真人真事改篇﹕師生戀﹕《最接近的陌生距離》: 第十五章之四

咯咯咯—！

「阿仔！」

咯咯咯—！

「阿仔！唔洗返學咩？八點啦喎！」

我喺睡夢中比阿媽敲門聲嘈醒。頂你⋯⋯八點？我有冇聽錯？





嗶⋯⋯嗶⋯⋯

房外面電話響，就聽到阿媽就話：「Miss Wong，早晨早晨。」

咦？應該係Miss打黎。

「唔知佢咩事。叫極都唔醒⋯⋯」阿媽講完突然又好緊張咁又講：「冇事冇事。唔好意思嚇親你。」

冇事⋯⋯阿媽，我失戀唧。





「我去睇下佢醒左未先，老師你等一等。」

然後阿媽又拍我門叫我起身。

「你班主任打黎搵你，問你有冇事。冇事就同老師傾兩句啦。」

而家先想同我傾？

琴日我求你，你唔理我，算點先？而家個心頂住頂住谷鬼氣，唔撚想理你！





「唔舒服呀！」

「老師話盡量唔好缺席喎！今日個小測好重要架。」

「發燒呀！」

阿媽應該同Miss交代緊我狀況然後就收左線。

收線？

有冇當過我係男朋友？

「仔呀，我幫你請左假啦。老師叫你好好休息。」

就咁咋？





燥，唔想返學。

= = = =

星期三。

我如常返學。

我覺得個世界又唔同左。以顏色去形容嘅話，星期一係色彩繽紛。而今日雖然同星期一都有陽光，但感覺真係灰灰地。

唉，心情影響天氣，甚至視覺色彩。

小息時間，我地四條腸粉又坐埋一齊。杰少同阿波傾到滔滔不絕，唔知佢地傾咩。阿偉就坐我對面又係用好有歷練嘅男人眼神望住我。





「你唔係吓話？」

「咩呀？」

「頹到今日？」

「你知咩事咩？」

「一眼睇穿晒啦。」

「挑。」

都唔知佢想講咩。

「你咁落去唔係辦法喎。」





「咩呀？」

「好小事唧。初初你仲搵佢，就算佢黑你面都算係咁啦。但你而家Keep住唔理佢，你就真係大件事啦。」

「我琴日病左喎！」

「呃鬼咩。更可況你個對手⋯⋯」阿偉欲言又止，停一停又講：「聽偉哥講，包冇死。偉哥唔會老點你。你今日就好哄返人啦！」

我點下頭，本來想應下阿偉幾句但杰少同阿波太嘈，終於忍唔住開聲鬧佢地：「你兩個有咩咁好傾呀！好嘈呀！」

「你唔知咩？琴日學校外面泊左架靚車啊！」杰少一直好鐘意車，難怪佢興奮過睇四仔。

「係咪林寶呀？」





「咦？你又知？」

「我前日已經見到有啦。」我：「我望到入面有個男人，仲同我打左招呼。」

「喂喂⋯⋯我琴日見到佢落車，喺架車旁邊煲煙。」阿波：「超型！好man!」

我望住杰少同阿波，懷疑咁講：「男人有咩咁值得你迷戀呀？」

「說話唔係咁講呀。」杰少：「成功嘅男人係我學習對象！」

「冇錯啦！」阿波。

「我有架林寶的話，起碼啲女⋯⋯呵呵，諗下都開心！」

鐘聲起，小息完。

接住黎嘅係中文堂⋯⋯

中文堂⋯⋯

唉⋯⋯

= = = =

成件事我覺得最難受嘅係，Miss冇可能唔知我心情係點。

由內疚、失落到難過，我都表現晒出黎。但Miss仍然可以若無其事咁教書。

唉，邊有心情上堂。我趴足全堂，然後又到Lunch.

Lunch Time, 課室入面。

「我係肥波仔，我係肥波仔⋯⋯」阿波仲回味緊頭先被Miss徵召嘅時光，一邊哼住一邊派飯。當阿波派到我身邊時，我就一野逗佢雀⋯⋯仆街仔J我條女！我搞到一陣哄動。感受到改緊薄嘅Miss好惡咁望左過黎。

Miss好cool咁改緊薄，唔知佢知唔知我真係down到一個點。盒飯雖然擺喺我面前，我仲邊有心情食。 爬左兩淡飯，我就趴左喺度。

瞓瞓下都唔知時間，叫醒我嘅係一把好cool嘅女人聲。我睡眼惺忪咁抬頭，迷糊嘅雙眼慢慢搵返焦點。原來係Miss叫醒左我。

「你出黎。」

呢個時候課室人唔多，大部分都出左去玩。得返啲薯仔喺度溫書。

Miss坐返喺櫈度，佢條黑絲腿又翹埋左。兩手抱胸，個樣cool到爆。 我就成個人企左喺度，擺明比佢罰企。

女朋友罰男朋友企？聽落都覺得慌謬，但偏偏喺呢個場合就好合理。

毫無疑問，我而家個心真係好難受。Miss冇可能唔知我情緒係點。如果佢再整返個「死亡微笑」出黎，我驚我會爆。

不過好彩嘅係，即使過左幾日，我都仲覺得自己係衰先。我回憶起阿偉小息提過我嘅嘢，點都要哄返Miss，於是我就捉住機會同Miss講：「對唔住。」

「我唔係想同你講呢啲住。」Miss呢刻做返老師個樣，我都好清楚佢知我想講咩。

忍左幾日，終於可以同Miss溝通返，我想講覺己野多啲。

「我冇同阿偉佢地講星期六啲嘢呀。」我哀求緊，但我感受到內心有一股負面情緒開始形成緊。

「呢度係學校，私人嘢唔傾住。」Miss開始黑黑地面：「我要傾你返學表現。」

你⋯⋯你仲係唔想聽我講嘢？

我開始忍唔住內心嘅衝動：「點解你可以⋯⋯唔當我係一回事？」

Miss合埋雙眼一陣，好似想將要爆嘅怒氣吞返落肚。

「你缺席日數都好多，加上你琴日冇小測⋯⋯」

「我唔知要點講你先會信⋯⋯」

我同佢各自講自己嘅說話。

「⋯⋯我擔心你下學期成績追唔返的話，你會留班。」

「我唔care呀！」我終於忍唔住，爆左一句唔應該講嘅說話：「我覺得而家仲慘過留班呀！」

Miss靜左一陣，我好睇到佢有一股情緒喺佢體內翻滾。佢望住我沉默左一陣，佢雙眼內好似已經有千言萬語飄過。最後佢深呼吸左一下，就話：「咁傾到呢度先。」

Miss喺我身邊走過，依希，我記得佢個尾句好似有啲哽咽，難道佢想喊？

此時此刻，我個腦白煞一片，我心底有不安嘅感覺，頭先我應該做左一件錯事。

可能爆左一下情緒，頭腦又清晰翻。我偏偏呢個時候先諗通左呢個處境，會唔會就係師生戀嘅難處？

其實我想同佢講，我呢一刻想要嘅唔係黃梓盈老師——

——我想要女朋友啊！
= = = = = 

IG:ar_hong_91


#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學