真人真事改篇﹕師生戀﹕《最接近的陌生距離》: 第二十章之四
Lunch， 我同Miss偷吻嘅樓梯間，我又被Miss「罰企」。
「我知道晒啦。」Miss繼續用老師身份同我講嘢，但雙眼表現出嘅神情表示佢內心都好難受同好擔心。
我條氣仲係好唔順，我知Miss想氹我，但我實在冇辦法好冷靜同佢傾。
「我再買過對比你啦。」Miss望住我對鞋講。
我搖一搖頭：「唔洗啦。就算係你買，意義都唔同。呢個係你送比我嘅第一份禮物。」
我聽得Miss嘅呼吸聲有啲唔同，似乎係情緒波動所引致。
「我今日想等埋你先走。」我。
「唔洗啦。費時你又被周Sir玩。」Miss:「你唔使擔心我，Miss Lau會同我一齊走。」
「返到去比個電話我。」我好細好細聲咁講。
「嗯！」Miss點一點頭：「我上返課室先。你自己去休息下。」
Miss行上層前又回頭講：「記住唔好衝動。我會幫你處理架啦。」
我目送Miss離開。唉⋯⋯我仲可以去邊，一陣又比周Sir見到又麻煩。所以我繼續留喺原地，傻傻地企左喺度。
亦因為咁，我見到有三個同學好鬼鼠走左上黎。
「喂⋯⋯佢上左去呀。」一個外型黑實，樣子古惑嘅男仔望左樓梯上面，再向下面上緊黎嘅人講：「快啲啦你地！」
然後尾隨嘅係身高同我差唔多，但賊頭賊腦嘅肥仔。佢地動作既快又輕，一步一步咁行左上樓梯，向高層地方去。
呢一刻我心底有啲覺得唔對路，於是就尾隨佢地。
「佢去到邊呀！」行最尾嘅人講。
「應該係五樓。」最頭嗰個再向上望：「喂！我好似見到呀！」
「咩色架？」
咩話？！
「屌你！聽到我扯晒旗添！」
「咩色㗎啫？」
佢地加快速度行左上去。我跟埋去時，我漸漸咁聽到高踭鞋嘅聲音。呢個時候我心底嘅不安更大，而嗰三個鬼鼠古惑嘅男同學好似馬騮咁，擒左喺樓梯邊。
「呢個位啱晒！」
「呢鋪仲唔比我捕到你！信我啦，上次係豹紋今次可能斑馬！」
我隨佢地視線向上一望，我見到樓梯間有一個慢慢行緊上去嘅身影。嗰個係一個女性身影，一個著裙嘅身影。
係⋯⋯係Miss!
「兄弟準備！影低佢！」
「平時扮正經。實際都係雞呢唧！」
我好似聽到大腦理智斷線聲音。
「影乜撚嘢裙底呀！！」
我衝去已經拎左手機嘅死肥仔，從後一手箍佢頸，另一隻手搶佢手機再掉左落樓！
「喂！你條仆街呀！」
我冷不防被佢啲同黨上前打左一拳！痛到我天旋地轉！當我企定左身體後，我已經被人從後鎖住。而我前面就有人出緊拳，想正面咁打爆我個鼻！！
「你班人渣！！」我一個前蹬，踢中嗰個人嘅雞心！佢一下失去平衡就成個人球咁碌左落樓梯。
我再向後推進，將從後鎖住我嘅人逼埋牆！右腳提起，踩佢腳趾！！
「嘩——！」我身後嘅人痛叫一聲，佢鎖住我嘅手都鬆開。我一爭脫，就轉身打出一個勾拳！
嘭———！
「影乜撚野裙底呀！!」
「哇——呀！」
我右手回勢護頭，左手握掌成拳，半身微蹲，轉腰發力打佢下腹！！
嘭——！
「蝦Miss！你地夠膽蝦Miss!」
「嗚哇——！」
我右拳放喺腰際，微蹲嘅身體向上彈起，借力打出一記上勾拳！
「去死啊！你班人渣——！」
「嗚——！」
佢被我打中下巴，剎那間，佢痛到叫唔出聲。我再連環出拳！打佢！打死佢！
蝦我女朋友！唔准蝦我女朋友啊！！
佢啲同黨上前幫拖。但極度憤怒之下，我除左食左幾拳外，我將其中兩個推開，集中打頭先拎手機出黎影相嗰條死肥豬！我徹底將佢當成沙包咁打，每打一拳我就回憶起周Sir嘅面貌！每打一拳，我就記起周Sir點樣摧毀Miss送比我嘅禮物！
每打一拳———
.
.
『所以老咩師唧！天下烏鴉一樣黑！再睇你今日呢身打扮就知你根本就係——雞！！』
.
.
每打一拳，我都記起啲人點樣羞辱Miss！!！
唔可以原諒——！！蝦我女朋友係唔可以原諒啊！！
我徹底將佢當成沙包咁打！我要徹底發洩心中嘅烈怒！
此時佢啲同黨趁我好專心打一個目標時，再從後將我鎖住，拉開。然後一埋亂拳猶如雨下咁落喺我身上。
我全身劇痛之際，有一把聲叫停晒所有動作！
「你地做咩？！全部同我停手！！」
係一把女聲。
我被人打到瞓低，模糊嘅視覺慢慢搵返焦點。我見到Miss企喺上層嘅樓梯口，面紅耳赤咁叫。
佢見到我口腫鼻青，又倒地不起，一時間唔理老師身份就衝左埋黎。
「你點啊！」Miss眼紅紅咁，好似想喊：「起身先。」
Miss將我扶起身時，又變返老師，好嚴肅咁講：「你地四個做咩打交！」
「我點知呀Miss.」拎手機嘅同學一面怒意咁講：「我唔知點解會比人打。我都唔識佢嘅。」
「我做證。係我地比人打先架。」
佢地喺度耍賴我就更火滾，先爆粗再講：「佢地想偷影你裙底呀！」
「係又點呀！」拎手機嗰個肥仔又嘈：「係人都知Miss唔怕比人睇架啦！」
Miss個樣變得尷尬！
又羞辱Miss?!
「黎啊！我打死你條仆街！」我已經衝上前，準備好第二局！
「你同我企好！」Miss用上全身力氣將我撳住。好嬲咁環視在場嘅人。
雖然Miss身形比在場所有男仔細小，但佢發嬲嘅氣勢的確震服左所有人。
呢個時候——
「Miss Wong。」
我望去上層樓梯口，我見到周Sir以君臨天下嘅姿勢慢慢行緊落黎。
「交比我處理。」佢輕輕咁拍Miss膀頭，當正自己救左Miss咁。
「你地全部同我去訓導室！！」
Miss喺我旁邊，佢想陪埋我一齊去。但條狗公周就話：「Miss Wong，你跟前面嗰三個。阿匡交比我。」
Miss Wong 點一點頭，就憂心咁望住我，然後佢就同羞辱佢嘅同學落左去訓導室。
周Sir喺我面前，報以一個令我又驚又嬲嘅微笑：「我話過架嘛——」
.
.
「——唔好衰喺我手上啊！」
周Sir逐個字慢慢讀出黎，每講一隻字就輕輕咁摑我塊面一下。
= = = =
ig ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師