嘅氣息，係佢溫柔嘅嘴唇觸感。
呢一下偷吻令我有啲怕羞，我紅晒面咁望返Miss。啊⋯⋯我都係第一次比佢搞到紅都面晒！
Miss見我咁令佢好滿足又蜜甜咁笑，話：「哈⋯⋯哈⋯⋯你個樣好白痴呀！」
咁樣偷襲我，當然要還擊啦！我同Miss又一輪追逐後，行返出大街。呢個時候，街上開始多返行人嘅氣息，而且著校服嘅人都陸逐多起嚟。雖然唔係我地學校，但Miss都好小心。佢轉過身黎望住我，叫停咗我咁講：「好啦，我地唔好玩啦，條街開始有我地嘅學生啦。」
我喺佢身前一個半身位停低，再拉開少少距離。雖然唔捨得拍拖時間咁快就完，但我已經好滿足。
「你企咁開做咩呀！埋嚟啦！」Miss差在冇上前拉住我。佢應該知道自然咁相處係對大家最好。
我同Miss繼續行路返去學校，期間我地學校嘅同學愈多愈多，經過我地身邊嘅同學都會同Miss打招呼。
「Miss Wong 早晨！」「早晨呀。」
然後我同Miss好好咁傾咗一陣。畢竟呢個星期發生好多事，我同佢之間有好多嘢想去關心，亦有好多嘢好令我擔心。當然我最想知就係周Sir同邊個爆房嘅真相。
我同Miss講分手當晚我見到時鐘酒店外泊咗周Sir架車，佢聽到我以為佢同周Sir去咗爆房後，佢即刻反眼上太空咁講：「唉，我真係比你激死啊！成日亂諗嘢！我憎到佢死呀，點會同佢上床啊！」
「咁佢第二日佢講到似層層咁嘛。」我將第二日周Sir喺訓導室外疑似要脅佢爆房嘅事講咗比Miss知。
Miss比我激到即時停低，叉晒腰咁講：「唔該你下次驚之前用下個腦啦！我嗰時仲上緊堂架！」
我唔好意思咁笑，的確當時好唔理性。
「分手嗰日下午我早退。一來情緒唔好啦。二來係副校長想我即刻去平機會投訴。」Miss:「副校長都警告咗周Sir即日開始唔可以接觸我。所以我點同佢爆房呀？」
Miss好想埋嚟扭我耳仔，但見到我猶有餘悸，就慢慢變返溫柔咁講：「低B仔，對唔住呀。都係我嘅問題，我知你其實好冇安全感。一有你唔清楚嘅事你就會好驚。上次Vick嗰件事都一樣。」
我被Miss睇穿咗個心，一陣感動襲上心頭。
「所以你係咪都好想知我因咩事點解冇返學三日？」
「嗯！」
Miss嘆咗氣，就話：「首先，係同學校嘅謠言有啲關係，我的確係想避開周Sir，但其實呢個唔係主要原因。」佢停一停，又話：「最主要原因係嗰三日我屋企出咗事。我要陪我媽咪，因為佢嗰三日⋯⋯想自殺。」
咩話？！原來咁大件事架！
「噢⋯⋯」我即時想起琴日我仲鬧佢唔理我感受，我即刻心都痛埋，連聲咁講：「Miss對唔住啊！哎吔⋯⋯我真係又蠢又衝動！對唔住！我唔應該咁樣發你脾氣！」
「哼——！」Miss有少少不滿，我見佢望一望條街發現冇我地學校嘅學生後，佢上前輕輕捏我個鼻一下，話：「你仲鬧我唔識理你感受！其實你都一樣呀！不過⋯⋯」
然後Miss輕輕咁趷高腳，錫咗我額頭一啖，就話：「我冇怪你呀，唔識未慢慢學囉。」
佢呢一句差啲搞到我喊，一來我被佢嘅體貼所感動。二來，我諗返起成件我真係冇好好去了解Miss嘅苦衷，佢唔止要一個人承擔咁多傷害同壓力，仲要承受我嘅細路仔脾氣。諗到呢度，我心都痛埋。
我同佢，一個唔會考慮好多嘢，另一個要心思熟慮。大人同年青人嘅分別就喺呢度。
「你做咩呀。」Miss見到我紅咗雙眼想喊出黎，就即時安慰話：「嗱！你唔好呀。好快到學校架啦！比人睇到就核突架啦。」
的確我最憎喺人地面前流馬尿，我冷靜之後，我就同Miss講：「Miss,無論點都好。我唔希望你一個人承受晒所有嘢。如果唔係，我會好難過。」
Miss聽完先係一怔，再微微一笑對我講：「你真一係一個不折不扣嘅細路仔。但你有樣嘢係我以前啲男朋友比唔上。」
「係咩呀？」
「你真係好保護我呀。」Miss怕怕醜醜又感動咁講。
然後我同佢對望咁一秒後就彼此甜笑，之後我地繼續行返去學校時，Miss又補多一句：「不過你下次可唔可以唔好再搵黎Sir救我？對住佢我有啲尷尬囉。」
「哈⋯⋯哈⋯⋯點呀？條橋得唔得先？」
「屎橋！」
「我有咩辦法呀？我冇可能同周Sir 1 on 1架嘛！真係得黎Sir幫到手！佢除咗煩啲，佢真係一個好人！」
「咁佢真係一個好人黎嘅，我都好感激佢！」
傾下行下，轉眼間終於到學校門口。但係門口上嘅狀況唔多令人安心。
= = = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師