真人真事改篇﹕師生戀﹕《最接近的陌生距離》: 第二十一章之三

由於周Sir落左指示，我要一直留喺「臭格」，所以我冇得返上去上堂。

我就坐喺度戇居居咁等運到。

「臭格」個環境好靜，靜到連秒針跳動嘅聲音都聽得清楚。我內心嘅悲憤慢慢平靜落黎，好似知道自己已經判左死刑，對下一秒嘅事一啲都唔想關心。然而，喺下一秒——

卡嚓——！

訓導室嘅門慢慢咁打開左，探頭入黎嘅人令我平靜左嘅心情又開始慢慢激動起黎。





「Miss。」我好平靜咁講。

Miss一如往常一面老師嘅嚴肅，但係當佢入黎訓導室一刻。佢好慌張咁搵嘢遮住大門上嘅玻璃。然後拎住藥箱黎到我面前。

我望住Miss，留意到佢面目唔帶半點情感。只見佢打開左藥箱準備料理傷口嘅藥物同生理鹽水。

佢拎起我隻手，見我指骨關節都損晒，就板起口面咁講：「你打人打到自己隻手傷晒啦。」

「佢地抵打。」我仍然好平靜。





Miss聽完深呼吸一下，應該又被我激親。明明Lunch佢提我唔好衝動，轉個頭我就打人。

Miss呢一刻一定好嬲我。

嬲我係一個唔成熟嘅細路仔，嬲我唔係一個成熟嘅男朋友。

「我咪講過你唔可以衝動嘅。」Miss好平淡，佢幫我洗傷口咁講：「你打到其他同學好傷。而家人地家長可能會報警。」佢長歎一聲，似乎好擔心我。

「佢地想對你⋯⋯」





「都唔得！你應承過Miss唔會打交架！」Miss雖然好平淡，但從佢呼吸可以知，佢情緒開始波動：「你一郁手就係你唔啱！你就算幾有道理都好，都係你唔啱！」

佢處理完我雙手後，我見到佢注意力放左喺我件滿佈污垢嘅PE衫上面。Miss先呆左一下，就深呼吸一下。表情有微妙嘅變化。

「Miss，我有聽你話。我忍左成個上午——」

我望住Miss好平淡咁講。佢而家幫我處理我面上、額頭上嘅傷口。但我對痛楚好麻目，感覺唔到痛楚，或者心裡嘅委屈已經蓋過一切。

「——我被周Sir革走左籃球隊時，我都有聽你話，忍住⋯⋯一直忍住——」

Miss望到我青一片腫一塊嘅面目，佢鼻子同雙眼開始紅⋯⋯

「但係當佢地羞辱你時，我就記起星期六嗰日你點樣被人侮辱。所以我——」

「哇——！」





Miss終於忍唔住，緊緊咁抱住我大喊。

「佢地太過份！！」Miss忍住喊聲，好怕被教員室裡其他老師聽到：「我見到你比周Sir蝦，我都好嬲！！」

佢見到我面上面烙咗一個紅紅嘅掌印，佢即刻喊住話：「周Sir頭先打你？真係好過份呀！！」佢再抱住我，好似媽媽咁愛惜自己個仔咁擁抱住我。

我被Miss嘅情緒所刺激，我想用眼淚去發洩今日嘅委屈。但一陣又要同狗公周大戰，我係唔可以喊！

「低B仔⋯⋯其實你已經做得好好。」Miss好深好深咁錫左我額頭一下：「你好乖。你忍得住已經好叻仔啦！」

Miss體貼到我心情，令原本築起左嘅情緒圍牆開始露出缺口。我鼻好酸，雙眼好熱，但我一定要忍住。唔可以輸比狗公周！

「你用年青人嘅方法冇得同佢鬥架。」Miss撫摸我髮頂，既悲又憤咁講：「我知你保護我！而家就交比Miss處理啦，好冇？」





儘管我努力壓止表情變化，我阻止唔到眼角滲出淚水。

「我一定會保護你！」Miss抱得我好實，我聽到佢把聲好咬牙切齒咁講：「冇人可以再——」

.
.
「傷害你！！」
.
.

喺訓導室入面，我同Miss努力壓抑哭聲，感覺呢世界已經將我地孤立起黎。師生戀係一個詛咒？所以我同佢都落得呢個下場？

我同Miss都冇做錯任何事！

但點解厄運會如影隨形咁伴隨我地呢？難道⋯⋯





真係詛咒？
= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學