真人真事改篇﹕師生戀﹕《最接近的陌生距離》: 第二十章之一
我成個人呆晒。
周Sir煞有介事咁望到我實一實，我望返佢，我完全唔識講嘢！佢咁問得嘅，咁即係星期六嘅事穿左煲？
係幾時穿左煲架？我扮弱智走開嗰時？定係我同Miss落山時佢全程睇到實？ 死啦，呢次點拆呢？
「而家即刻上去訓導室。我處理完早會就招呼你。」
「周Sir。」
「想點？」
「星期六做啲咩，唔算犯校規喎？」
佢行到我面前，一面囂張跋扈咁冷笑左一下：「唔犯校規。但係你個校服儀容唔合格。的水長，過眉，仲懷疑你染髮！」
「我上星期先剪咋！點會過長呀！」
「我話長就長。」周Sir一面你奈我咩何嘅樣再講：「點呀，唔順呀條氣。我整多幾條違規過你仲得添！即刻同我上去！！」
我心中有萬般不忿，但佢喺學校係大晒，我根本冇得反擊！我瞪實佢咁離開，好想點都贏返啲氣勢出黎。
但係一件嬲事未完，另一件嬲事又黎。我剛剛行到教員室嗰層，就見到三條腸粉就被人一致排開企左喺訓導室出面！
「brother。」阿波一面無奈。
「brother。」杰少見到我苦笑左一下。
「你地咩事呀？」我吃驚咁講。
「唔洗估都知啦。」阿偉：「有人公報私仇呀！」
「周Sir?」我：「佢一定報復我地琴日阻住佢媾Miss呀！」
我呢刻嬲到想打鑊佢！騷擾Miss都算，仲搞我班兄弟！
「冷靜啲呀大哥。」阿偉：「正面你唔夠佢玩。隨時屈你一個大過都仲得。」
「唔洗擔心我地三個。」阿偉再望住我無奈咁講：「執生啦。」唔係下話。連偉哥都咁講？
之後我坐咗入去訓導室，喺等周Sir黎嗰時，我好好冷靜下啲情緒，應對一陣間嘅事。
「冷靜⋯⋯未必關行山事⋯⋯定啲黎。」
過左一陣，訓導室嘅門打開左，有一個碩壯嘅男人入左黎，呢個人就係周Sir。佢拎住杯熱啡同埋文件入黎，當佢一坐低時，我覺得成間房嘅氣氛變晒。我完完全全被眼前呢個人嘅氣勢所震服。
我刻意回避佢眼神，隻手喺枱底下不安咁柔搓。
「唔洗驚喎同學。」周Sir飲左啖啡，又講：「合作啲就得架啦。」
唉，聽到呢句唔慌好嘢。
「協助調查唧。你都知架，犯左事嘅學生，我唔會比佢坐架。」周Sir對住我笑，好噁心。
「有嘢就講啦。我仲要上堂。」
周Sir笑一笑：「星期六你做過咩黎？」
「私人時間，冇必要答你。」
周Sir點一點頭，話：「都估到。我就有張相，我想確認一下相中人係咪你。」
相？仆街，係咪我同Miss行山相？
然後佢喺疊文件度拎左張前後反轉左嘅相出黎。佢示意我反轉張相睇下。
我望住佢，內心驚得好緊要。究竟係咩相呢架？如果真係我同Miss約會嘅相，咁我點解釋？
「反轉睇啦！做咩呀你？」周Sir用一個勝利者嘅眼神望住我：「你做左衰野？」
開又死，唔開又死！
「係咪做左啲唔見得光嘅事呀？」
唔見得光？
你老味我同Miss拍拖會唔見得光過你！我同Miss兩情相悅會污糟得過你周圍食女？！
「我去拍拖有幾唔見得光呀？」我被佢激到嬲嬲地就揭開左張相！
當我揭開左之後，我成個人呆左。
「咩黎架？」竟然唔係行山相，只係一張好普通嘅相。
「有人向我投訴，我地學校高年級有人放咗學，校服都冇換就去左『買球拍』。」周Sir指住張相入面嘅人：「係咪你呢架？」
相中只係一個背影，佢著住我地學校嘅PE衫，似乎正行入去一幢舊式大廈入面。
「買球拍都犯校規？」
「你真唔知定假唔知呀？即係叫雞呀！」周Sir再問：「係咪你黎架，講啦。」
「我點會去呢啲地方呀？！」
「咁你講下星期六你去左邊先。」
「私人時間關你咩事呀？！」我就黎忍無可忍，講：「再講呀！你覺得我有罪係應該搵證據郁我！」
周Sir冇聲出，我補多句：「唔夠料做我就收皮啦！阿！Sir！」
最尾嘅「阿Sir」我特登大聲啲講，羞辱佢輔警嘅身份。
佢好似冇我辦法咁，翹埋手就笑左一下，講：「啱嘅。憑一張相就好難話係你嘅。」
「咁放我走啦！」
「問多一句。」周Sir笑一笑：「原來你拍緊拖嘅？咁叻仔嘅？邊到識架？」
「唔關你事。」
「我都提醒你啦，讀書拍拖始終唔太好，你要專心啲讀書。」
「講完未呀？」
「拍左幾耐呀？通常去邊度玩咁呀？」
「⋯⋯」
「係咪通常都係行街，睇戲食飯。」周Sir:「有冇一齊做下啲健康活動？例如跑步、游水，同埋——」
·
「——行山？」
.
呢句說話入左腦，如同敲左一下鐘咁。令我瞬間石化。
「我要去上堂！」
「咁你走啦。」
當我行去門口，正要離開嘅時候，周Sir叫停左我。
「阿匡，對鞋幾靚喎！」
我望一望今日對鞋，正正係Miss買比我嗰對。
「不過用黎行山就有啲可惜。」
仆⋯⋯街啦⋯⋯。
我望住鞋上面嘅泥漬，血液瞬間冷卻。
呢次穿煲喇。
= = =
IG: ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師