真人真事改篇﹕師生戀﹕《最接近的陌生距離》: 第十九章之二

 
「⋯⋯夫戰，勇氣也⋯⋯」
「⋯⋯夫戰，勇氣也⋯⋯」
 
Miss 帶住我地朗讀課文。佢喺課室入面好似散步咁，一路行一路讀。以前我覺得讀課文係好無聊。但自從同佢一齊之後，我每日都好期待呢個時刻。甚至乎，非常鍾意呢一刻。因為我可以欣賞Miss嘅另一面。
 
Miss今日個Look文青左。應該話，同咗我一齊之後，佢少著左黑絲呢類令佢淫力爆升嘅衫。佢今日著嘅係長裙，顏色偏淺，加埋個眼鏡。成個人就好似文青少女作家咁。
 
「⋯⋯一鼓作氣，再而衰⋯⋯」
「⋯⋯一鼓作氣，再而衰⋯⋯」




 
Miss行緊埋黎，我望左佢一眼⋯⋯死啦佢應該知我冇讀課文。 我拿拿聲拎起本書，做下口形就當讀緊。
 
「⋯⋯三而竭⋯⋯」
「⋯⋯三而竭⋯⋯」
 
當佢經過我身邊時，佢隻手好快咁喺我枱桌摸左一下，掌心留低左啲嘢喺張枱度。
 
紙仔？
 




Miss走開左之後，我就打開左張紙，見到入面啲字好靚，寫左一句：「唔好擔心我。」
 
我當下個心暖到差少少想喊⋯⋯唔係！而係想即刻企起身大嗌：黃梓盈我愛你啊！！
 
不過⋯⋯梗係冇咁做啦。
 
「⋯⋯彼竭我盈⋯⋯」
「⋯⋯彼竭我———盈！」
 
個盈字我突登讀得大聲啲，全班人以為我玩嘢，拎Miss個名開玩笑，就一齊笑。




 
Miss本來想好嚴肅咁望住我，但一望到我就嬲唔落，一面正經話：「呢段好重要。我地讀多次。」
 
「夫戰，勇氣也。」
「夫戰，勇氣也。」
 
「一鼓作氣，再而衰，三而竭。」
「一鼓作氣，再而衰，三而竭。」
 
「彼竭我盈⋯⋯」
「彼竭我——————盈！！」
 
全班一齊大大聲讀個「盈」字出黎。Miss望住全班，換喺平時佢一定鬧。佢而家個樣好嬲，嬲就黎爆，最後⋯⋯佢自己都忍唔住笑左出黎，搞到全班都一齊笑。然後，我見到佢好感激咁望住我。
 
呢個傻妹知道我哄緊佢開心。




 
 
= = = =
 
 
「brother!」 「brother!」「brother!」「brother!」
 
四條腸粉又喺小息聚首一堂。指定動作當然係以奶代啤好好咁互相碰杯先啦。
 
「三位大哥，食得嘢啦！」阿波又被我地點出去買野食。
 
杰少望一望包野食，兜野拍落阿波個頭就話：「我要雞髀唔係上翼喎！」
 
「未又係雞！」
 




我對雞呢個字極度敏感，一聽之下就感到有啲嬲，就兜嘢拍落阿波個頭：「收皮啦！」
 
「喂，搞咩咁燥呀大佬。」阿偉主持公道，佢覺得我對阿波過分左。
 
我都唔好意思咁對阿波，就攬左佢一下：「Sor.」
 
阿波明事理，都冇嬲我。不過佢地三個都知我心事重重，都唔敢講啲咩。
 
我一路食嘢，一路攤開本英文書起勢咁刨，身邊又有一疊其他科嘅功課。杰少同阿波用好神奇嘅眼光望住我。杰少就話：「嘩你轉左死性呀？」
 
「冇計，為左我個『頭』！係要付出下架啦！」我指住自己個頭講。
 
「你個頭？冇事呀嘛！」阿波。
 
「係啊！」我再兜野拍落阿波個頭，笑住咁話：「我考得差我老母會好似咁樣打我架！」




 
我地四個一齊笑，得阿偉知點解我轉死性讀書。但最煩嘅係，喺追返啲學業同時，我又要保護自己女朋友。聽到我講呢句，你地應該知道我見到啲唔鍾意嘅嘢——Miss同周Sir喺三樓度巡樓。
 
剎那間，我即刻諗返起星期六所發生嘅一切，一股怒氣由心燒出黎。
 
呢個時候，阿偉反而講一句說話提醒左我：「諗都唔好諗呀大哥。」
 
「咩呀？」
 
「打，人地係泰拳教練，你一定唔夠打。輕則就大過，重則告你襲警，吹咩！」
 
「⋯⋯」
 
「玩手段，你夠佢黎咩？佢用訓導個權力，的你去『臭格』坐48小時都仲得添。」所謂「臭格」即係訓導室，佢繼續話：「權、人脈、球證同旁證都係佢，你點玩？」
 




我發晒悔氣咁講：「唔通我咩都唔做呀？」
 
阿偉將雞翼食到得返啲骨，再用雞翼骨扮做一個吸煙嘅動作，佢又變成懶係好飽受風霜嘅男人，佢話：「唔好諗自己冇嘅嘢，要諗自己有嘅嘢。武力、權力你都冇，你諗黎托咩？」佢望一望我枱上面嘅功課，話：「溫書把啦青頭匡！」
 
諗自己有嘅嘢⋯⋯諗自己有嘅嘢⋯⋯諗自己⋯⋯我諗到啦！
 
「你地有冇功課跟身？」
 
「冇喎。你傻架，小息仲做功課？」杰少
 
「是旦啦⋯⋯我比份英文你！我就⋯⋯就中文卷啦！」
 
「你想點呀。」阿波拎住我份數學功課。
 
「救人呀！」
 
「兄弟做野！我教你兩個點做！」阿偉都熱血起黎。
 
女王大人，你班騎士黎救你喇！！！

= = = =
 
ig: ar_hong_91
 
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學