真人真事改篇﹕師生戀﹕《最接近的陌生距離》: 第二十六章之一

真係冇諗過初戀原來可以咁刺激。

我同Miss個關係就好似攀緊一座山脈咁。每一次嘅危機就係登上凶險嘅山峰。捱得到嘅，爬到上去嘅，山峰上又係另一個美麗嘅新世界。

我同Miss已經爬咗兩座山峰，呢度嘅環境真係比第一座山峰嘅環境靚好多好多，靚到想繼續留低就算。雖然挑戰另一座山峰係可以去到另一個更加靚嘅地方，但始終都怕一個唔小心就跌咗落山嘛。

唉⋯⋯唔理啦。咁辛苦捱完一座山峰，不如同Miss享受下先啦。

= = = = =





嗶⋯⋯⋯嗶⋯⋯⋯床頭嘅電話響起。

喺被窩中嘅我連提起手嘅力氣都冇，好吃力咁喺被窩中伸手撳停佢，繼續我嘅美夢。

嗶⋯⋯⋯嗶⋯⋯⋯電話又響。

「邊個呀⋯⋯」我撥開被窩，一面睡眼惺忪。然後伸手拎起電話，接通之後放喺耳邊：「嗯⋯⋯？」

「低——B——仔！」





「嗯⋯⋯？」

把聲咁熟嘅？

「吓？！你仲瞓緊呀？」

「唔⋯⋯」

「你係咪想遲到呀？！」





「嗯⋯⋯唔係⋯⋯」

「即刻起身呀！Miss限你十分鐘內換好衫洗好面起身返學！」

「唔⋯⋯」

收線，我繼續鑽入被窩瞓覺。

琴晚我發咗一個美好嘅夢，就係同Miss⋯⋯嗯，係啊，喺夢入面Miss幫我破咗處。夢入面好真實，連出嘢嗰下感覺爽到我差啲醒。好想⋯⋯好想又發返⋯⋯唔⋯⋯發返呢個⋯⋯夢⋯⋯呼⋯⋯

⋯

⋯⋯

⋯⋯⋯⋯





「起身啦！」

有人好用力咁搖我個身。

但我隻眼好似被縫合咗咁，點都睜唔開雙眼。

嘖———！我感受到我塊面好似被人錫咗啖咁。

唉，我老母真係仲當我三歲咁。我轉一轉個身，換咗個睡姿⋯⋯即刻好想⋯⋯好想⋯⋯呼⋯⋯呼⋯⋯

「謝子匡！！」

突然間我被一把聲音嚇一跳！然後一股涼意襲身！我意會到暖笠笠嘅被已經被人揭開咁！我即時睜開咗眼！





朦朧嘅影像慢慢搵返焦點，我見到一位女性企咗喺我床邊。佢戴住眼鏡，著住長裙，成個文青咁⋯⋯

「媽咪？」我矇起雙眼，點望都望唔清面前嘅人。

「你瞓醒未呀？」只感到面前嘅人開始有啲嬲，向我行前一步，彎低身同我講：「你望真啲，我真係你媽咪？」

佢面目慢慢貼近我，使我眼前影像清晰起嚟——

「Mi⋯⋯Mi⋯⋯Miss?!」我嚇一跳：「啊！真係Miss你呀？點解嘅？！」

我冇睇錯嘛？我係咪仲發緊夢呀？Miss竟然叫醒我？！

「你捨得醒啦咩？」Miss雙手抱胸，嚴厲咁話：「而家幾點啦？」

真係Miss! 當我頭腦稍為清晰時，我記返起所謂嘅「美夢」其實唔係夢，係真實發生嘅事情！就喺呢間房內發生！！





話說琴晚——

「我同Miss行埋條斜路後，Miss仍然不捨，所以佢送埋我上樓。

鐵閘因為生銹，又長期冇人加返啲潤滑油，再到打開時啲鬼死咁令人毛管戙。

我條門匙吃力咁喺木門鎖匙孔打轉，卡一聲，大門打開，喺我同Miss眼前嘅係一片狼藉嘅客廳。

『唉！比你見到間屋好亂添。』我唔好意思咁對住Miss笑：『我返到屋企啦，你都返去休息啦。』

Miss喊到眼腫嘅樣，再加個笑容，真係有種又可愛又奇怪嘅反差感。

我行咗入屋，再回頭望佢，就見到Miss微笑咁輕輕點一下嘴唇。





『我要呢個⋯⋯』Miss想要Goodbye Kiss。

我笑咗一下，上前想錫佢之時——

.
.

我一手就拉Miss入屋企!

.
.

嘭——一聲我關上大門。

我將Miss迫喺門前。佢個樣好驚訝！佢應該預唔到我會拉咗佢入屋。

Miss佢一雙仲有淚光嘅大眼又驚又期待。

佢知我呢刻諗緊咩，我又知佢諗緊咩。喺對望一笑之後——我們擁抱，熱吻，互相解開身上嘅『束縛』⋯⋯」

係囉！呢段感情好難先可以復合返，咁梗係大肆慶祝一番！所以就提早實行「破處」計畫！但Miss佢冇過夜架喎？我琴晚明明仲送Miss落樓下搭車添。點解又⋯⋯？

「點解你會喺度嘅？」

Miss整咗個「Yo Yo式黑面」比我睇。呢個時候阿媽又衝咗入嚟，勁唔好意思話：「老師，唔好意思啊！我呢個衰仔真係好失禮呀！」

話口未完，阿媽即刻拉我落床，話：「起身啦衰仔！你要班主任特登上黎嗌醒你！你知唔知醜架？！」

我落咗床，經過Miss身邊時仍然一面疑惑咁望住佢。

= = = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師