真人真事改篇﹕師生戀﹕《最接近的陌生距離》: 第十章之三

 
「叫你朋友，留意下個女仔發現唔見咗張紙時會點囉。睇下個女仔發唔發矛？」
 
今晚唔係好瞓到，令我腦中不斷響起阿偉呢句說話。記返起Miss當時執返本行事曆時嘅表情真係好緊張咁，然後又煞有介事地話返課室拎嘢？Miss因為唔咗我留比佢嘅紙仔而慌張起嚟？真係咁樣？
 
我抱住呢戰問題輾轉反側咗好耐。希望真係如阿偉所講今次Miss開足火力鬧我其實唔係壞事。
 
因為我對佢重要，Miss先會特別嬲。
 
最後反正都瞓唔著，我拎起Miss本白先勇佢品——《孽子》睇下。我留比Miss嘅紙仔比我攝咗落書皮度。最後後睇睇下，唔知幾時就瞓著咗。




 
 
= = =
 
 
「你地⋯⋯做咩咁早到？」
 
早上七點鐘，Miss企起課室外面好驚訝咁講。
 
「Good morning Miss Wong!」我帶頭之下，阿偉、杰少仲有阿波跟埋一齊同Miss打招呼。




 
「繼續做嘢！」我拍住手催促班兄弟做嘢。
 
琴日走嘅時候我諗過，最壞嘅情況即使Miss嬲到唔想理我，但無損我對佢嘅感覺。鍾意一個人，就係想佢開心，為佢分憂。所以我決定拿拿聲幫Miss搞店個班壁報。咁Miss就少樣嘢煩。
 
本來阿波同杰少彩我都有味，大佬七點鐘到課室搞啲咁嘅嘢喎。不過阿偉真係唔話得，佢一出手，杰少同阿波就唔托手踭。
 
Miss呢個時候慢慢走嚟壁報板前，一面難置信話：「你地咁早就為咗整壁報？」
 
「我地唔想放學整嘛！」阿波釘緊底紙。




 
「係囉，點唔知幾時又被Miss你罰留堂。到時又冇得整。」杰少剪緊啲裝飾。
 
「嗱嗱聲搞店，就少樣嘢煩啦！你話係咪呀?女王大人！」阿偉。
 
「黃佳偉！」Miss又厲住佢，然後又話：「咁早返嚟做嘢，係邊個嘅主意？」
 
「匡哥囉！」佢地三個一齊指住我。
 
頂，我冇諗過佢地會咁樣篤我出嚟。我好驚自己嘅表情會出賣自己，所以就拎啲物資去班房嘅一角慢慢整。
 
我感覺到Miss氣息好似有啲唔同。我偷偷瞄佢一眼，剛好佢望住咗我。我同佢眼神交接一刻，彷彿構成一種交流——刻意避開眼神！
 
⋯⋯搞咩呀？我同佢同一時間避開咗？
 




我keep住低頭做嘢，但忍唔住都係要偷望Miss一眼。只見佢又翹起手，做出招牌嘅女王pose。但總覺得佢呢下動作好造作，似乎想掩飾一啲心理狀態。佢行去阿偉度就話：「我仲未同你地傾要做咩主題喎。咁快就開始做？」
 
「女王大人，你放心都得啦⋯⋯啊！！sor sor！ Miss 唔好嬲啦！⋯⋯放心喎！實啱主題喎！」阿偉向我望嚟，就話：「匡哥，不如你講下你諗法係點？」
 
我冇預料到阿偉會咁樣交波，一時間接都接唔住，搞到我亂晒陣腳，話：「呃⋯⋯未⋯⋯未就係『我們這一班』囉。」
 
「唉！老土呀！」杰少。
 
「係咁架啦！學校今年主題係『關愛校園』嘛！」阿偉：「呢次班級壁報比賽一定贏呀！女王大人！」
 
「係呀！女王大人！」
 
「sure win 呀！女王大人！」
 
「你地三個夠啦吓！！」Miss爆完佢地三個後，再問：「所以呢個主意係⋯⋯」




 
「未又係匡哥囉！」佢地三個又指鬼住我。
 
我慌張咁望返Miss， 只見佢點一點頭，嘴角有啲微笑就返咗去老師枱度做嘢。雖然我同佢冇交流，但我似乎感受到Miss消咗啖氣。
 
唉⋯⋯點都好，只要我繼續鍾意佢，其他順其自然就得。
 
我一邊做嘢，一邊偷望Miss。從前嘅佢做嘢好專注，短短一個鐘就改晒成疊簿。但今日嘅佢時不時抄下個櫃桶，又行去簿櫃望下。咦⋯⋯難道佢真係搵緊我張紙仔？
 
此時，Miss望返過嚟，佢表情忽然唔自然咗一下，再將頭髮圈去耳背後面，慢慢行返埋位做嘢。有說人嘅心理黎映喺行為上面。愈細微嘅行為，所反映出嘅心理就愈真實——Miss時不時揭開自己本行事曆，佢真係想搵嘢！
 
張紙仔而家喺⋯⋯哎呀！喺屋企度添！喺我慌寸大亂時
，阿偉走埋嚟，輕輕拍我膊頭。我同佢四目交投，佢一面認真咁，似乎示意我冷靜啲。
 
「拎把交剪嚟呀！撚樣！」阿偉




 
「喂！邊個講粗口！」Miss

= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學