真人真事改篇﹕師生戀﹕《最接近的陌生距離》: 第二十章之三

今日同狗公決戰第二局，首先比狗公周入左一粒。PE堂會係第二場比賽。因為狗公周正正係我體育老師。

「跑快啲！你班馬騮剩係識打機！一啲運動都唔做！」

周Sir企喺操場中間當正係警校教官咁操我地。

「頭先點呀？」我同阿偉水平咁跑。

「冇咩嘢，兇一兩句唧。你呢？」阿偉。





「我⋯⋯朋友可能黃左。」我。

「大鑊。執生啦！」阿偉跑快少少，過左我啲啲：「淡定有錢剩呀。」

好兄弟又比枝針我補血，一時間暖在心頭。

但係⋯⋯

「阿匡！你出黎！」周Sir好大聲叫我。唉⋯⋯唔慌好嘢。





我行到操場中間，之後佢就話：「頭先好好傾吓話。沙嘴四式！！」

佢一向好鍾意用懲教方法去教訓學生。但我不忿嘅係，佢呢個道德敗壞嘅人有咩資格教訓我！

我好不滿咁望住佢。

周Sir好趾高氣揚咁行上一步，話：「做啦。仲唔做。係咪想你啲兄弟陪你？」

「你⋯⋯你⋯⋯你咪咁得戚⋯⋯」





喺烈日之下，我個拳頭握得好緊，好緊！好想一拳打爆呢隻狗公！

「唔做呀嘛！得⋯⋯」周Sir大聲叫：「黃佳偉、張禮杰、許波，即刻同我出黎！！」

又搞我啲兄弟？！

「你係咪玩到咁大呀！」

「咩呀！」周Sir行埋我面前，貼到好近，壓低把聲講：「條氣唔順呀？吓？係唔係唔撚順呀？」

佢推我一下，就大聲講：「係咪條氣唔順呀！打我囉！」

我雖然好嬲，但我仍然記住Miss話唔可以衝動。所以我點都要忍。我只可以好嬲咁瞪實佢！

周Sir等其他三條腸粉黎齊之後就話：「你地四個係校隊架嘛？體能咁差點幫學校拎獎呀？即刻所同我做沙嘴四式，做到我滿意為止！」





「阿波邊係校隊呀！」我替阿波唔抵，好嬲咁講。

「阿匡！算啦。」阿偉頂左我一下手肘：「唔夠佢玩架！」

「阿Sir， 沙嘴四式吓話。我耍家呀。」阿偉認低威，想氣氛緩和一下：「等我帶啦！兄弟埋位！」

阿偉有佢理由，所以我幾嬲都好只可以無奈接受。喺我要做「沙嘴四式」時，我望左去教員室嗰層。原來Miss一直都望住⋯⋯

= = = =

我身體就黎被太陽融化。 其他三條腸粉一早做晒沙嘴四式，得我一個仲喺操場做緊。我流出嘅汗流到操場成地都係。

「二！」





周Sir指揮住我，我將身體壓低但未完全壓晒喺地上面。周Sir上前輕輕咁用腳提起我下巴⋯⋯仆街！竟然用咁污糟嘅鞋羞辱我？！

「下巴高啲。個身呀，講左幾多次呀，唔准趴晒喺地！」

我隻手已經冇晒力，已經震晒。

「頂唔順呀？」周Sir用腳輕輕咁壓喺我背脊：「跌低左重新再做過！」

我同佢角力緊，但⋯⋯我邊仲有力同佢玩。我唔夠力就成個人趴左落滾燙嘅操場地！

雖然唔至於會辣傷，但已經唔好受。

周Sir喺我面前蹲下身，拍一拍我個頭，話：「同我玩吓話？有排你玩呀！起身！」

我起返身時，見到其他同學已經企晒喺場邊。





周sir已經拎住一個籃球，話：「我好唔鐘意你地籃球隊嘅表現。今日順手黎個測試，邊個通過唔到測試嘅就get out！ 我只會訓練精英，唔會留住啲——」

「——垃圾。」周Sir向我望過黎。

騷擾Miss, 搞我啲兄弟都仲未夠，仲想踢我出籃球隊？

周Sir所謂嘅測試其實只係同佢鬥下波，喺限時內入到波嘅就當合格。唔洗問，我已經知佢想點。

嘭——嘭——嘭——

籃球一彈一跳，有啲似行刑前嘅喪鐘鐘聲。周Sir好得戚咁望住我，佢一定諗到好多把戲去玩殘我。

我兩隻手因為做完沙嘴四式已經震晒，我唔知接下黎會係點。 只聽見周Sir哨子嗶一聲，佢趁我分神之時，一個勁力將成個球掟埋黎.





我根本避唔到，我聽到頭入面一下撞擊聲，我眼前就黑左一秒，就暈暈地倒地。個籃球喺我旁邊一彈一跳。

「哎———」我個頭好痛，亦都好嬲。

「垃圾。」周Sir趁機羞侮一番：「到你開波！」

我拎番起籃球。雙手嘅酸軟令我無法控球。開波冇耐，就被周Sir搶佔攻勢。我同佢喺籃板下纏鬥，但我體力不繼，佢係可以好輕易咁入球。

但佢冇咁做。

呢個時候我隻腳痛左一下。我見到佢踩實我隻腳。

「Sorry。」周Sir以挑釁嘅笑容去講。

然後佢又一輪花式控球，我再進攻之時，隻腳又痛多下。

「哎——！唔好意思。踩親你添！」周Sir:「對鞋係你條女送比你架？好靚喎！」

我⋯⋯我就黎忍唔住。好⋯⋯好想⋯⋯！

佢羞辱我都算，佢竟然將Miss送比我嘅禮物⋯⋯

咁樣摧毁Miss第一份送比我嘅禮物！！

我控住波，佢想埋黎搶時，我知佢想趁機踩我！所以我一個假身呃佢，再伸隻腳出黎——

噗——！周sir被我絆倒，姿態仲好狼狽添。

成班唔妥佢嘅同學即刻笑左出聲，我仲聽到啲口哨聲添。

周Sir即時火起，走左埋黎：「打波定打人呀！」

我用力將籃球掟落周Sir度，上前一步：「打你呀！忍撚夠你啊！過黎呀狗公！」

成場氣氛急劇變壞！我已經做好左同周Sir隻揪嘅準備！

周Sir隻眼對我上下打量，把聲壓低咁講：「你知我係咩背景架。你唔好玩嘢呀。」

「打我呀。老師打學生，睇下邊個死先！」我上前一步，挺起個胸，同佢鬥望：「呢度大把人睇住！打撚死我呀死狗公！」

輔警又點？訓導又點？佢都有自己嘅制肘。我只要利用呢點，我就可以撚死佢。

「你最好打死我添呀！我搵人call記者黎都仲得添呀！」

周Sir嬲到牙癢癢，睇黎佢唔敢眾目睽睽下亂黎，但佢總要拎返少少面，所以對全班講：「你已經取消資格！以後你唔再係籃球隊嘅人！」

之後佢再喺我耳邊講：「你喺學校最好唔好衰喺我手上呀！」

徹底敵對！

我同周Sir差少少就開拖，最後係佢自己落台。

我慢慢冷靜返坐喺一邊，三條腸粉走左埋黎。

「Brother!」阿波比左個拳頭出黎。我地四兄弟做返指定動作。

「搞到你地⋯⋯Sorry。」我內疚咁講。

「水裡水裡去嘛。」杰少。

「講呢啲。」阿波。

「點都好。大家小心啲。」阿偉。

我望住Miss送比我嘅波鞋，佈滿晒嗰條狗公周嘅鞋印，我個心痛到裂。周Sir唔單單係想羞辱我。仲想親手拆毁Miss送比我嘅嘢。

唉，啱啱先第四堂，點捱到放學呀？

= = = 

ig ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師