真人真事改篇﹕師生戀﹕《最接近的陌生距離》: 第十章之二

阿偉望一望天，就話：「天黑啦喂！返課室拎嘢走人啦。」
 
我懷住疑問隨阿偉返課室拎書包走人。喺行返落去期間我見到會議室剛好熄咗燈，一眾訓輔兩組嘅老師喺會議室陸續行出嚟。我見到Miss拎住一大疊文件，佢每走一步都好遴迍。終於——
 
「哎呀！」佢跌咗一份文件就引起骨牌效應，手上所有嘢郁跌晒落地。
 
我同阿偉見到之後，阿偉拍一拍我肩，示意一齊過去幫手。
 
「女王大人！！」阿偉突然咁叫Miss，搞到Miss唔知要好嬲定好驚訝咁回應佢。
 




「咦！你跌咗嘢喎！」阿偉突然喺Miss面前停低，充滿惡作劇意味咁講。
 
Miss即刻嬲到企返起身，叉晒腰咁講：「你係咪嚟幫手架？！」
 
「女王大人叫到！騎士隨時候命！」
 
「你試下再咁叫我啊嗱！係咪想小息罰企啊！」
 
「喂！快啲呀阿匡！」阿偉向仲行緊過嚟嘅我叫道：「女王要幫手呀！」
 




「你夠啦！黃佳偉！冇大冇細！」
 
「sor! Sor! 」阿偉同Miss講完之後再對住我講：「得未呀匡哥！妖！咁慢！」
 
我對Miss嘅愛，令一切慢慢變質。今日Miss好惡咁鬧我，令我唔敢行埋去。我唔係驚佢再鬧我⋯⋯或者我反而好想佢好似平時鬧省人咁鬧多我幾句。我只係怕我行埋去時，佢唔當我存在。所以我行得好慢，好驚面對現實。
 
不過我最終都係行咗埋去，我強裝歡笑，話：「係咪要幫手呀？」
 
「咁梗係啦！正所謂⋯⋯」阿偉扮到好正經咁同Miss講：「男人係唔應該要女人流汗架嘛！」
 




「黃！佳！偉！」
 
阿偉不斷咁搞笑，似乎想個氣氛自然啲。
 
「哈哈哈！做嘢做嘢！」阿偉拎起好重嘅文件交咗比我：「阿匡呢疊你嘅。咁嗰疊就我嘅！」
 
阿偉拎晒啲文件後正想離開，不過我見到地下仲有一本書仲未拎，我就話：「仲差一本呀！」
 
我細心啲睇，原來係Miss嘅行事曆。本行事曆跌晒入面啲嘢都跌晒出嚟。筆呀、相呀、便條呀、卡片咩都有。
 
「呢個我執返就得架啦。」
 
Miss埋去執返本行事曆後，check緊有冇唔見嘢。只見佢翻咗幾頁，就皺晒眉頭。佢抬起頭嚟，口中唸唸有詞，表情變得古怪。
 
「Miss? 你冇事嘛？」我不禁咁問。




 
Miss微微一笑，話：「冇⋯⋯冇事！啊！我好似⋯⋯留低咗啲嘢喺課室。你兩個將啲文件放喺我位就好快啲返屋企啦！唔該晒！」
 
「Yes! Your Majesty!」
 
Miss又厲咗阿偉一眼。
 
「Miss，係咪⋯⋯」我想話洗唔洗陪佢，但阿偉好快拉住我。
 
「行啦！匡哥！我想返屋企呀！」
 
於是我被佢催住去Miss位度放低啲文件。
 
「阿偉，你行先。我想返一返課室，我好似漏低咗啲嘢！」
 




我唔知Miss緊張啲咩，可能係因為我張紙仔？或者呢刻我要即刻比返佢？
 
但係阿偉拉一拉住我，佢個死人樣又變到懶係好有睿智咁，仲要特登撚把懶好聽聲咁講——
 
 
 
「啲酒呢⋯⋯要擺耐啲先會香同醇架！」


= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學