真人真事改篇﹕師生戀﹕《最接近的陌生距離》: 第十九章之四

我照Miss說話做，個人企到直一直。Miss個樣好嬲咁翹埋雙手望住我，十足十未同佢拍拖之前。
 
我地對望住唔出聲。我已經心入面諗到Miss想鬧我啲咩：「你做咩咁唔成熟。」、「正經啲啦」、「好好玩咩？」。十成都係呢啲，點知⋯⋯
 
 
「嘻——！」Miss再扮唔到嬲，直接笑左出黎。佢愈想忍但愈忍唔住，笑聲愈來愈大：「哈⋯⋯哈⋯⋯集體打飛機⋯⋯你諗架？」
 
「唔係呀。我都唔知阿偉會咁講。」我笑住咁講。
 
「唔係呀。我係話⋯⋯」Miss慢慢羞澀起黎，佢而家呢個樣有一種反差嘅可愛。集老師嘅正經與女朋友嘅甜蜜於一身。佢話：「我係話隔開我同周Sir呢方法呀。」




 
「嗯！係呀！」我點一點頭。
 
Miss個樣冧到即刻變返黃梓盈，但好快佢聽到有人跑緊上黎，就即時指住我黎鬧：「我有叫你咁做咩！！」
 
經過嘅男同學唔為意，就繼續跑上去。
 
佢扮鬧我呢句應該都係想問我點解要咁做，於是我話：「我就係唔鍾意條狗公煩住你。我想幫你出口氣咋。」
 
Miss點一點頭，好想享受呢刻獨處，好想做返我女朋友。但係剛剛跑左上去嘅男同學又跑返落去，Miss又要秒變面，「鬧」我：「你咁做對你冇好處架！」




 
我知道佢講緊我正面挑戰周Sir。
 
「你唔夠佢鬥架。」Miss:「成間學校除左校長，冇人夠佢權大。副校都好忌佢架！」
 
「佢咁樣對你，我唔可以坐視不理。」
 
跑左落去嘅同學又跑返上黎，佢應該同人玩緊捉迷藏。
 
搞到Miss又「鬧」多我一次：「你又咁衝動啦！」




 
唔知點解，我感覺到呢句真係鬧緊我。
 
「嗰日完左，我見你好唔開心。我都一樣。」我細細聲講，始終喺學校講呢啲好大風險：「但我更嬲嘅係，我竟然冇能力幫你處理。我好難受。」
 
Miss深呼吸一下，盡量唔好令自己被情緒牽動：「我冇怪你。我知道你冇可能幫我分擔到。」
 
「就算唔得，我都要。因為你係我女朋友。」
 
Miss面部表情有微妙嘅變化，塊面開始紅，雙眼都通紅起黎。但佢忍住，因為情緒一爆好影響佢一陣教書。如果而家唔喺學校，我相信佢一定會好好咁攬住我。
 
嗰個玩緊捉迷藏嘅同學又跑返落黎，Miss終於忍無可忍，指住個細路鬧：「跑完未呀？！你阻住我罰人啊！！」
 
個細路被佢嚇到仆街，就走夾唔抖咁走左。我感受到Miss真係堅嬲⋯⋯咁梗係啦明明浪漫緊但成日有人阻住晒。
 




「係呢，平時好少見你小息巡樓。點解今日要嘅？」
 
Miss嘆左口氣就話：「周Sir將我調過黎同佢一齊做嘢。而家我同佢都係高年級訓導。今日佢仲編左我同佢當值。」
 
「Lunch都要？」
 
「唔洗。不過放學要同佢開會。今晚都唔知點走到。」Miss抖左兩啖氣就同返我講：「唔好諗得咁簡單。我擔心你已經得罪左周Sir。」
 
Miss望一望個錶就話：「小息就完啦。係時候返課室上堂啦。」
 
「嗯。」
 
我同Miss一齊離開梯間，正當喺轉角位想行上樓梯時。我將Miss逼左埋牆，電光火石間，我見到Miss嚇左一跳，雙眼都瞪大左。我右手按牆，見到Miss個又驚又可愛嘅模樣，我就忍唔住要——
 
 




嘖——！
 
 
「唔⋯⋯唔⋯⋯？！」
 
Miss發出掙扎嘅聲音。但佢冇可能叫得好大聲。因為佢嘅香甜桃唇正正被我親吻住。
 
一秒，兩秒，三秒。
 
Miss推開左我，個樣好驚咁四圍望，就鬧我：「我同你講好左囉！呢度學校呀！好彩冇人咋！」
 
我見到佢好想嬲，但嬲唔落。佢好似都幾享受頭先嘅刺激咁。我見到佢一面紅透，佢個樣怕羞到已經完全失去左作為老師嘅威嚴，令我有一種按奈唔住嘅興奮。
 
「今次要罰我小過定大過？定係見家長？」見到佢驚到失神嘅樣，忍唔住要調戲佢一番：「如可以日日咁錫你。我留班都冇所謂呀！」
 




Miss瞪大眼，被我激到唔知講咩。我對住佢奸笑左幾聲，感覺呢次贏左。然後我就行上樓梯。但行唔夠一步⋯⋯
 
「低B仔！」Miss叫停左我。我一轉身，Miss就伸手扯住我條校呔，將我拉入佢嘅範圍，順勢Kiss左我一啖。
 
嘖——！
 
「呢個星期嘅Kiss Kiss賣晒啦。」佢自行離開，但行唔夠幾步，又回望我咁講：「頭先⋯⋯係幾刺激嘅！嘻——！」Miss甜笑咁行返落樓。我感受到Miss嘅情緒比今朝好得多。
 
我總算做到男朋友要做嘅嘢。
 
另一方面，咦？我頭先係咪打破左Miss條界線呀？

= = = =
 
ig: ar_hong_91




 
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學