真人真事改篇﹕師生戀﹕《最接近的陌生距離》: 第十五章之五

又到放學時間。

Miss忙開會。因為我同Miss嗌交嘅關係，今日唔想幫佢搞下星期中文週嘅嘢。 心情差梗係搵兄弟陪啦。

我地四條腸粉好耐冇一齊走，呢刻真係好開心。

「嘩！又係琴日架車喎！」杰少已經一枝箭標左去林寶度。阿波又跟埋去。

「都唔知有咩咁好睇。」阿偉。





我同阿偉慢慢追返杰少佢地，我就話：「你地睇還睇呀，咪用手掂添呀！賠死你呀因住！」

「啱呀。眼看手勿動。」有一把洪亮嘅男人聲喺旁邊而黎：「不過你地鍾意嘅，我唔介意兜你地一轉呀！」

我地四個應聲一看，見到一個西裝骨骨嘅中年男人喺對面七仔過黎。

「喂！係佢呀！」阿波好似見到偶像咁大叫。

中年男人好親切咁笑，就指住杰少同阿波：「我記得你地兩個！」





「琴日呀嘛！」杰少。

「型到癲呀喂！」阿波。

的確，雖然佢係中年男人。但係佢外表簡直係中年男人嘅極品！睇佢身形知佢一定有做Gym，皮膚黑實，晾得起件老西。最型係摺左䄂，頸喉鈕又唔扣，件馬甲又包到佢實一實，將佢肌肉好完美咁表現左出黎。 集成熟、穩重同不羈於一身！而佢外表唔算話好英俊，但明顯有做曬燈同護膚。佢gel左個all back油頭，而面上啲鬚更令佢更添魅力。

一句講晒，型男中嘅型男。

「我都認得你。」中年男人對住我微笑：「前日我有同你打招呼架。」





佢表面好似好nice咁，但呢種nice總係好令人唔舒服。

明顯四條腸粉之首嘅阿偉好感受到呢點，對呢個男人好冷淡。

「你架車好型呀！係咪真係會兜埋我地架？」阿波。

「哈哈⋯⋯你地真係呀。細細個老師有教唔好同陌生人傾計呀。」阿偉：「叔叔，sorry， 打搞你。」

「唔緊要！」中年男人微笑：「唔知點解一見你地我就好有活力。我都好掛住我中學嘅時代。」

中年男人望左我地四個一眼，話：「中幾呀你地？都好高大喎！」

「中四。」杰少。

「好fit喎你地。」中年男人：「平時打開波，有冇做gym操肌呀？」





「我地打人架。」阿偉：「圍毆嗰隻。」

「哈哈⋯⋯啱啱！呢啲叫青春。當年我喺LA讀書時，都同啲黑人呀白人呀打唔少。」

「叔叔咁你點解會喺度？你係咪我地嘅新老師。」真心波仍然想同呢個男人R關係：「定係⋯⋯你係校長個仔？」

「No No。其實我黎係搵人嘅。」中年男人：「反正都係，同你地講埋啦。我有個舊朋友喺你地學校裡面教書嘅。不過，唉⋯⋯我有啲事想搵佢。但冇左聯絡，我先要親自黎呢度撞下運氣。」

「係邊個？我幫你搵。但你要兜我一轉！」杰少。

「Deal ！」中年大叔大笑：「我想問下你地識唔識一位老師叫黃梓盈？」

咩話？！





「問啱人啦！」杰少同阿波開心大叫

「Miss Wong係我地班主任呀！」阿波。

「女王大人，騎士隨時候命。」杰少。

「我地同佢好老友架！」阿波。

「喂！你地夠啦。」阿偉已經知唔多對路，好想拉我地走。

「 very good! 我鍾意你地。」中年大叔：「睇黎你地可以幫到我手。講咁耐都仲未介紹我自己添。」

中年男人喺衫袋拎出卡片，逐個派比我地：「既然大家都熟左，我講清楚個目的比大家知先⋯⋯」

我望一望張卡片，我口都震埋咁細聲講：「做銀行嘅？」





.
.
·

「我叫阿Vick!其實我係你地Miss嘅男朋友。」

唔好呀⋯⋯

「我地嗌左交，我想搵返佢。」

唔好呀﹗！！

「你地幫到我架可？」





Vick叔笑住咁望住我地四個。最後對我報以微微一笑。

微微一笑。
= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中