真人真事改篇﹕師生戀﹕《最接近的陌生距離》: 第二十一章之四
訓導室一啲都唔隔音。所以隔壁嘅會議，每一句談論緊我嘅說話我都可以聽得一清二楚。
「⋯⋯謝子匡呢個學生一直無心向學。成績同操行都唔合格，所以今日嘅事我建議記佢大過，其實都係方便同教育局交代之後開除佢學藉嘅事。說服佢媽咪幫佢轉校就交比黎Sir做。趁而家十月，要轉校都唔難嘅⋯⋯」一聽就知呢把聲係周Sir。
「⋯⋯我地學校向來都保持住100%入U率。睇返謝同學個表現，佢行為同成績一直都冇進步。今年仲唔好好珍惜試升機會，上學期成績同操行一直惡劣。我睇唔到佢有咩進步空間。或者周Sir個建議係啱嘅，為左入U率，我贊成周Sir建議，副校長點睇？」教務主任梁Sir，佢最想上位。
可惡！周Sir一開始就已經想煮死我！
「我係謝子匡同學嘅班主任。我要為我學生講句公道說話！」Miss，我聽得出佢已經好努力令自己冷靜起嚟：「我反對梁Sir嘅說法，謝子匡同學佢唔係冇進步，起碼佢中文成績係進步緊。其實點解要用一個學生嘅過去嚟決定佢未來適合唔適合喺度讀書？同埋我認為今次係訓導組嘅會議，會議嘅重點應該係討論今日謝子匡同學嘅行為問題。我地要討論個罰則，並唔係討論去留問題！我懇請在坐咁多位老師必須清楚呢點，呢次係關係到我班學生嘅福祉！所以我反對將謝子匡同學嘅操行成績同今日嘅事件綑綁一齊討論。請各位老師公平處理！」
Miss好努力咁用佢嘅方法保護我。唔知周Sir個表情係點？哈⋯⋯一定好難睇，佢日J夜J嘅女神而家企喺我呢邊。
「⋯⋯我贊成Miss Wong個說法。去留問題可以睇埋佢上學期考試個成績再決定。當務之急係處理佢中午打交嘅事。因為對方家長打黎，我地需要比個交代佢。」副校長。
你地要比個交代人地家長？咁邊個比交代我老豆老母呀？！
「唔緊要嘅。去留問題可以等埋上學期個考試成績先。」周Sir個樣一定好大枝嘢：「不過今日嘅事我覺得唔可以放過佢。我建議即刻記佢兩個大過。副校長你認為點？」
我聽得出佢把聲係想迫副校長支持佢！跟住我聽到一陣嘅哄動，似乎有老師認為過重。
「兩個大過？！」Miss激動起黎：「以佢而家嘅操行紀錄。如果記左兩個大過佢就唔可以參加上學期嘅考試架啦！」
周Sir個衰樣一定好得戚咁笑緊！佢咁做即係變相要我自知難而退，自行退學，佢真係好卑鄙！
「我反對。」黎Sir:「其實剛才嘅打交事件嘅起因係有同學想偷拍Miss Wong裙底。謝同學不齒對方所為先發生呢件事。唔可以剩係罰謝同學一個！」
「對方家長話會報警處理。我認為必須先重罰謝同學。等我可以說服對方家長唔好報警住。」周Sir：「一報警就會有機會上報。一上報紙就會驚動家教會。到時我怕個影響更大，例如來年收生。大家都知我地學校向來都係熱門。如果收生少左，校董會一定會將責任推比所有老師。包括兩位副校長同校長。所以謝同學係必須重罰！」
「冇錯。我地要有個交代比受傷同學嘅家長先！先記謝同學一個大過！」另一位老師。然後又一陣議論，我聽到佢地都贊成先將我落鑊！
「記一個大過先。等我地好作交代。」教務主任梁Sir。
「你地太過分啦！！」Miss忍唔住怒吼：「你地仲係做教育架咩？你地為左怕驚動家教會，怕影響更大就犧牲我學生嘅福祉？！」Miss停左一陣，抖左幾淡氣，然後就哽咽咁講：「我學生都有被人打架！特別係你！周Sir，你要解釋一下點解我學生入左訓導室之後，佢塊面會多左個掌印！」
「佢情緒失控想打我，我制服佢唧。」周Sir把聲好囂張，好討厭：「點解。你心痛呀？打親你個寶貝仔？」
然後我聽到Miss嘅喊聲。可惡⋯⋯我⋯⋯幫唔到手！ 我想像到佢一個女仔要面對住咁多老屎忽幾咁委屈，我就好難受！
其他人對周Sir囂張氣焰竟然冇反應？明知Miss係新人，係女仔一個！佢地竟然冇一個去幫佢？！
「如果各位老師冇異議，就決定首先記謝同學一個大過。」
「一個大過都唔可以記！」Miss拍左一下枱：「唔可以！」
「Miss Wong公道少少。攬自己班嘅學生唔係咁攬架。再加上⋯⋯」周Sir：「你同佢熟得滯其實唔應該出現喺呢個會議。」
周Sir講到個「熟」字時特登讀大聲啲，擺明就想玩嘢！其他老師係唔會聽Miss講！我聽到Miss咁樣單打獨鬥，我個心又急又痛！
喺大家議論緊我個下場時⋯⋯
「我反對！」黎Sir竟然出聲:「呢件事唔係謝同學欺凌其他三位同學。我必須提醒各位老師，事件起因係有同學要偷拍非禮Miss Wong在先！謝同學為左保護Miss Wong先出手。佢用左一個錯嘅方法，但佢始終都係青少年！佢需要嘅係教導！我地身為老師係要教好佢，唔係當佢癌細胞切走佢！」
黎sir愈講愈嬲：「請身為教育工作者嘅你地，好好咁問下你地嘅良心，點為之對我地學生先係最好！」
黎Sir一向長氣又煩又騎呢，但估唔到呢刻佢講嘢咁有power!
死⋯⋯我第一次覺得個傻佬有啲型添！佢都係新黎老師，咁樣越級挑戰周Sir同其他老屎忽⋯⋯堅型呀！
而家Miss總算有盟友，我放心咗啲。
「黎Sir你應該唔知道，謝同學今日態度有幾惡劣。佢今日想郁手連我都打埋。」周Sir。
「係！」黎Sir好肯定咁講：「我仲聽到周Sir你用粗口鬧佢。雖然我唔知道先後次序，係佢想打你先，定你講粗口鬧佢先。但我好肯定係周Sir你今次嘅處理手法引致謝同學情緒失控嘅原因！包括！你喺體育堂不斷挑釁佢情緒。」
「阿黎Sir, 嗰個時候你應該教緊書。點解你會知道操場發生嘅事？」
「你唔好模糊焦點。你已經唔係第一次借訓導權力去迫走學生。有一個仲差啲自殺。大家仲記得Matthew嗎？」黎Sir停一停，再講：「在坐有部分老師喺當時都差啲做左殺人兇手！」
「我見到。」Miss：「體育堂時周Sir強迫謝同學做超出佢身體負荷嘅體能訓練！呢個絕對係體罰嘅一種！」
周Sir冇聲出，應該好惡咁望實Miss同黎Sir。佢應該冇諗過成日被佢老點開嗰個傻佬黎Sir會喺關鍵時刻有咁強嘅戰鬥力，仲要有Miss助功添。
「副校長，我認為周Sir喺呢件事嘅處理上欠缺公道。喺打交發生前，謝同學嘅情緒已經相當唔穩定。所以謝同學係情有可原！我反對記謝同學大過。」黎Sir：「副校長請你主持公道。」
會議室靜左一陣之後，副校長就話：「我認同黎Sir同Miss Wong嘅講法，學生福祉係最重要。不過而家對方家長都要比個交代佢，我建議———」
.
.
「隔離停課，再記兩個小過。」
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師