真人真事改篇﹕師生戀﹕《最接近的陌生距離》: 第十五章之三

放學後。

我比原定時間早左去幫Miss手去準備中文週活動啲嘢。而家只要有方法可以令Miss唔再嬲我都會盡力去做！由於仲有好多人欠Miss功課，所以我可以一路pack禮物包，一路欣賞Miss點鬧人。 我見到啲師弟比佢鬧到喊晒咁，我就好羨慕，因為我連比佢鬧到喊嘅機會都冇。

或者，過左今晚會唔會好啲呢？

「五點前。」Miss好嚴肅同班師弟講：「我要收齊晒你地啲功課。交唔到嘅，留多兩日堂。」

我於心有愧之下，我比之前更小心去處理禮物包。其實成個過程都好流水作業，手腳快啲就基本上可以好快做晒。 但我好想等啲低年級師弟走晒，我就可以同Miss兩個人好好咁傾，比個機會贖罪。於是特登放慢晒手腳。





而家下午四點十五分，仲有九個字，好快唧！ 加油！！

九個字後。

「Good! 做得好。」Miss好滿意咁笑，因為班師弟好識做咁喺時限前做晒。太好，起碼Miss心情好啲先！

師弟陸續咁走晒後，得返我同Miss兩個人。我知機會黎，我心入面已經諗定點認錯。 Miss望左我一眼就慢慢行埋黎⋯⋯行刑時刻到。

我好不安咁坐一坐前個身。





Miss逐個禮物包咁檢查，然後我見到佢好滿足咁笑。

呢一刻我放心左，打蛇隨棍話：「Miss，其實今日件事呢⋯⋯」

「同我拎晒落去中文組活動室呀。」

我呆左一下，雖然佢再冇「死亡微笑」，但我感受到佢係用老師身份同我講野。

「你聽我解釋呀⋯」





我都未講完，就有人敲門。

「Miss Wong, 我地準備同校長開會。」

頂，係黎Sir。

「我⋯⋯我⋯⋯我幫你準備好一陣嘅PPT, 或者我地一路行一路夾下點講。」

「好呀。」Miss笑住回應。然後佢同返我講：「你執埋啲物資就好返屋企喇。記得聽日小測。」

「黎Sir，我行得啦。」Miss.

當時我望住Miss同黎Sir一齊去開會，仲要有講有笑，我個心好不是味意。個傻佬朝早比我撚走左，但好快放學就比到機會佢接近Miss。我眼白白睇住自己女友同其他男人行開左。話就話去開會唧，但睇住佢地背影，我不自覺咁聯想爆房呢兩個字。

睇到呢度，唔知你地有冇同我一樣覺得好難受？ 初戀難忘，而且好似矇眼行鋼線咁，行錯一步都死。





今日係我同Miss一齊後嘅第一個返學日，我死得好難睇。

= = = =

個人down down 地，想搵野忘記今日嘅不快。所以我冇聽Miss講搞埋啲物資就返屋企，我喺操場打左陣波先。

打到七點幾左右，會議室仲著緊燈。睇黎Miss仲未收得工。呢個時候老母打黎煩住晒，要我返啲返去開飯。我好無奈咁離開學校。

喺步出校門無耐，我見到有一架車好吸引我注意。佢泊左喺校門對面。點解架車咁注意到我？因為呢度係屋邨學校，雖然我學校喺區內banding都高。但我地呢一區絕對唔係啲咩貴族學校。但吸引我嗰架車正正係一架林寶堅尼。心諗⋯⋯我地同學嘅屋企人？定係阿Sir架車？

痴線架咩，邊有教書揸到林寶架？

我好不自覺咁行去架林寶度。佢開住引擎，令成架車好似隨時失控嘅猛獸咁。我更好奇車上面嘅人到底係咩人。我好自然咁埋去，又好刻意咁望入去車入面。我發現有個面目唔清晰嘅男人煲緊煙。因為我睇唔清佢個樣，只係知道佢件老西幾有型。





呢個時候車入面嘅男人望左我一眼。我地兩個四目交投。

佢好友善咁同我點頭。

奇怪，我都唔識佢做咩同我打招呼？

到底佢係邊個？

校長個仔？

= = = = =

Whatapps

「阿盈，我做晒功課啦。」8:00pm (雙藍剔）





「阿盈，聽日小測有啲位唔明，想打比你問一下。」8:45pm(雙藍剔）

「阿盈，你仲喺學校？」9:30（雙藍剔）

「阿盈，你食左飯未？」9:45 （雙灰剔）

「今日嘅事⋯⋯對唔住。」 10:30（雙灰剔）

唉⋯⋯

= = = 

ig ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學