真人真事改篇﹕師生戀﹕《最接近的陌生距離》: 第十章之一

嗖——！嗖——！嗖——！穿針嘅聲音一個接一個咁響。籃球一彈一跳咁碌到我腳邊。
 
「喂——！整返粒啦匡哥！」
 
我搖搖頭，就剔起個籃球再掟返比阿偉。唉⋯⋯我咁嘅款邊有心情打波呀？
 
目送Miss好嬲咁離開後，我成個人呆晒咁企咗喺課室。阿偉唔知咩時候返課室拎嘢，然後佢好似同我講咗啲咩就捉咗落嚟操場1 on 1。
 
我冇咩狀態下同佢鬥波梗係比佢炒晒。最後我自己企咗喺場邊頹緊，諗咗好多嘢。Miss嬲我就一定架啦，而且呢次比之前逃學更大鑊，佢頭先講到好似要同我斷絕關係咁。但係⋯⋯我諗嚟諗去都諗唔明，點解Miss仲會Keep住張紙嘅？！Miss理應對每個學生一視同仁，但⋯⋯點解偏偏佢仲會Keep住我嗰張普通到不得了嘅紙仔嘅？
 




喺我諗爆頭之時，突然間——
 
崩———！
 
 
「嘩——！」我頭一下劇痛，眼睛黑咗一秒，然後一陣天旋地轉。我定一定神，粒波仲喺我腳邊彈緊！
 
「醒未呀你！」阿偉嚴肅嘅樣對我大叫。
 
「仆你個街呀！搵波掟我？！」




 
「唔順氣呀？鬥波囉！」
 
「咪咁串呀柒頭！」
 
躁躁地掟返個波埋去。於是我地兩兄弟又鏈返場。今次我狀態返嚟，同阿偉鬥得好激烈，最後係我贏咗。
 
「嗄⋯⋯嗄⋯⋯」我攤咗喺操場中間抖緊。
 
「好波呀兄弟！」阿偉跟埋我一齊攤晒喺度：「咁先似樣架嘛！」




 
打完場波，心情好啲，思路又清晰咗啲，我話：「阿偉，唔該晒。」
 
「唔該啲咩呀？」佢扮到唔知咩事，但其實佢可能一早睇穿咗我。
 
從來暗戀人都係孤單。因為好怕呢個秘密比人知道咗之後，就永遠都追唔到個女仔。更何況，我暗戀嘅人係Miss Wong，係自己嘅老師呀！唔可以比人知架⋯⋯自從愛上咗Miss，呢條戀愛嘅路只得我自己一個單打獨鬥。我以為做返乖仔，可以同佢關係更進一步。但其實只係做緊一個好學生而已。總之呢一刻，我受夠，好想有人可以明白我⋯⋯
 
「阿偉呀？」
 
「嗯？」
 
其實阿偉一定知我有心事。做兄弟咁耐，佢唔會問我有咩唔開心。佢只會等我親自講出口。呢刻我明白佢點解要捉我嚟打波。
 
「就咁嘅⋯⋯我有個朋友⋯⋯」
 




「哦！你嘅朋友！」
 
「佢有啲煩惱。我幫唔到佢，所以想問下你可以點做。」
 
我將我嘅事包裝成我「朋友」嘅事，將Miss改成隔離女校嘅中七師姐。阿偉唔會過問，亦都唔特登挖係邊位我「朋友」。佢只係用心聽，同用心比意見。
 
「⋯⋯你朋友唔洗愁喎！呢件係好事呢架！」
 
「吓？」我眼都突埋。
 
「五個字。」阿偉比出五隻手指：「愛之深，責之切！」
 
「六個字喎阿偉哥！」
 
「屌你啦！」阿偉：「嗱，冇錯你朋友今次做得好錯。但我就咁聽，個女仔係錫你朋友先會咁勞氣。」




 
「錫？你意思係⋯⋯鍾意？」
 
「邊咁快呀，但個女仔一定好重視你朋友。」阿偉拍拍我肩，講：「你朋友幫佢做咁多嘢，女仔佢或多或少感受到你朋友嘅好意。最重要係⋯⋯」
 
.
 
「個女仔仲Keep住你朋友留比佢嘅紙仔呀！」
 
.
 
「張紙⋯⋯我⋯⋯」我聽到阿偉咁講，驚訝到差啲講錯嘢，我即刻糾正返講：「我指即係朋友，佢寫得核突，張紙又皺晒，我唔明對個女仔有咩意思喎！」
 
「屌⋯⋯你咪撚柒蠢架！你都識講啦！個女仔面對咁多壓力同煩惱，學校一個朋友都冇。你朋友呢張紙即使望落微不足道，但對個女仔來講係好鼓舞。因為個女仔最需要支持嗰時，你朋友比到支持同安慰佢啊！」
 




我一面疑惑咁望住阿偉。
 
「唔信呀？」阿偉：「叫你朋友，留意下個女仔發現唔見張紙時會點囉。睇下個女仔發唔發矛？」

= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學