真人真事改篇﹕師生戀﹕《最接近的陌生距離》: 第十六章之一
天邊上最後一抹嘅晚霞漸漸消失於黑暗中。隨住夜幕降臨，街道換上另一種繁囂。擠塞的馬路響號不斷，街頭上都係放工返家嘅人。
我而家喺呢堆人群入面有一種置於河流中逆流而上嘅感覺。盡管我耳朵聽到嘅人聲係好多層次，有開心、有唔開心、有興奮、有憤怒、有悲傷⋯⋯但我明顯感受到自己嘅視覺與聽覺開始慢慢唔同步。喺我眼中，身邊嘅人都係同一個表情，面如死灰。
點解會咁嘅？我身體好似向某一個方向行緊。我個腦係清晰、我仲有意志，我可以控制身體⋯⋯但我唔得！我嘅意志、情感、官能、靈魂⋯⋯一切一切都分崩離析。甚至⋯⋯
我同呢個世界慢慢剝離緊。
腦入不斷有flash back出現。我記起今日我對Miss講嘅過份說話，但令我最深刻嘅，始終都係嗰張令我討厭嘅面容——阿Vick。好在當時阿偉夾硬帶走我地，我唔知自己仲可以頂幾耐。唔係話我要反擊打嗰個人。而係心理頂唔順，喺Miss嘅男朋友面前崩潰倒地⋯⋯
Miss個男朋友⋯⋯係，當我見完Vick之後，我知道Miss真正嘅男朋友唔再係我，而係Vick。我好似明白左Miss所講嘅大人嘅戀愛同青少年嘅戀愛點解會唔同⋯⋯大人嘅戀愛一定鍾意好似Vick呢種咁成功嘅男人。
不久，我身體好自然咁停低，喺我眼前嘅係一間學校。原來我不知不覺間返黎學校附近。我⋯⋯我⋯⋯我想做咩？
呢個時候我電話響左一下，我收到一段Msg。
「Brother! 輸人唔好輸陣呀！撐你！」
阿偉為我打左枝強心針。呢個時候我個心好似暖返啲，頭腦清晰返少少，記起自己點解要返黎學校——我放心唔落，我偷偷咁返去學校，好想睇下Miss點。
但係我周圍望緊想搵Miss時，更令我即時窒息嘅事就係Vick已經唔喺度⋯⋯死啦，佢係咪接左Miss走呀？
我好凍呀！我打晒冷震！我個腦就黎缺氧啦！
唔會嘅⋯唔會嘅，Miss呢排成日OT, 佢一定仲喺學校！
我唔返去學校睇下係唔會心息！
「喂！同學，返黎做咩呀？」校工喺門前想躝住我：「老師差唔多走晒架啦！」
「強叔！我漏左啲好重要嘅野呀！我要搵返呀！」係，我漏左Miss. 我一定要搵返佢！
我一枝箭咁跑去大樓嗰邊。我覺得外套、書包呢啲好阻住我，所以唔經唔覺我掉低晒呢啲野。總之我要搵到Miss。
Miss會喺邊度？
佢呢排成日開會，一定喺會議室。 會議室喺幾樓？好似係七樓？
= = = =
「頂你！」行到上去七樓，會議室冇人！
仲有邊度？Miss通常喺邊度？
中文組⋯⋯中文週⋯⋯中文組活動室！！
一定係！下星期就係中文週活動！Miss仲忙緊！新翼三樓！佢喺新翼三樓！！
= = = =
「可惡——！」我不斷咁拍門，大叫：「開門呀！！」
中文組活動室好似個巨人咁擋左我身前。我好無助咁拍門，大叫！
幾分鐘後我先意識Miss唔喺度。
仲可以喺邊？
我班房？
= = = =
「哎呀——！！」
我跑得太急，一個唔小心喺樓梯仆左落嚟。
手肘好痛，膝蓋好痛⋯⋯唔得，唔可以停低。 我忍住痛一柺柺咁行返去課室。
「又冇人？」我望住鎖起左嘅課室門，大力踢左一腳：「啊————————！！！」
仲有一個地方,Miss一定喺嗰度。
我行去走廊邊，望返去新翼一樓。
教員室仲著緊燈。
= = = =
我不斷咁跑！搏晒命咁跑。愈來愈接近教員室。我好有信心，Miss一定喺入面！
一陣間見到Miss一定要道歉！ 搞到今日咁，全部都係我嘅責任！！
去到門口，我一嘢就撞開左度門，叫左聲：「阿盈！！」
眼前係一間空無一人嘅教員室。
但我仲未放棄，因為即使教員室好似冇人，但我仲感受到有人嘅氣息同埋打字聲！
「阿盈！」
我順住聲音咁搵，順住聲音去行，不斷呼喚Miss。 教員室個設計同辦公室一樣，啲人咁高嘅間板間開左一個個工作位。我逐個位咁去搵。我希望Miss就喺其中一個位度！
「阿盈！」
我叫左聲，我聽到啲打字聲停左。我感受到喺我身後大約三至四米外嘅工作位置上有人嘅氣息。我聽到啲雜聲，我感覺到佢好似起緊身咁。
難道係Miss?
我都未趕得切回頭望過去，就有人叫左聲。
.
.
「阿匡？」
.
.
「黎Sir？」
我回頭一望，就見到好高大又戇直嘅黎sir企左起身。
唔係⋯⋯Miss⋯⋯我失望到一個點！
「你仲未走嘅？」黎Sir打量左我之後就好緊張話：「咦？你跌親呀？做咩傷晒架？」
黎sir拎住包first aid行左埋黎，佢手法好熟咁準備晒啲野想同我清理傷口。
「唔洗啦阿Sir,我趕時間。」
「唔得！會細菌感染架！發炎就大鑊⋯⋯死啦！可能會截肢添。」黎sir好熱心，亦都好真心膠。佢已經拆左包生理鹽水出黎。
「真係唔洗啦。」
「咁⋯⋯我要話比你班主任知你出左事。」黎Sir望一望我表情，又話：「你抖氣唔順喎。你隻眼⋯⋯你喊呀？你冇事呀嘛？係咪唔開心？係咪比人蝦？邊個蝦你？」
黎Sir係煩左啲，又膠左啲，但我覺得佢係一位真心好嘅好人、好錫學生嘅好老師。佢呢下舉動，都令我軟化起黎，就問：「黎Sir,我⋯⋯我想搵Miss Wong。」
「哎呀！你一定有急事要搵佢。但係佢走左好耐喇！」黎Sir點一點頭：「嗯！你放心，你坐定定。飲啖水先。我幫你打比佢。」
我慢慢咁坐埋一邊，但心跳都仲係跳得好快。只見黎Sir返埋自己位拎起電話，我個心就祈求緊一定要打得通。
一定要！
一定⋯⋯⋯
「阿匡！」
黎Sir望左過黎，好希望電話另一邊已經接通左。
「Sorry。打左幾次，Miss電話響左好耐但冇人接。」
響左好耐冇人接？噢⋯⋯大件事。
一定係同Vick一齊⋯⋯一齊喺⋯⋯唔好呀⋯⋯唔好再諗！唔好再諗！
「你忍耐下，再飲多啖水先。阿Sir幫緊你處理。」
我真係等唔到！但可以去邊呀？！
「阿Sir, 你知唔知Miss去左邊？」
「啊⋯⋯佢好做話約左朋友喺尖沙嘴。」
咁就得！
我頭也不回就衝左出去！我聽到黎Sir喺我身後不斷叫我返黎。
= = = =
IG: ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學