真人真事改篇﹕師生戀﹕《最接近的陌生距離》: 第十二章之四

「吳姑娘，你好。我係4A班主任Miss Wong呀。頭先我已經聯絡左阿添爸爸⋯⋯」

我地而家去左Aeon十蚊店度買物資。我喺前面簡緊野，Miss喺我後面同學校社工傾計。

唉⋯⋯！我屌你呀「人渣添」！食左對面女校嘅女仔隻豬，惹左啲麻煩野返黎。好食唔食你食個唔未夠秤嘅！屌你都算數，阻到我先仆街嘛。

因為咁，喺過去嘅兩小時內Miss不斷同佢上司、社工、家長聯絡。其實咁樣冇晒癮，我又唔想佢分心，所以我提議去買中文週活動物資。我專心幫佢搞物資，咁佢唔受約會氣氛影響佢需要處理嘅工作。

如果今次約會係一場波，上半場係贏得漂亮，下半場後尾就仆直。屌，仲要唔關我事添。唉。





我執左一籃子咁多嘅物資，Miss用佢雪白嘅香肩夾住電話同社工傾緊個處理，同時檢查左我買啲嘢啱唔啱。

「⋯⋯係，知道嘅。咁我知點做。多謝你建議。我一陣再打比學生關心一下佢情緒，佢識知衰都好過冇⋯⋯」Miss抬起頭對住我笑，比左個like我，我應該買啱晒。

= = = = =

街道，時間係晚上八點鐘。

條「人渣添」亂食女，終於搞到我同Miss嘅約會提早收皮。不過因為啲物資好重，Miss又要處理啲煩野，所以我幫Miss一路拎住啲物資順手送Miss返屋企。





「⋯⋯總之你唔好驚先，我同社工幫你處理緊⋯⋯」

Miss不計前嫌，好好咁安慰緊「人渣添」。電話另一邊嘅佢喊得好大聲，要生要死咁。哈⋯⋯平時就牙擦擦，一奶嘢就驚成咁。睇嚟佢唔止衰十一咁簡單。隨時衰老強添呀。

一陣之後，Miss收左線，望住個天好感觸話：「終於搞店晒啦！」

Miss望一望錶，就同我講：「Sorry呀，冷落左你好耐。」

「唔緊要。你有野忙嘛。」我：「我地食左野先啦。」





「呢度冇野食架。前面有個公園仔，去抖下先啦。」

於是我地走到個公園仔休息下。

「好累呀。」Miss謝晒咁坐左喺長椅度。 公園好多樹，又少燈，環境都幾清幽。

「有冇悶親你呀？」Miss:「Sorry呀，做老師就係咁。基本上24小時on call 。」

「點會悶呀。你睇下。」我向Miss展示佢買比我套衫：「我仲有禮物收喎。今日我好開心呀。」

「真係？」

「真架。 其實我當初只係想簡簡單單食下飯，行下街咁。冇諗過今日會咁豐富。」

「哈⋯⋯呢啲基本啦。」Miss開心笑：「係你嘅問題啦。睇你平時除咗打波都冇其他興趣架啦！搞到份人咁鬼悶！」





「唔係架！我份人一啲都唔悶架！其實我仲鍾意做話劇、夾下band⋯⋯哈⋯⋯全部都係社工教我玩架！啊！仲有一樣。」

我收起笑容，心諗藉機會同Miss分享我最近一個新興趣。Miss好奇咁望住我到底想喺背囊度拎啲咩出嚟。

「Miss我啊⋯⋯最近鍾意咗睇書。」我遞咗本書比Miss，正正係白先勇本《孽子》：「我睇晒啦。仲有冇書可以推介比我呀？我家姐叫我睇倪匡喎。哈哈⋯⋯」

Miss唔出聲，睇佢有啲驚訝。因為本書我用包書膠包好咗。

「呢本都包咗嘅？」

「嗯！方便打理嘛！」

Miss凝視住我，一時間都講唔到啲咩。只感到佢雙眼有著千語萬語。我比佢搞到有啲難為情，於是擰轉面。天啊⋯⋯佢到底想講啲咩？





點知——

「咦？」

Miss叫咗聲，我擰返轉面。見到Miss已經打開咗書嘅內頁，慢慢企起身，表情相當驚訝，成個人嘅氣息好混亂！

「點解嘅？」佢緩緩咁喺內頁中拎起一樣嘢——

.

一張皺咗嘅紙。

街燈嘅光線穿透咗張紙，透出寫喺背面嘅字。

.





「Miss, 我擔心你。」

左右掉轉咗嘅字。

.

「呢張紙⋯⋯點解會喺呢本書度嘅？」

= = = =

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學