真人真事改篇﹕師生戀﹕《最接近的陌生距離》: 第十九章之三

「Miss Wong 關於星期六⋯⋯」
 
「周Sir! 學校只可以傾公事。」
 
唔洗埋去佢地身後，我都估到佢地嘅對話。因為從背影得知Miss同同周Sir保持距離， 佢同周Sir之間隔左一個身位距離。呢個時候我只要中間攝入去，就可以隔開左佢地。
 
唔理咁多，救左Miss先！
 
「Miss——!!」
 




我由走廊尾開始起勢咁跑，杰少同阿波跟住跑緊上黎，又齊齊大叫：「Miss! 」「女王大人！！」
 
Miss同周Sir一聽到有人叫，就好緊張咁望左過黎，應該以為有事發生。我係最先埋去嗰個，就一個快身，攝左落周Sir同Miss中間。
 
「Miss！教我做呀！」我舉起佢剛剛派比我嘅中文卷，我話：「我唔識做改正呀！而家教我做呀！」
 
Miss打左個突，完全比唔到反應。
 
呢個時候杰少又衝埋上黎：「女王大人！」舉起份英文書，求其指住啲生字，話：「我突然之間，好想讀英文。教我呀！」
 




「吓，你地做咩呀？」Miss應該幾驚訝我地做咩突好學：「英文要搵Miss Lau喎！」
 
「Mi….Miss…..嗄⋯⋯嗄⋯⋯」阿波跑得最慢，扯晒哮咁舉住份數學功課：「⋯⋯點⋯⋯點解⋯⋯一加⋯⋯一等於二⋯⋯嘅？」
 
「吓？！」Miss都被我地三個搞到一頭霧水，佢見阿波唔係好掂就扶一扶佢：「你地三個有咩古怪呀？」
 
「同學，我同Miss Wong做緊正經嘢。」周Sir有啲不滿咁講:「要問功課就問返科任老師。」
 
周Sir好想撥走我地幾個再帶Miss走，佢差在未係當Miss係自己條女咁搭住Miss膀頭走。
 




「Miss, 佢地玩嘢啦！見我想搵你就跟埋黎。」我搶返個主導權就話：「我想下次小測考好啲，所以真係好想問下中文份小測卷點改正。」
 
我個樣好誠懇，一面求學心態表現晒出嚟。而Miss望一望周Sir示意佢要花啲啲時間去教我。老師教學生功課好天經地義！即使狗公周權力再大，都冇可能阻止我而家問Miss功課。
 
周Sir個樣好唔願意咁點下頭，然後望住我有啲唔順氣。我而家個樣仲有啲得戚添。
 
係呀！我就係要阻住你呢隻狗公媾女⋯⋯
 
我就係唔比你媾我女朋友啊！！
 
你可能會問，四條腸粉出得三條，咁仲有一條喺邊？
 
.
 
「周Sir!大件事啦！！」走廊尾傳黎一把叫聲。




 
負責出大絕嗰個，梗係大哥阿偉做架啦。
 
.
 
阿偉衝上黎，又特登格左喺佢同Miss之間，好緊張同周Sir講：「周⋯⋯周sir⋯⋯七⋯⋯⋯七樓⋯⋯大⋯⋯大鑊啦！」
 
阿偉七情上面⋯⋯抵你上年幫劇社拎左最佳演員獎呀！我個Brother！！！
 
周sir都比佢呃到，都緊張起上黎，問：「七樓咩事？」轉頭又同Miss講：「Miss Wong我地要上去睇下。」
 
「唔得架！Miss去就好老尷架啦！」阿偉捉實周Sir雙肩：「搵多個阿Sir幫手! 就黎sir啦!」
 
「黎Sir係低年級訓導喎！」
 




咁又點呀！未又係訓導！周Sir想同Miss獨處真係無所不用其極！
 
「七樓男廁好大件事。Miss處理唔到架，因為⋯⋯因為⋯⋯有班中七師兄喺度⋯⋯喺度⋯⋯」
 
阿偉扮到好難為情，想講又唔想講咁，搞到啲氣氛非常緊張。到底佢「見」到啲咩呢？
 
.
.
 
「佢地喺度集體打飛機啊！！」
 
.
.
 
「哇———哈哈！」阿波第一個爆笑。




 
我⋯⋯我⋯⋯我——我頂你個肺阿偉哥！下次講聲先啦，我接都接唔到呀！
 
我完全冇諗過佢會出呢招！我忍笑忍到要爆血管啦！
 
面色最難睇嘅人係周Sir, 首先佢一面懷疑咁，好想大聲反駁。但在於佢係訓導立場，佢又唔可以唔理。喺咁嘅矛盾下，佢居然咁講：「咁⋯⋯咁咋嘛？青春期嘅男仔會咁做，好正常唧！」
 
「唔係架阿Sir。」我半忍笑咁講：「打飛機係一個人嘅事。但集體就唔同，呢個係一個文化嘅問題。手嘢傳左出去，我地學校就名譽掃地啦！」
 
「冇錯啦！」阿偉，最好既兄弟，永遠都接到我波：「阿Sir你諗下！成班男人對住仲都可以互相扯旗⋯⋯我想像唔到背後隱藏嘅問題有幾嚴重。」
 
「仲唔係犯罪集團？」阿波難得接丁波。
 
「圍爐開香檳仲好唔衛生添呀！」杰少都加入戰團。
 




「周Sir你有教中史你都知啦。鴉片令我地中國人幾慘。千年古國足足百年一沉不起！仲要將我國半壁江山⋯⋯」我抱左下拳，字正腔圓咁講：「割讓比大英帝國！喪權辱國啊！」
 
Miss、三條腸粉同埋周Sir呆晒咁望住我。特別阿偉直頭將「你講乜撚嘢呀」寫喺塊面度。
 
我再講：「打飛機就係精神鴉片！集體打飛機呢個文化會毒害我地間學校架。而家就好似喺周Sir你環頭入面就有間煙館⋯⋯」
 
「得啦得啦！」周Sir好唔耐煩咁講：「我上去睇下！」
 
「阿Sir我帶路！」阿偉。
 
「我又去！」杰少。
 
「我都要見識下點樣集體打飛機法啊！」真心波仍然好真心。
 
三條腸粉就夾走左周Sir。得返我同Miss喺度。
 
「Hi Miss。」我對住佢傻笑。
 
Miss個樣好嚴肅⋯⋯死啦，好似嬲嬲地。
 
「跟我過黎。」Miss冷淡講左聲，就帶住我去樓梯間。
 
「你同我企好。」Miss指住一個角落咁講，明顯要我罰企。唉……

= = = =
 
ig: ar_hong_91
 
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學