真人真事改篇﹕師生戀﹕《最接近的陌生距離》: 第二十章之二

「你冇事呀嘛？頭先成堂神不守舍。」

小息，我同Miss行返去琴日條樓梯扮罰企。我知Miss好擔心我，但因為喺學校，佢真係唔可以好好咁安慰我。

「呢次⋯⋯大件事。」我仲有啲驚咁講：「周Sir可能知道左我同你拍緊拖。」

「吓？！點解嘅？」Miss都嚇左一跳。

「今朝周Sir的左我去『臭格』，佢初初盤問我高年級師兄去叫雞嘅事。」我：「但我發現佢根本唔係問呢樣嘢。」





「之後呢？」

「佢借題去激嬲我，話我做埋啲嘢唔見得光。」我個心仲係嬲緊：「我嗰時剩係覺得佢太過份。我同你有幾唔見得光？跟住我就⋯⋯⋯」

我同Miss冇嘢係唔見得光。諗到呢度我愈諗愈嬲。

「我就唔小心講左我星期六去左拍拖。」

「哎吔⋯⋯」Miss低頭嘆氣。





「但我冇提同邊個拍拖。」我：「佢問我去邊度拍拖時，我冇答佢。但喺走嘅時候，因為呢對鞋⋯⋯」

我指一指對鞋，Miss望左眼。

「佢話對鞋拎黎行山就太浪費，所⋯⋯以可能佢認得呢對鞋。佢係訓導，佢應該好查嘢仔細，唉⋯⋯呢次穿煲啦！sorry Miss。」

講完之後我同Miss靜晒。我見到佢強作冷靜緊。過左一陣，Miss就話：「唔關你事嘅。我覺得佢嗰日就知咩事。因為我耍開你嘅理由其實好牽強。」

「嗯。」





「我估佢當時知我同男朋友一齊。但唔知嗰個係你。」Miss：「直至你今日著左呢對鞋返黎。佢就肯定星期六同我一齊嘅人就係你。」

「Sorry Miss。我唔應該著呢對鞋返黎。」我好內疚咁講。

「傻啦，你點會預計到會咁。反而係我有責任提你，唔可以著呢對鞋返黎。不過佢又冇實際證據例如有相之類去證明我地關係。我諗暫時唔需要咁驚。」Miss好想行前一步，摸著我塊面安慰，但佢唔得。佢繼續話：「但係我地都係小心啲。繼續保持距離。」

「都已經保持咗啦。」我有啲抱怨咁講，點解我同Miss唔可以好正常咁拍拖。

「係咩！」Miss個樣又嬲又Sweet:「你琴日喺呢度對我做左啲咩呀？」

我同佢回憶返琴日嘅刺激之吻，兩個不約而同咁笑。

「你自己都覺得刺激架喎！」

Miss甜甜一笑之後又慢慢變返嚴肅，話：「唔好再咁衝動啦。呢件事等我處理啦。好唔好？」





等你處理？我驚我忍唔住囉。

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師