真人真事改篇﹕師生戀﹕《最接近的陌生距離》: 第十六章之二

「咦？我銀包呢！」

我搵黎搵去都搵唔返個銀包，我當堂灰晒，我記起頭先喺學校咩都掉低晒！電話都冇跟身！

跑返去學校拎返啲嘢？唔得唔得！唔夠時間！

我可以點做⋯⋯啊！係啦！！今日小賣部買野時應該都有啲散紙嘅。於是我喺褲袋抄一抄，真係比我湊夠啲車錢去尖沙咀！

買完飛我即刻入閘，登上列車！雖然只係得五個站，但我已經等唔到。佢每停一站時我就好想落車跑。





冷靜，冷靜。 唔好亂黎害死自己。

終於到站！車門一開，我就盲頭烏蠅咁衝左出去！即使我撞到人，人地用晒粗口鬧我，我都冇所謂！

只要搵到Miss就夠，只要搵到阿盈就可以，只要⋯⋯

「大鑊。」我企喺路中心，五光十色嘅尖沙咀令我有迷路感覺：「尖沙咀咁大？點搵呀？」我好似而家先醒起尖沙嘴真係一個好大嘅地方，茫茫人海中要搵一個人出黎係幾咁難！

Miss會喺商場同Vick行街？





如果係，應該去邊間搵？美麗華？The One? 海港城？

唔係⋯⋯會唔會去左太空館⋯⋯白痴！Vick有冇咁健康呀？

「要冷靜呀⋯⋯」我細心思考，心諗：「十個男人九個想約炮，得返一個仲諗緊⋯⋯」

「按呢個邏輯去推斷，即係佢地可能會喺時鐘酒店？」

「唔係！Miss唔會咁！但如果Vick死都要搞Miss,死都要捉Miss上房呢？最方便嘅方法就係⋯⋯」





「酒吧！」我喺街度叫左出聲！聽阿偉講過，啲人喺尖沙咀飲嘢多數會去諾士佛台。我唔理咁多，我而家就去！

= = = =

「細路出返去！」酒吧負責人大大聲喝住我：「玩嘢呀！著住校服走入黎！」

我冇理佢有幾惡咁鬧我，我仍然用最大努力窺探下酒吧情況。然後有個大隻佬走埋黎，再推多我幾下：「走啦！係咪要打呀！」

佢邊推，我邊望⋯⋯唔係呢間！

我接住去下一間，我喺啲戶外位度穿插，逐張枱望，好希望會搵到Miss。 但⋯⋯仍然冇。

我呼吸好急，但我感受到吸入嘅空氣好凍，好冰冷，令氣管同肺都好痛。我四肢都凍到殭晒。 我逐間酒吧去望，逐個戶外位去搵，但都係冇發現。 四周嘅人都對我投下奇怪目光。

「細路，你冇事呀嘛？」有啲好心嘅人走黎問我：「你邊間學校？洗唔洗搵人幫你？」





「唔洗⋯⋯Miss⋯⋯Miss⋯要去下一間⋯⋯」

再去下一間⋯⋯

「細路！真係唔洗幫手？」

「唔係度嘅點解⋯⋯」

再去下一間⋯⋯

「唔對路喎！洗唔洗報警呀？」

「Miss⋯⋯對唔住⋯⋯係我錯⋯⋯對唔住⋯⋯」





點解間間都唔係嘅？Miss係咪同Vick上左房？

成條諾士佛台都掃晒，睇晒⋯⋯Miss原來喺度？佢喺酒吧入面坐低左⋯⋯咦？唔係，佢突然坐返喺戶外位嘅？

都唔係⋯⋯佢喺樹下面同Vick 飲緊酒， 佢地攬住左一齊。

又唔係？佢喺吧枱前。

佢又喺長椅度。

.
.

Miss⋯⋯點解個個人都咁似你嘅？





.
.

我睇緊嘅影像開始迷糊、重疊。我係咪就黎頂唔順啦？

.
.

「終於搵到你啦！」我膀頭被人拍左一下，有把男人聲同我講：「嚇死人咩。頭先粒聲唔出咁走左。」

係邊個？

「嘩，你流晒冷汗咁。陰公。你係咪未食野呀？唔好暈呀！」

邊個？





「呢度空氣唔流通，我帶你去海邊先。」

我感覺到有人扶住我行左好多地方，身邊經過嘅人，個樣同Miss生得好似、好似、好似⋯⋯

= = = = = 

有個人塞左杯野比我之後，我好自然咁飲左啖。

甜甜地嘅感覺令我眼中化開緊嘅影像慢慢變返正常。我首先感到海水嘅咸味、海浪嘅聲音、最後係維港嘅景色。而我就坐左喺啲長椅度。

呢個時候一隻粗糙嘅手攝喺我額頭度，之後就話：「好似有少少燒。阿Sir身上有退燒藥，你唔洗驚⋯⋯哎呦！冇喺身添，同埋你需要食啲嘢先喎！」

我慢慢將個頭望去左邊，就見到個高大戇男。

「黎Sir?」

黎Sir想應我嘅時候，佢電話就響。我望返出海，就聽到黎Sir同電話另一邊嘅人講：「我搵到佢啦，你放心。 不過佢發緊燒，我想比藥佢食，但佢要食左野先。不如⋯⋯好好你負責買左食物先⋯⋯我過黎接你過去？啊⋯⋯已經喺附近⋯⋯好好⋯⋯咁我負責去買藥⋯⋯原來你都有⋯⋯咁你黎度之後我就走啦。我覺得阿匡佢想見你，我尊重返佢私隱⋯⋯」

黎Sir把聲愈黎愈遠，我唔知佢去左邊。世界又得返我一個。

我個心好似有好多野咁，每一件事都好沉重，每一件事都可以將我拉到地底。

= = = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學