真人真事改篇﹕師生戀﹕《最接近的陌生距離》: 第十二章之五

我而家先醒起我將呢張紙仔攝咗落本《孽子》度！感覺就好似個天要發生呢啲事！

「你一直搵緊佢？」我忍唔住問。

「冇啊！⋯⋯咁⋯⋯係囉⋯⋯哈哈⋯⋯」Miss好少咁慌失失，佢意識到自己剛才嘅一句說話其實唔可以問出口。

佢唔可以比我知道，佢一直Keep住我留比佢嘅紙仔。

佢唔可以比我知道，佢一直好重視呢張呢張帶比佢溫暖嘅紙。





一切都如阿偉所講，呢張紙仔對Miss好重要。亦都反映緊一樣嘢⋯⋯Miss對我都⋯⋯我唔理啦！

「Miss，嗰時我好擔心你。你一直對我都好重要！Miss,我⋯⋯我⋯⋯我知道我同你係⋯⋯」

我慢慢抬頭望佢，卻見到佢輕輕咁搖頭。

「唔⋯⋯好⋯⋯再講。」

佢呢句說話令我再講唔到落去。





呢一刻，我見到Miss好似慢慢脫開老師嘅外殼，佢嘅表情、佢嘅呼吸、佢嘅聲音、慢慢咁變返原來嘅模樣，最真實嘅黃梓盈。

Miss再一次凝視住我，但從佢氣息之中可知，佢內心好複雜。佢剛剛先分手，個心嘅傷都仲未好。但佢又要面對住我。Miss更知道呢一刻唔可以越界。

佢係我老師。

我係佢學生。

喺呢個身份上，有著一條跨光年嘅洪溝。世人所鄙視同唾棄嘅禁忌之愛。或者佢曾經想越界，想解及禁忌，但最終害死咗Matthew。呢啲心情，一切一切都反映喺佢不安嘅雙手上面。





但係呢一刻——「Miss Wong！」我好想表白！

「阿匡呀！」強顏歡笑起嚟，將張紙攝返入本書度，再放低本書喺櫈上。然後佢一面唔自然咁講：「頭先你話社工教咗你好多嘢。咁仲學咗啲咩架？好唔好玩架？」

Miss想轉開話題，剛才嘅氛圍令佢覺得唔舒服？

定係佢知我想越界？佢想阻止我？但無論點，Miss呢下動作使我灰心起嚟。如果佢知我想表白而決定咁做，毫無疑問Miss係婉拒咗我。

「我之前參加好多青年中心嘅活動。」我抖咗啖氣，想喺表白嘅衝動中恢過嚟。我話：「我鍾意行山、露營、獨木舟、大自然、踩單車、浮潛，呢啲都好好玩架。」

「真係咁好玩？」Miss仍然努力咁強裝自然。

「嗯！你唔信嘅話我帶你去玩呀！」

「唔洗啦，忙到爆。「今日見係你，我先將工作擺埋一邊咋。」





「咁⋯⋯仲有一樣！都好好玩。而家就可以玩。」或者玩一個遊戲，大家可以冷靜一下！

「又點呀。」Miss可能同我諗緊同一樣嘢。

我走到Miss身後，距離半個身位。

「嗱！好簡單，你要合埋隻眼，雙手抱住自己。 」

「咁跟住呢？」Miss應該合理左隻眼。

「咁就要睇下你信唔信我啦。如果你信我會接住你嘅，會保護你嘅，你試下向後瞓落黎。信嘅話就嗌我個名加『我信你』三個字。唔信就嗌唔玩就得架啦。」

「明白！」





呢隻game都算刺激，應該可以令我地冷靜到！

「好，開始架啦！」我抖左一下大氣，大叫：「黃梓盈，你信唔信⋯⋯」

個「我」字都未叫出聲，Miss就突然瞓左落黎！

嚇到我即刻接實左佢！

由於事出突然，我當下意唔會到我已經攬實左Miss。兩隻手從後抱住佢。

「嘩，你咁突然嘅？如果我未準備好，你會受傷架！」

當下嘅我剩係識得抱怨佢唔跟我指示，但好快我感受到Miss個肩膀已經震緊。然後——

嘀⋯⋯嘀⋯⋯我彷彿聽到水滴嘅聲。我抱住佢嘅手感覺到有啲水滴滴緊落黎。而且啲水滴好暖，喺我仲未意識到咩事時——





「唔⋯⋯唔⋯⋯」Miss兩手震緊，然後雙肩都震埋。

.

「哇——！嗚⋯⋯嗚⋯⋯嗚⋯⋯」Miss最終忍受唔住，放聲喊咗出嚟。

我有啲招架唔住。之前知佢會喊，但好多時佢都係收收埋埋。低見佢喊得咁大聲都係第一次。

「Sorry！」我好慌張咁想放開佢，比返個空間佢。

點知呢個時候佢捉住我雙臂，把聲震晒咁講：「繼續⋯⋯抱住⋯⋯我⋯⋯」

「阿盈⋯⋯」





「抱住我呀！嗚——」

= = = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師